ވެލެންސިއާގެ ފޯވާޑް ރޮޑްރިގޯ ލީޑްސްއަށް

ވެލެންސިއާއަށް ކުޅެމުން އައި ސްޕެއިންގެ ފޯވާޑް ރޮޑްރިގޯ މޮރޭނޯ ލީޑްސް ޔުނައިޓެޑަށް ބަދަލުވެއްޖެއެވެ.

ރިޕޯޓުތައް ބުނާ ގޮތުން އުމުރުން 29 އަހަރުގެ ފޯވާޑް ލީޑްސްއާ ގުޅުނީ ގާތްގަނޑަކަށް 30 މިލިޔަން ޕައުންޑްގެ އަގަކަށެވެ.

މީގެ ކުރިން ބޯލްޓަން ވޮންޑަރާސް އާއި ބެންފީކާއަށް ކުޅެފައިވާ ރޮޑްރީގޯ ވެލެންސިއާ ދޫކޮށްލީ ހަ އަހަރު ފަހުންނެވެ. އޭނާ އެންމެ ފުރަތަމަ ވެލެންސިއާއާ ގުޅުނީ 2014 ވަނަ އަހަރު ލޯނު އެއްބަސްވުމެއްގެ ދަށުންނެވެ. އަދި އޭގެ ފަހުން 2015 ވަނަ އަހަރު ވެލެންސިއާއިން ވަނީ ރޮޑްރީގޯގެ އެއްބަސްވުން ދާއިމީ ކޮށްފައެވެ.

ވެލެންސިއާގައި ރޮޑްރީގޯ ހޭދަކުރި ހަ އަހަރު އޭނާ ވަނީ އެ ޓީމަށް 220 މެޗު ކުޅެދީ 59 ލަނޑު ޖަހާފައެވެ. އަދި ވަނީ ވެލެންސިއާއާއެކު ސްޕެނިޝް ކަޕް ކާމިޔާބުކޮށްފައެވެ. ސްޕެއިންގެ ގައުމީ ޓީމަށް މިހާތަނަށް 22 މެޗު ރޮޑްރީގޯ ކުޅެދީފައިވާއިރު، އޭނާ ވަނީ ސްޕެއިންގެ ޖާޒީގައި އަށް ލަނޑު ކާމިޔާބުކޮށްފައެވެ.

ކުރިއަށް އޮތް ސީޒަނަށް ރޮޑްރީގޯ ލީޑްސްއާ ގުޅުނުއިރު، މިއީ ލީޑްސްއިން އައު ސީޒަނަށް އެ ކުލަބަށް ގެނައި ފުރަތަމަ ކުޅުންތެރިޔާއެވެ. ލީޑްސް ވަނީ މި ނިމުނު ސީޒަނުގެ އިނގިރޭސި ދެވަނަ ޑިވިޝަން (އީއެފްއެލް ޗެމްޕިއަންޝިޕް) ކާމިޔާބުކޮށް، 16 އަހަރަށް ފަހު އަލުން އިނގިރޭސި ޕްރިމިއާ ލީގަށް ޕްރޮމޯޓް ވެފައެވެ.

ގިނަ ދުވަސްތަކަކަށްފަހު ލީޑްސްއިން ޕްރިމިއާ ލީގުގެ ޖާގައެއް ހޯދިއިރު، އެޓީމަށް އިރުޝާދުދެމުން އަންނަނީ އާޖެންޓީނާގެ މާސެލޯ ބިއެލްސާއެވެ.

މީގެ ކުރިން އިނގިރޭސި ފުޓްބޯޅައިގެ ވަރުގަދަ ބާރެއްގެ ގޮތުގައި އޮތް ލީޑްސް ދެވަނަ ޑިވިޝަނަށް ރެލިގޭޓްވީ 2004 ވަނަ އަހަރުއެވެ. މީގެ ކުރިން ލީޑްސްއިން ވަނީ ތިން ފަހަރެއްގެ މަތިން ފުރަތަމަ ޑިވިޝަނުގެ ޗެމްޕިއަންކަން ހޯދާފައެވެ. އަދި ވަނީ 2001 ވަނަ އަހަރުގެ ޔުއެފާ ޗެމްޕިއަންސް ލީގުގެ ސެމީ ފައިނަލުގައިވެސް ކުޅެފައެވެ.