ށ. ފުނަދޫގެ ޒުވާނުން އިސްނަގައިގެން އެ ރަށުގައި މިހާތަނަށް ބާއްވާ އެންމެ ބޮޑު ކުޅިވަރު ފިއެސްޓާ ކަމަށްވާ "ޔުނިޓީ ކަޕް 2020" ގެ ގުރުއަތުލުން ބާއްވައިފިއެވެ.
ވޮލީބޯޅަ އާއި ފުޓްސަލް ހިމެނޭ ގޮތަށް ކުރިއަށްގެންދާ މި ފިއެސްޓާގެ ގުރުއަތުލުން ބާއްވާފައިވަނީ އާދިއްތަ ދުވަހުގެރޭ ފުނަދޫ ފުޓްސަލް ދަނޑުގައެވެ.
މި ފިއެސްޓާ ރާއްވާ ހިންގުމުގައި އިސްކޮށް ހަރަކާތްތެރިވާ ޒުވާނުން ބުނީ މި ފަދަ ފިއެސްޓާއެއް ބޭއްވުމަށް ނިންމީ ދެ ޖިންސުގެ ޒުވާނުންނަށްވެސް އެއް ހަމައެއްގައި ވާދަވެރި މުބާރާތެއް ކުޅެލުމުގެ ފުރުސަތު ހޯދައިދިނުމުގެ ގޮތުން ކަމަށެވެ. އެގޮތުން މި މުބާރާތުގައި ވޮލީބޯޅަ އާއި ފުޓްސަލްގައި ދެ ޖިންސުގެ ޒުވާނުން ވާދަކުރާނެއެވެ.
އެގޮތުން ވޮލީބޯޅަ މުބާރާތުގައި ފިރިހެން ނުވަ ޓީމު ވާދަކުރާއިރު، އަންހެން ހަތަރު ވާދަކުރެއެވެ. އަދި ފުޓްސަލް މުބާރާތުގައި ފިރިހެން 15 ޓީމާއި އަންހެން ހަތަރު ޓީމު ވާދަކުރާއިރު، ރަށުން ބޭރުންވެސް ޓީމުތައް ބައިވެރިވެފައިވާ ކަމަށް މި ފިއެސްޓާ ރާއްވާ ހިންގުމުގައި އިސްކޮށް ހަރަކާތްތެރިވާ ޒުވާނުން މައުލޫމާތުދެއެވެ.
މިމަހުގެ 28 ވަނަ ދުވަހު ޔުނިޓީ ކަޕްގެ ވޮލީބޯޅަ މުބާރާތް ފަށާއިރު، ފުޓްސަލް މުބާރާތް ފަށަނީ އަންނަ ސެޕްޓެމްބަރު މަހުގެ އެއްވަނަ ދުވަހުއެވެ.
މުބާރާތް އިންތިޒާމު ކުރުމުގައި އިސްކޮށް ހަރަކާތްތެރިވާ ހުސައިން އަރީފް ބުނީ މިއީ މިހާތަނަށް ހުރިހާ ޖިންސަކަށް ހާއްސަކޮށްގެން އެ ރަށުގައި ބާއްވާ ފުރަތަމަ މުބާރާތް ކަމަށް ވުމާއެކު، މުބާރާތަށް ގިނަ ބައެއްގެ ތަރުހީބު ލިބޭ ކަމަށެވެ. އަދި މުބާރާތް ހާއްސަވާ އެއް ސަބަބަކީ މި މުބާރާތުގެ ކޯ ސްޕޮންސަރުންގެ ގޮތުގައި ޖެންޑަރ މިނިސްޓްރީން ގެވެށި އަނިޔާއަށް ހޭލުންތެރިކުރުމަށް ހިންގާ "ގެވެށި ދިރިއުޅުން" ކެމްޕެއިން ކަމަށްވާތީ ކަމަށްވެސް ބުންޏެވެ.
ފުނަދޫ ޒުވާނުން މައުލޫމާތުދޭ ގޮތުގައި މިއީ އެ ރަށުގެ ހުރިހާ ވިޔަފާރިވެރިންގެ އެހީ އާއި އާންމު ފަރުދުންގެ އެހީތެރިކަމާއެކު ބޭއްވޭ ފުރަތަމަ މުބާރާތެވެ. މި މުބާރާތުގެ މެއިން ސްޕޮންސަރަކީ އަކީ ހެލޯ ފިހާރައެވެ.
