ބީއެމްއެލް އިން 10 ހޮސްޕިޓަލަކަށް ޕީޕީއީ ހަދިޔާކޮށްފި
ބީއެމްއެލް އިން ހަދިޔާ ކޮށްފައި ވަނީ 500 ފޭސް ޝީލްޑު
ބީއެމްއެލް އިން ވ. އަތޮޅު ހޮސްޕިޓަލަށް ފޭސް ޝީލްޑު ހަދިޔާކުރަނީ/ ފޮޓ:ބީއެމްއެލް
ބޭންކް އޮފް މޯލްޑިވްސް އިން ރާއްޖޭގެ 10 ހޮސްޕިޓަލަކަށް ޕާސަނަލް ޕްރޮޓެކްޓިވް އިކުއިޕްމެންޓް (ޕީޕީއީ) ހަދިޔާ ކޮށްފިއެވެ.
އެގޮތުން ބީއެމްއެލް އިން އެ ހޮސްޕިޓަލްތަކަށް 500 ފޭސް ޝީލްޑު ހަދިޔާކޮށްފައިވާ ކަމަށް އެ ބޭންކުން ބުނެއެވެ. އެއީ، އިންދިރާ ގާންދީ މެމޯރިއަލް ހޮސްޕިޓަލް، ހއ. އަތޮޅު ހޮސްޕިޓަލް، ކުޅުދުއްފުށީ ރީޖަނަލް ހޮސްޕިޓަލް، ނ. އަތޮޅު ހޮސްޕިޓަލް، އުނގޫފާރު ރީޖަނަލް ހޮސްޕިޓަލް، ވ. އަތޮޅު ހޮސްޕިޓަލް، ފ. އަތޮޅު ހޮސްޕިޓަލް، ތ. އަތޮޅު ހޮސްޕިޓަލް، ގަން ރީޖަނަލް ހޮސްޕިޓަލް އަދި ގއ. އަތޮޅު ހޮސްޕިޓަލެވެ.
ބީއެމްއެލް އިން ބުނީ އެޗްޕީއޭ އިން ހާމަކޮށްފައިވާ ތަފާސް ހިސާބުތަކަށް ބަލާއިރު، ސިއްހީ ދާއިރާގެ ކުރީ ސަފުގައި މަސައްކަތް ކުރަމުންދާ ފަރާތްތަކުންގެ ރައްކާތެރިކަން ކަށަވަރު ކުރުމަކީ މިވަގުތަށް އެންމެ މުހިންމު އެއްކަމެއްގެ ގޮތުގައި އެ ކުންފުނިން ދެކޭ ކަމަށެވެ. އަދި ސިއްހީ ދާއިރާގެ ބޭފުޅުންނަށް ސަލާމަތްތެރިކަން ހޯދުމަށް މިވަގުތު އެ ބޭފުޅުންނަށް ބޭނުންވާ އާލާތްތަކެއް ހަދިޔާ ކުރެވިގެންދާކަމީ އެބޭންކަށް ލިބޭ އުފަލެއް ކަމަށާއި، ހާއްސަކޮށް އަތޮޅު ތެރޭގެ ބޮޑެތި ހުރިހާ ހޮސްޕިޓަލަކަށް މިދަނޑިވަޅުގައި މިފަދަ އާލާތްތަކެއް ފޯރުކޮށްދިނުމަކީ ވަރަށް މުހިންމު އަދި ބޭނުންތެރިކަމެއް ކަމަށް ވެސް ބީއެމްއެލް އިން ފާހަގަކުރެއެވެ.
ކޮވިޑް-19 އާއި ގުޅިގެން ކަސްޓަމަރުންގެ ރައްކާތެރި ކަމަށް ގިނަ ފިޔަވަޅުތަކެއް ބީއެމްއެލް އިން އަޅާފައިވާ އިރު، އެކުންފުނީގެ ގިނަ ހިދުމަތްތަކެއް އޮންލައިންކޮށް ލިބޭނެ މަގު ވަނީ ފަހިކޮށްދީފައެވެ. އޭގެއިތުރުން، އެޕޮއިންޓްމަންޓް އުސޫލުން ހިދުމަތް ދޭން ފަށާފައިވާއިރު، އެ ބޭންކުން ވަނީ ކަސްޓަމަރުންނަށް ޝޯޓް ޓަރމް ފައިނޭންސިންގ އެއްވެސް ތައާރަފުކޮށްފައެވެ.
ބީއެމްއެލް އިން ވަނީ ކޮވިޑް-19 އާއި އެކު ރައްޔިތުންނަށް ދިމާވި މާލީ ދަތިތަކުން އަރައިގަތުމަށް އެހީތެރިވުމުގެ ގޮތުން ޕަރސަނަލް، ހައުސިންގ އަދި ބިޒްނަސް ލޯނުތައް ފަސްކޮށްދީ، އެ ބޭންކް މެދުވެރިކޮށް ނަގާފައިވާ ހުރިހާ ނެޝަނަލް ސްޓޫޑަންޓް ލޯނާއިއެޑިޔުކޭޝަނަލް އެސިސްޓަންސް ލޯނުތަކަށް ދައްކަންޖެހޭ މުއްދަތު ފަސްކޮށްދީފައެވެ. އަދި ސަރުކާރުގެ ކޮވިޑް-19 ރިކަވަރީ ސްކީމުގެ ދަށުން ވެސް ބީއެމްއެލް އިން ލޯނު ދޫކުރެއެވެ.
