ފީވައް ބަނދަރު މަޝްރޫއުގެ 55 އިންސައްތަ ނިމި، ތަކުލީފަށް ހައްލު ލިބެން ކައިރިވެއްޖެ: ކައުންސިލް
27 އޯގަސްޓު 2020 | ބުރާސްފަތި 06:54މި މަޝްރޫޢުގެ ތެރެއިން ބަނދަރު ފުންކުރުމުގެ މަސައްކަތުގެ 72 އިންސައްތަ ނިންމައިފައިވޭ
ފީވަކު ބަނދަރުގެ މަސައްކަތް ކުރިއަށްގެންދަނީ
ށ. ފީވަކުގެ ބަނދަރު ތަރައްގީ ކުރުމުގެ މަޝްރޫޢުގެ 55 އިންސައްތަ ނިމި، އޮޑި ދޯނިފަހަރު ފަޅުން ބޭރުގައި އެޅުމުގެ ތަކުލީފަށް ހައްލު ލިބެން ކައިރިވެއްޖެ ކަމަށް އެރަށު ކައުންސިލުން ބުނެފިއެވެ.
މި މަޝްރޫއު ސަރުކާރުން ހަވާލުކޮށްފައިވަނީ، ރައްޔިތުންގެ ކުންފުނި، އެމްޓީސީސީ އާއެވެ. އެ ކުންފުނިން ބުނީ ށ. ފީވަށް ބަނދަރު ތަރައްޤީ ކުރުމުގެ މަޝްރޫޢުގެ 55 އިންސައްތަ މަސައްކަތް ނިމިފައިވާއިރު، މި މަޝްރޫޢުގެ ތެރެއިން ބަނދަރު ފުންކުރުމުގެ މަސައްކަތުގެ 72 އިންސައްތަ ނިންމައި ބޭރުތޮށިލުމުގެ މަސައްކަތުގެ 97 އިންސައްތަ ވަނީ މިހާރު ނިމިފައިވާކަމަށެވެ. އަދި ރިވެޓްމެންޓް ޖެހުމުގެ މަސައްކަތް މިހާރު ވަނީ ފެށިފައިކަމަށް އެމްޓީސީސީން ބުންޏެވެ.
ރާއްޖެ.އެމްވީއަށް މައުލޫމާތުދެއްވަމުން ރަށު ކައުންސިލްގެ ރައީސް ހުސެއިން ޝުޖާ ވިދާޅުވީ އެރަށުގައި ބަނދަރެއް ނެތްއިރު އެރަށގެ ދޯނިތައް ބާއްވަން ޖެހެނީ ފަޅު ބޭރުގައި ކަމަށެވެ. އަދި ބަނދަރު ތަރައްގީ ނުވާއިރު ލަފާ ފުރުމުގައި އުނދަގޫތައް ދިމާވާ ކަމަށެވެ.
ޝުޖާ ވިދާޅުވީ އެރަށުގެ ރައްޔިތުންގެ އުއްމީދަކީ އެންމެ ފުރިހަމައަށް ބަނދަރު ނިންމާލެވިގެން ދިއުންކަމަށެވެ. ރައްޔިތުން އެދޭ ގޮތަށް ބަނދަރު ފުރިހަމަވެ، ތަރައްގީވެގެން ދިއުންކަމަށެވެ.
