ޓުއަރިޒަމް މިނިސްޓަަރު ކަމަށް އައްޔަން ކުރެއްވި ޑރ. ޢަބްދުﷲ މަޢުޞޫމް ކުރެއްވި މިނިސްޓަރުކަމުގެ ހުވާގައި ޤާނޫނީ ސުވާލުތަކެއް އުފެދި އެކަން ބެލުމަށް އަލުން އަނބުރާ ކޮމިޓީއަށް ފޮނުވާލައިފި އެވެ.
ޓުއަރިޒަމް މިނިސްޓަރަށް ރުހުން ދިނުމުގެ މައްސަލަ ދިރާސާކުރީ ރައްޔިތުންގެ މަޖިލީހުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީންނެވެ. މިމައްސަލަ އަލުން ބަލާދިރާސާކުރުމަށް ނެގުނު ވޯޓުގައި ބައިވެރިވެވަޑައިގެންނެވި 60 މެމްބަރުންގެ ވޯޓުންނެވެ. ކޮމިޓީގެ ރިޕޯޓް އަންގާރަ ދުވަހުގެ ޖަލްސާއަށް ހުށަހެޅުމާއެކު އެރިޕޯޓަށް ބަހުސްކުރުމުގެ ފުރުސަތު ހުޅުވާލުމުން ވިލުފުށި ދާއިރާގެ މެމްބަރ ހަސަން އަފީފު ވަނީ މައުސޫމް މިނިސްޓަރުކަމުގެ ހުވާކުރެއްވި އިރު ކުންފުންޏެއްގެ މެނޭޖިންގ ޑިރެކްޓަރ ކަމުގެ މަގާމުގައި ހުންނެވި ކަމަށް ވިދާޅުވެ އެކަމުގައި ޤާނޫނީ ސުވާލުތަކެއް އުފައްދަވާފައެވެ. އެއީ ޤާނޫނު އަސާސީ އާ ޚިލާފުކަމެއްކަމަށް ހަސަން އަފީފު ފާހަގަކުރެއްވިއެވެ. އަދި އެކަން ހިނގާފައިވާގޮތް ކޮމިޓީން ޔަގީންކޮށްފައި ނޫނީ ވޯޓަށް އަހައިގެން ނުވާނެކަމަށް ގަބޫލުފުޅުކުރައްވާ ކަމަށް ހަސަން އަފީފު ވިދާޅުވި އެވެ.
އެކަމާއި ގުޅޭގޮތުން ވާހަކަދައްކަވަމުން ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީގެ މުގައްރިރު މާފަންނު ހުޅަނގު ދާއިރާގެ މެމްބަރ މުހައްމަދު ފަލާހު ވިދާޅުވީ ކޮމިޓީން ބެލިބެލުމުގައި މައުސޫމް މިނިސްޓަރ ކަމުގެ ހުވާކުރެއްވުމަށްފަހު އެ ކުންފުނީގެ މެނޭޖިންގ ޑިރެކްޓަރ ކަމުގެ މަގާމުން ވަނީ ވަކިވެވަޑައިގަންފައެވެ. މިކަމުގައި އިތުރަށް ކުރިޔަށްދާނެ ގޮތެއް ނިންމަވާނީ ކައުންސެލަރ ޖެނެރަލާއި އަމީން އާންމު އާއި މަޝްވަރާކުރެއްވުމަށްފަހު ކަމަށް ރައީސް ނަޝީދު ވިިދާޅުވިއެވެ. އަދި މަޝްވަރާ ކުރެއްވުމަށްފަހު ނަޝީދު ވިދާޅުވީ މިމައްސަލާގައި މައުސޫމް ޞައްހަ ހުވާއެއް ކުރެއްވުމަށްފަހު މިމައްސަލަ އަނބުރާ ތަޅުމަށް ގެނައުމަށް ލަފާލިބިލެއްވި ކަމަށެވެ.
