މަގާމުގެ މައްސޫލިއްޔަތު އަދާކުރައްވާފައި ނުވާތީ މަޖިލިސް ރައީސްގެ ނުރުހުން ޒަހާ އަށް
ޒަހާގެ އިސްތިއުފާއަށް ސަރުކާރަށް ނިސްބަތްވާ މެމްބަރުން ވަނީ މަޖިލީހުގެ ޖަލްސާތަކުގައި ވެސް ގޮވާލައްވާފަ
މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޒަހާ ވަހީދު
މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޒަހާ ވަހީދަށް މަޤާމުގެ ޒިންމާ އަދާނުކުރެއްވޭ ކަމަށް ވިދާޅުވެ މަޖިލީހުގެ ރައީސް މުހައްމަދު ނަޝީދު ނުރުހުން ފާޅުކުރައްވައިފިއެވެ.
ގެނެވުނު އިސްލާހާއި އެކު މަސްވެރިކަމުގެ ގާނޫނަށް އަމަލުކުރަން ފެށީ މިދިޔަ އަހަރުގެ ސެޕްޓެމްބަރު މަހުގެ 16 ވަނަ ދުވަހުއެވެ. އަދި މި ގާނޫނަށް އަމަލު ކުރަންފަށާތާ 6 މަސް ދުވަހުގެ ތެރޭގައި ގާނޫނުގެ ދަށުން ހަދަން ޖެހޭ ގަވާއިދުތައް ހަދަން ޖެހެއެވެ. އެހެންނަމަވެސް އެކަން އެ މުއްދަތުގެ ތެރޭގައި ކުރައްވާފައިނުވާތީ އެމައްސަލަ ގަވާއިދު ކޮމިޓީން ބަލަން ފެށިއެވެ.
އޭރު މި މައްސަލަ ބަލަން ފެށުމާއި އެކު މިނިސްޓަރ ވިދާޅުވެފައިވަނީ ގަވާއިދުގެ ޑްރާފްޓެއް އެކުލަވާލާ، އެޓަރނީ ޖެނެރަލްގެ އޮފީހަށް ލަފާއަކަށް ހެދި ފޮނުއްވާފައިވާކަމަށެވެ. އަދި ދާދި އަވަހަށް މި ގަވާއިދުތައް ގެޒެޓު ކުރެވިގެންދާނެ ކަމަށެވެ. ޖޫން މަހު މި މައްސަލަ ބެލުމަށްފަހު ކޮމިޓީން ނިންމާފައިވަނީ ގަވާއިދުތައް ގެޒެޓު ކުރުމަށް 90 ދުވަހުގެ މުއްދަތެއްދީ އިތުރު ފުރުސަތެއް ޒަހާއަށް ދިނުމަށެވެ.
އެހެންނަމަވެސް އަންގާރަ ދުވަހުގެ ނިޔަލަށްވެސް އެ ގަވާއިދުތައް ގެޒެޓު ކުރެވިފައިނުވާކަން ވަނީ ކަށަވަރުވެފައެވެ. ކޮމިޓީ ރިޕޯޓުގައިވެސް މިކަން ފާހަގަކޮށް ބުނެފައިވަނީ މިނިސްޓަރ ޒަހާ ވަނީ ގާނޫނާއި ޚިލާފުވެފައިވަކަމަށެވެ. އަދި މިނިސްޓަރ ކުރައްވަން ޖެހޭ ކަމެއް ނުކުރައްވާ ކަމަށް ރިޕޯޓުގައި ފާހަގަކޮށްފައިވެއެވެ.
ރައީސް ނަޝީދު ވިދާޅުވީ ޒަހާގެ މައްސަލަ ސަރުކާރު މައްސޫލިއްޔަތު އަދާކުރާ މިންވަރު ބަލާ ކޮމިޓީއަށް ވެސް ފޮނުވިދާނެ ކަމަށާއި އެހެންނަމަވެސް މި މައްސަލަ އެ ކޮމިޓީއަށް ފޮނުވައިގެން ބެލުމުގެ ބޭނުމެއް އޮތް ކަމަށް ދެކިވަޑައިނުގަންނަވާ ކަމަށެވެ. އެއީ ދެ ކޮމިޓީގެ ރިޕޯޓުގައި ނިންމާނީ އެއްގޮތަކަށް ކަމަށް ބެލެވޭތީ ކަމަށެވެ.
ނަޝީދު ވިދާޅުވީ މިނިސްޓަރ މައްސޫލިއްޔަތު އަދާ ނުކުރެއްވުމުން އަމަލުކުރާނެ ގޮތް މެމްބަރުންނަށް ވަރަށް ސާފުކޮށް އެނގިވަޑައިގަންނަވާނެ ކަމަށެވެ.
އެމްޑީޕީގެ "އެޖެންޑާ 19"ގައި މަސްވެރިކަން އިތުރަށް ތަރައްޤީކޮށް، ކުރިއެރުވުމަށް ގިނަ ކަންތައްތަކެއް ހިމަނާފައި ވެއެވެ. އަދި ސަރުކާރުގެ ވަޢުދުތަކުގެ ތެރޭގައި ވެސް މިކަންކަން ހިމެނެ އެވެ.
