ޝާހިދުގެ މެސެޖު ކުރުކޮށް ފޮނިކޮށް ޗައިނާއަށް، ޗައިނީސް ބަހުން!
26 އޯގަސްޓު 2020 | ބުދަ 14:27ދެ ޤައުމުގެ ރައްޔިތުންގެ މެދުގައި އޮތް ވަރުގަދަ އެކުވެރިކަން މިނިސްޓަރ ފާހަގަ ކުރެއްވި
ޚާރިޖީ ވަޒީރު އަބްދުﷲ ޝާހިދު އާއި ޗައިނާއިން ރާއްޖެއަށް ކަނޑައަޅާފައި ހުންނަވާ ސަފީރު ޒަންގ ލީ ޖޮންގ
ދިވެހިރާއްޖޭގެ މިނިވަންކަމަށް 55 އަހަރު ފުރުމާ ގުޅިގެން ޗައިނާގެ ބެއިޖިންގ ގައި ކުރިއަށް ގެންދިޔަ ވާރޗުއަލް ރަސްމިއްޔާތެއްގައި ޚާރިޖީ ވަޒީރު އަބްދުﷲ ޝާހިދު ބައިވެރިވެ ވަޑައިގަންނަވައިފިއެވެ.
ބުދަ ދުވަހު ބެއިޖިންގައި ކުރިއަށްދިޔަ ވާރޗުއަލް ރަސްމިއްޔާތުގައި ބައިވެރިވެވަޑައިގެން މިނިސްޓަރ ވާހަކަ ދައްކަވާފައިވަނީ ޗައިނީސް ބަހުންނެވެ. މިނިސްޓަރ ވިދާޅުވީ، ރާއްޖެއާއި ޗައިނާ ގެ ގުޅުން ބިނާވެފައިވަނީ އިޤްތިސާދީ ގޮތުންނާއި، ދެ ޤައުމުގެ ރައްޔިތުންގެ މެދުގައި އޮތް ވަރުގަދަ އެކުވެރިކަމުގެ މައްޗަށް ކަމަށެވެ.
އޭގެ އިތުރުން، ރާއްޖޭގެ ތަރައްޤީގައި ޗައިނާ އަބަދުވެސް މުހިއްމު ރޯލެއް އަދާ ކުރާނެ ކަމަށް މިނިސްޓަރ ވިދާޅުވިއެވެ. އެގޮތުން ރާއްޖޭގެ ފަތުރުވެރިކަން ކުރިއެރުވުމުގައި ޗައިނާގެ ހިއްސާ ބޮޑުކަން މިނިސްޓަރ ފާހަގަ ކުރެއްވިއެވެ.
މިނިސްޓަރ އިތުރަށް ވިދާޅުވީ، ދެ ޤައުމުގެ ޚާރިޖީ ގުޅުމަށް 48 އަހަރު ފުރުން ފާހަގަ ކުރަމުންދާއިރު، ކުރިއަށް އޮތް ތަނުގައިވެސް ދެ ޤައުމުގެ ގުޅުން އިތުރަށް ބަދަހި ކުރުމަށް ދެ ޤައުމުގެ ސަރުކާރުންވެސް އަމާޒު ހިފާފައިވާ ކަމަށެވެ. މިނިސްޓަރ ވަނީ ޗައިނާއިން ވެދޭ އެހީތެރިކަމާއި، ރާއްޖެއާމެދު ބަހައްޓާ ގާތްކަމަށް އެ ޤައުމުގެ ސަރުކާރާއި ރައްޔިތުންނަށް ޝުކުރު އަދާ ކުރައްވާފައެވެ.
މިބީދައިން ޗައިނީސް ބަހުން ވާހަކަ ދެއްކެވުމުން ޗައިނާގެ ސަފީރު ވަނީ މިނިސްޓަރ ޝާހިދަށް ޝުކުރު އަދާ ކުރައްވާފައެވެ. އެގޮތުން ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ޒަންގ ލީ ޖޮންގ ކުރެއްވި ޓްވީޓެއްގައި ވަނީ މިނިސްޓަރަށް ތައުރީފު ކުރައްވާފައެވެ.