އަޅުގަނޑު ބަނދެވިފައި އިންނަނީ ޤާނޫނު އަސާސީއާއި ކައުންސެލަރ ޖެނެރަލްގެ ލަފާގެ ތެރޭގައި އަދި އަމީން އާންމުގެ ލަފާގެ ތެރޭގައި. ކައުންސެލަރ ޖެނެރަލް ވިދާޅުވީ ބުއްދިވެރި ގޮތަކީ ޞައްހަ ހުވައެއް ކުރައްވައިގެން ވަޑައިގެންނެވުން ކަމަށް. އެހެންވީމާ އަޅުގަނޑަށް ދަންނަވަންޖެހޭނީ މިރިޕޯޓަށް އަޅުގަނޑަށް ވޯޓަށް ދަންނަވަން ނެތް ވާހަކަ. އަދި ކޮމިޓީން އަލުން އަނބުރާ މިކަން ބެލުމަށްފަހު ތަޅުމަށް ގެނައުމަށްރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
އަދި މިކަމުގައި ބަހުސަކަށް ހުޅުވާލެއްވެމުން ބައެއް މެމްބަރުން ވިދާޅުވެފައިވަނީ އަލުން ހުވާ ކުރެއްވުމަށްފަހު މިމައްސަލަ އަނބުރާ މަޖިލީހަށް ގެނައުމަކީ މިކަމުގައި ޤާނޫނީ ގޮތުން އޮތް ހައްލުކަމަށެވެ. މިކަމުގައި ވާހަކަދައްކަވަމުން ތުޅާދޫ ދާއިރާގެ އެމްޑީޕީ މެމްބަރ ހިސާން ހުސައިން ވިދާޅުވީ ޤާނޫނު އަސާސީގައި ވަޒީރަކު ކޮށްގެން ނުވާނެކަންކަން ބަޔާން ވެފައިވާ ކަމަށެވެ.
އެހެންކަމަށް ވަނީނަމަ ހުވާކުރުމަށްފަހު އަދި އޭނާއަށް ރައީސުލްޖުމްހޫރިއްޔާ އަރުވާ ފަތްކޮޅު އެރުވުމަށްފަހު އޭނަ އެބަ އެހިސާބުން ވަޒީރުކަމުގެ ފަންކްޝަން އެގްޒެކެޓިވް ކުރަންފަށާ. އަދި އެސިކުންތުން ފެށިގެން އޭނާ ޤާނޫނު އަސާސީ 136 ވަނަ މާއްދާގެ ހ ގައި ބަޔާންކޮށްފައި މިއޮންނަ ކަންތައްތަކުގެ ތެރެއިން އެއްވެސް ކަމެއް ކޮށްގެން ނުވާނެ. ވަޒީރު ކަމުގެ ހުވާކުރައްވާ ރައީސް ފަތްކޮޅު އެރުވީމާ އެހިސާބުން އެހުރީ ވަޒީރުކަމުގެ މަސްއޫލިއްޔަތާއި ހަވާލުވެފައި. އެހެންކަމުން އަޅުގަނޑުމެންނަށް ނުބެނެވޭނެ އޭނާގެ ވަޒީރުކަން ފުރިހަމަވެގެން އަންނަނީ އަދި ޤާނޫނު އަސާސީން އޭނާގެ މައްޗަށް ކުރުން ލާޒިމް ކަންތައްތައް ކުރުން އަންނަނީ މަޖިލީހުން ރުހުން ދިނީމަކަމަށް. ޤާނޫނު އަސާސީގައި ހުރި އެންމެހާ ކަންތައްތަކަށް އޭނާ އެޕޮއިންޓްވާ ވަގުތުން ފެށިގެން ތަބާވާންޖެހޭނެ. އަޅުގަނޑަށް ފެންނަ ފެނުމުގައި އޭނާ ހުވާކުރުމާއެކު ޤާނޫނު އަސާސީން ކުރުން މަނާކަމެއް ކޮށްފިނަމަ އެއީ އޭނާގެ ވަޒީރުކަމުގެ ހުވާ ސައްހަވާނެ ކަމެއް ނޫން.ތުޅާދޫ ދާއިރާގެ އެމްޑީޕީ މެމްބަރ ހިސާން ހުސައިން
މިކަމާއި ގުޅޭގޮތުން ވާހަކަދައްކަވަމުން ކެންދޫ ދާއިރާގެ ޖޭޕީ މެމްބަރ އަލީ ހުސައިން ވިދާޅުވީ މިމައްސަލާގައި ހިމެނޭ ވަޒީރުގެ ހުވާ ޞައްހަ ވާނެކަމަށެވެ.
