މާލެ ފިޔަވާ ރާއްޖޭގެ 32 ރަށަކަށް ކޮވިޑުގެ ކޭސްތައް ވަނީ ފެނިފައި
މި ރަށްތަކުން ޖުމްލަ 64 މީހުން ވަނީ ޕޮޒިޓިވްވެފައި
އދ. އޮމަދޫ - މި ރަށުން 1 ދިވެއްސަކު ވަނީ ޕޮޒިޓިވްވެފައި
އަންގާރަ ދުވަހުގެ އިރުއޮއްސި 06:00 ޖެހުމާއި ހަމައަށް މާލެ ފިޔަވާ ރާއްޖޭގެ 32 ރަށަކުން ކޮވިޑުގެ ކޭސްތައް ފެނިފައިވާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ ތަފާސް ހިސާބުތަކުން ދައްކައިފިއެވެ.
އެޗްޕީއޭގެ ތަފާސް ހިސާބުތަކުން ދައްކާ ގޮތުގައި ކޮވިޑުގެ ކޭސްތައް ފެނިފައިވާ މި ރަށްތަކުން ޖުމްލަ 64 މީހުން ވަނީ ޕޮޒިޓިވްވެފައެވެ. އޭގެ ތެރޭގައި 58 ދިވެހިންނާއި 6 ބިދޭސީން ހިމެނެއެވެ. އެކަކު ފިޔަވާ ދެން ތިބި އެންމެން ވެސް ވައިރަސްއަށް ޕޮޒިޓިވްވެފައިވަނީ 14 ދުވަހުގެ ހޯމް ކަރަންޓީންގެ މުއްދަތެއް ފުރިހަމަ ކުރުމަށް ފަހު ނެގި ސާމްޕަލްތަކުންނެވެ.
ޕޮޒިޓިވްވި މީހުންގެ ތެރެއިން ރ. ދުވާފަރުން މި ވައިރަސްއަށް ޕޮޒިޓިވްވި އުމުރުން 82 އަހަރުގެ މީހަކަށް ދަނީ ބ. އޭދަފުށީގައި ޤާއިމުކޮށްފައިވާ ކޮވިޑް ފެސިލީޓިންނެވެ. ދެން ތިބި އެންމެން ވަނީ ހޯމް އައިސޮލޭޓް ކޮށްފައެވެ.
32 ރަށަކުން ކޮވިޑުގެ ކޭސްތައް ފެނިފައިވާއިރު ރާއްޖޭގެ 10 ރިސޯޓަކުން ވަނީ ކޮވިޑުގެ ކޭސްތައް ފެނިފައެވެ. އެ 10 ރިސޯޓުން 23 މުވައްޒަފަކު ވަނީ ވައިރަސްއަށް ޕޮޒިޓިވްވެފައެވެ. އަދި 9 ފަތުރުވެރިޔަކު ވެސް ވަނީ ކޮވިޑަށް ޕޮޒިޓިވްވެފައެވެ.
