ހިޔާ މަޝްރޫއުގެ ހަތަރު ކެޓަގަރީއެއްގެ ވަގުތީ ލިސްޓު އާންމުކޮށްފި
24 އޯގަސްޓު 2020 | ހޯމަ 09:47އާންމު ކޮށްފައިވަނީ H4, H5, H8 އަދި H10 ގެ ވަގުތީ ލިސްޓު
ހުޅުމާލެގައި ތަރައްގީ ކުރަމުންދާ ހިޔާ ފްލެޓްތައް
ހިޔާ މަޝްރޫއުގެ ދަށުން ފްލެޓް ދޫކުރާ ހަތަރު ކެޓަގަރީއެއްގެ ވަގުތީ ލިސްޓު ގެޒެޓްގައި ރައީސް އޮފީހުން އާންމުކޮށްފިއެވެ.
ރައީސް އޮފީހުން ބުނީ ފްލެޓްތަކުގެ މައްސަލަ ބަލާ ކޮމިޓީގެ މެންޑޭޓްގެ ތެރޭގައި ހިމެނޭ މައިގަނޑު އެއް މަސައްކަތަކީ ހިޔާ މަޝްރޫއުގެ ދަށުން ފްލެޓަށް އެދި ހުށަހަޅާފައިވާ މީހުންނަށް ޕޮއިންޓް ދީފައިވަނީ އުސޫލާ އެއްގޮތަށްތޯ ބަލައި ކަށަވަރުކުރުން ކަމަށްވާތީ، އެ މަސައްކަތުގެ ތެރެއިން މިހާތަނަށް އެ ކޮމިޓީން ދިރާސާކޮށް ނިމިފައިވަނީ ހަތަރު ކެޓަގަރީއަކަށް ހުށަހަޅާފައިވާ ފޯމުތައް ކަމަށެވެ.
އެގޮތުން އާންމު ކޮށްފައިވަނީ H4, H5, H8 އަދި H10 ގެ ވަގުތީ ލިސްޓު ކަމަށާއި، މި ލިސްޓަކީ ފްލެޓްތަކުގެ މައްސަލަ ބަލާ ކޮމިޓީން ދިރާސާ ކުރެއްވުމަށްފަހު ނެރުނު ލިސްޓެއް ކަމަށް ރައީސް އޮފީހުން ފާހަގަކުރެއެވެ.
H4 ކެޓަގަރީ އަކީ ޑޮކްޓަރުންނާއި ނަރުހުންނަށް ހާއްސަ ކޮށްފައިވާ ކެޓަގަރީއެވެ. އަދި H5 ކެޓަގަރީގެ ފްލެޓްތައް ޓީޗަރުންނަށް ހާއްސަ ކޮށްފައިވާއިރު، H8 ކެޓަގަރީގެ ފްލެޓްތައް ހާއްސަކޮށްފައި ވަނީ މާލޭ ރަށްވެހިންނަށެވެ. އަދި H10 ކެޓަގަރީގެ ފްލެޓް ހާއްސަކޮށްފައި ވަނީ ނުކުޅެދުންތެރިކަން ހުންނަ ފަރާތްތަކާއި އާއިލާތަކަށެވެ.
އެ ހަތަރު ކެޓަގަރީއަށް ފޯމު ހުށަހަޅާފައިވާ މީހުންގެ ތެރެއިން ކޮމިޓީން ބެލިބެލުމުގައި އެ ކެޓަގަރީއަކަށް ފޯމު ހުށަހެޅުމަށް ޝަރުތު ހަމަވާ މީހުންނާއި، ޝަރުތު ހަމަނުވާ މީހުން، ޝަރުތު ހަމަނުވާ ކަމަށް ކޮމިޓީއަށް ފެންނަ ސަބަބާއެކު ވަގުތީ ލިސްޓުގައި އާންމު ކޮށްފައިވާނެ ކަމަށް ރައީސް އޮފީހުން ބުނެއެވެ. އަދި ކެޓަގަރީތަކަށް ކުރިމަތިލުމަށް ޝަރުތު ހަމަވާ މީހުންގެ ތެރެއިން، ދިރިއުޅުމުގެ ހާލަތު ބެލުމުގެ ކަންކަން ކުރިއަށްގެންދެވިފައިނުވާ މީހުންނަށް ސަބަބާއެކު ވަގުތީ ލިސްޓުގައި ފާހަގަކޮށްފައިވާނެ ކަމަށްވެސް ރައީސް އޮފީހުން ބުނެއެވެ.
އޭގެ އިތުރުން އެ ހަތަރު ކެޓަގަރީއަށް ފޯމު ހުށަހަޅާފައިވާ މީހުންނަށް ޕޮއިންޓް ލިބިފައިވާ ގޮތުގެ ވަގުތީ ލިސްޓަށް ޝަކުވާ ހުށަހެޅުމުގެ ފުރުސަތު މި މަހުގެ 24ން އަންނަ ސެޕްޓެމްބަރު މަހުގެ 14 ވަނަ ދުވަހުގެ 15:00 ނިޔަލަށް ހުޅުވާލާފައިވާ ކަމަށާއި، އެ މަޝްރޫއުގެ ދާއިމީ ލިސްޓް އެކުލަވާލުމުގައި މިޕޯޓަލްމެދުވެރިކޮށް ހުށަހެޅޭ ޝަކުވާތަކަށް ރިއާޔަތް ކުރެވޭނެ ކަމަށް ރައީސް އޮފީހުން ބުނެއެެވެ.
އަދި ހިޔާ މަޝްރޫއުގެ އެހެން ކެޓަގަރީތަކުގެ މަސައްކަތް ނިމުނުހާ އަވަހަކަށް ވަގުތީ ލިސްޓް އިއުލާން ކުރާނެ ކަމަށްވެސް ރައީސް އޮފީހުން މައުލޫމާތުދެއެވެ.