އެއީ ވަޒީރަކަށް ވުމަށްފަހު ކުރުން ހުއްދަނުވާނެ ކަންތައްތަކެއް ޤާނޫނު އަސާސީގެ 136 ވަނަ މާއްދާގައި އޮތީ. އެހެންވީމާ އޭގެފަހުން ކަމެއް ކުރުން އެއީ އަދި އެހެން ވާހަކައެއް. އެއީ ވަޒީރުންގެ މަޖިލީހުގެ މެމްބަރަކަށް ވުމަށްޓަކައި ހުންނަން ޖެހޭ ޝަރުތުތައް ހުރީ 130 ގައި. ނަމަވެސް އޭގެފަހުން 136 ވަނަ މާއްދާގައި ބުނާ ކަންތައްތައް ކޮށްފިއްޔާ އެއީ އެހެން ވާހަކައެއް. އެހެންވީމާ ހުވާ އޭގެ ޒާތުގައި ޞައްހަވާނެކަން އެއީ އަޅުގަނޑު ބުނަން ބޭނުންވާ ވާހަކައަކީ.ކެންދޫ ދާއިރާގެ ޖޭޕީ މެމްބަރ އަލީ ހުސައިން
ޤާނޫނު އަސާސީގެ 136 ވަނަ މާއްދާ ކަމުގައިވާ ވަޒީރުންގެ މަޖިލީހުގެ މެމްބަރަކު ކޮށްގެންނުވާނެ ކަންތައްތައް ބަޔާންކޮށްފައިވާއިރު އެމާއްދާގެ ހ ގައި ބުނަނީ ވަޒީރުންގެ މަޖިލީހުގެ އެއްވެސް މެމްބަރަކު ސަރުކާރުގެ އެހެން މަގާމެއް އަދި ފައިދާ އެއް ލިބޭފަދަ އެނޫންވެސް މަގާމެއް ފުރައިގެނެއް ނުވާނެ އެވެ. އަދި ވިޔަފާރިއެއް ހިންގުމުގައި އަމަލީގޮތުން ބައިވެރިވެ، އާމްދަނީ އެއް ހޯދުމަށް ފަންނީ މަސައްކަތެއްގައި ޝާމިލްވެ އާމްދަނީއެއް ލިބޭފަދަ އެހެން އެއްވެސް މަސައްކަތެއްކޮށް އެހެން އެއްވެސް ފަރާތެއްގެ ވަޒީފާއެއް އަދާކޮށްގެން ނުވާނެކަމަށެވެ.
ޑރ. ޢަބްދުﷲ މަޢުޞޫމް ޓޫރިޒަމް މިނިސްޓަރުގެ މަޤާމަށް ޢައްޔަނު ކުރައްވައި މަޤާމުގެ ފަތްކޮޅު އަރުވާފައިވަނީ އޮގަސްޓް މަހުގެ 6 ވަނަ ދުވަހުއެވެ. ޑރ. ޢަބްދުﷲ މަޢުޞޫމްގެ ނަން ދިރާސާކުރުމަށް ރައްޔިތުންގެ މަޖިލީހުގެ ސަރުކާރުގެ މަސްއޫލިއްޔަތު އަދާ ކުރާ މިންވަރު ބަލާ ކޮމިޓީއަށް ފޮނުވީ އޮގަސްޓް މަހުގެ 10 ވަނަ ދުވަހު އެވެ. ނަން ދިރާސާކުރުމަށްފަހު ކޮމިޓީން މައުސޫމަށް ރުހުން ދޭން ފެންނަކަމަށް ފާސްކޮށްފައިވަނީ އޮގަސްޓް މަހުގެ 20 ވަނަ ދުވަހު އެވެ.
މިކަމާއި ގުޅޭގޮތުން ވާހަކަދައްކަވަމުން ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވީ މައުސޫމް ކުންފުނިން ވަކިވެވަޑައިގެންފައިވާކަމަށް އިކޮނޮމިކް މިނިސްޓްރީން މަޖިލީހަށް އަންގާފައިވަނީ އޮގަސްޓް މަހުގެ 18 ވަނަ ދުވަހު ކަމަށެވެ.
