ރެއާލް މެޑްރިޑަށް ކުޅެމުން އަންނަ ކޮލަމްބިއާގެ މިޑްފީލްޑަރު ހަމޭސް ރޮޑްރިގޭޒް އެވަޓަންއަށް ބަދަލުވާން އުޅޭ ކަމަށް ރިޕޯޓުތައް ބުނެފިއެވެ.
މި ޓްރާންސްފާ ބާޒާރުގައި ރެއާލް ދޫކޮށް އެހެން ޓީމަކަށް ބަދަލުވާނެ ކަމަށް ބެލެވިފައިވާ ހަމޭސް އެވަޓަންއަށް ބަދަލުވާން އުޅޭ ކަމަށް ރިޕޯޓުކޮށްފައިވާއިރު، ރިޕޯޓުތައް ބުނާ ގޮތުން ހަމޭސްގެ އޭޖެންޓް ވަނީ އެވަޓަންގެ ބޯޑު މެންބަރުންނާ ބައްދަލުކޮށްފައެވެ. އަނެއްކޮޅުން ހަމޭސް ގަތުމަށް އެވަޓަންއިން 36 މިލިޔަން ޕައުންޑް ޚަރަދުކުރުމަށް ތައްޔާރަށް އޮތް ކަމަށް ރިޕޯޓުތައް ބުނެއެވެ.
ރިޕޯޓުތައް ބުނާ ގޮތުން އެވަޓަންއިން ހަމޭސްއަށް ބިޑް ކުރަނީ އެ ޓީމުގެ ކޯޗު ކާލޯ އަންޗެލޮޓީގެ އެދުމުގެ މަތިންނެވެ. ހަމޭސް ރެއާލަށް ގެންދިއުމުގައިވެސް އޭރު ރެއާލްގެ ކޯޗުގެ މަގާމުގައި ހުރި އަންޗެލޮޓީ ވަނީ ބޮޑު ދައުރެއް އަދާކޮށްފައެވެ.
އެވަޓަންއިން ހަމޭސް ހޯދުމަށް މަސައްކަތް ކުރަމުން އަންނައިރު، މީގެ ކުރިން ހަމޭސް ވަނީ ރެއާލް ދޫކޮށް އެހެން ކުލަބަކަށް ބަދަލުވާން ބޭނުންވާ ކަމަށް ބުނެފައެވެ. ހަމޭސް ބުނީ ރެއާލް ދޫކޮށް އެހެން ކުލަބަކަށް ބަދަލުވާން ބޭނުންވި ކަމުގައިވިޔަސް، ރެއާލުން އެފުރުސަތު އޭނާއަށް ދޭނެ ކަމެއް ބުނަން ނޭނގޭ ކަމަށެވެ.
ރެއާލްގެ ފުރަތަމަ އެގާރައިން ހަމޭސްއަށް ފަހަކަށް އައިސް ޖާގަ ލިބިފައި ނުވާއިރު، އޭނާ ބުނީ ފުރަތަމަ އެގާރައިން ޖާގަ ނުލިބުމުން އެކަމާ ދެރަވި ކަމަށާއި، އެކަމަކު ކޯޗު ޒިނެދިން ޒިދާންގެ ނިންމުމަށް އޭނާ ފުރިހަމައަށް އިހުތިރާމް ކުރާ ކަމަށެވެ.
ރެއާލް ދޫކޮށްލަން ބޭނުންވާކަން ހަމޭސް ހާމަކުރި ނަމަވެސް، މީގެ ކުރިން މީޑިއާތަކުން ވަނީ އަންނަ ސީޒަނުގައި ރެއާލްގައި މަޑުކުރަން ހަމޭސް އެއްބަސްވެފައިވާ ކަމަށް ރިޕޯޓުކޮށްފައެވެ. އަދި ހަމޭސް މަޑުކުރުވަން ރެއާލުން ބޭނުންވީ މާލީ ގޮތުން ކުލަބު އަޑިއަޅާލާފައިވުމާއެކު، އިތުރު ކުޅުންތެރިޔަކު މި ޓްރާންސްފާ ބާޒާރުގައި ހޯދުމަށް އުނދަގޫވާނެތީ އާއި، ހަމޭސް ރެއާލްގެ ސްކޮޑުގައި މަޑުކުރުވަން ޒިދާން އެދިފައިވާތީ ކަމަށްވެސް ވަނީ ރިޕޯޓުކޮށްފައެވެ.
މީގެ ކުރިން ޕޯޓޯ އަދި ބެންފީކާއަށްވެސް ކުޅެފައިވާ ހަމޭސް ވަނީ އޭނާ ރެއާލްގައި މިހާތަނަށް ހޭދަކުރި ތިން ސީޒަނުގައި ކުޅުނު 111 މެޗުގައި 36 ލަނޑު ކާމިޔާބުކޮށްފައެވެ. އަދި ވަނީ ރެއާލްއާއެކު ސްޕެނިޝް ލީގާއި، ޔުއެފާ ޗެމްޕިއަންސް ލީގާއި، ޔުއެފާ ސުޕާ ކަޕް އަދި ފީފާ ކްލަބު ވޯލްޑް ކަޕް، މި ކޮންމެ މުބާރާތެއް ދެ ފަހަރު ކާމިޔާބުކޮށްފައެވެ.
