މިނިސްޓްރީގެ ބެލުމުގެ ދަށުގައި ހުރި ބިންތައް ދޫކުރުމުގެ ލަފަޔަކަށް އެދިފައިވާނެ: މަހްލޫފް
މިނިސްޓަރުކަމާ ހަވާލުވި ފަހުން އަދި ބިން ދޫނުކުރަން
ޔޫތު މިނިސްޓަރު އަހުމަދު މަހްލޫފް
ޔޫތު މިނިސްޓްރީގެ ބެލިމުގެ ދަށުގައި ހުރި ބިންތައް އަމިއްލަ ފަރާތްތަކަށް ދޫކޮށްގެން ތަރައްގީ ކުރުމަށް އިކޮނޮމިކް ކައުންސިލުގެ ލަފަޔަލަށް އެދިފައިވާނެ ކަމަށް ޔޫތު މިނިސްޓަރު އަހުމަދު މަހްލޫފް ވިދާޅުވެއްޖެއެވެ.
ރައްޔިތުންގެ މަޖިލީހަށް މިއަދު މިނިސްޓަރު މަހްލޫފް ހާޒިރުކޮށްފައިވާއިރު ޖަލްސާގައި ހެންވޭރު ދެކުނު ދާއިރާގެ މެމްބަރު، ހުސެން ޝަހީމް ކުރެއްވި ސުވާލުތަކަށް ޖަވާބު ދެއްވަމުން މިނިސްޓަރު މަހްލޫފް ވިދާޅުވީ، މީގެ ކުރިން މިނިސްޓްރީގެ ބެލުމުގެ ދަށުގައި ހުރި ބިންތައް ދޫކޮށްފައިވާ ކަމަށާއި އެހެންނަމަވެސް މިނިސްޓަރުކަމާ ހަވާލުވި ފަހުން އެގޮތަށް ބިން ދޫކޮށްފައި ނުވާނެ ކަމަށެވެ.
ޔޫތު މިނިސްޓްރީގެ ބެލުމުގެ ދަށުގައި ހުންނަ ބިންތައް ބޭނުން ކުރުމަށް ހުއްދަ ލިބުން ހައްގު ފަރާތްތަކަށް އެފުރުސަތު ނުލިބި، މާލޭގައި އުޅޭ ތަފާތު ކުށްތަކަށް އަރައިގަންނަ މީހުންނަށް އެފަދަ ބިންތައް ދޫކޮށްފައިވާ ކަމަށް ޝަމީމް ފާހަގަކުރެއްވުމުން، މިނިސްޓަރު މަހްލޫފް ވަނީ އެ ކަންބޮޑުވުން އޮތްކަމަށް ވިދާޅުވެފައެވެ. އަދި އެކަން ކޮށްފައި ވަނީ ޔޫތު މިނިސްޓްރީގެ ބެލުމުގެ ދަށުން ނޫން ކަމަށާއި އެއީ މީގެ ކުރިން ހައުސިންގ މިނިސްޓްރީ އާއި ބައެއް ފަރާތްތަކާއި ދެމެދު ވެވުނު އެއްބަސްވުންތަކެއް ކަމަށް މިނިސްޓަރު ވިދާޅުވިއެވެ.
މިނިސްޓަރު ވަނީ މިގޮތަށް ބިންތައް ދޫކޮށްފައިވާ އިރު، އެގްރިމެންޓެއް ހެދި ބިން ދޫކޮށްފައިވާ ކަން ފެންނަން އޮތީ ދެ ފަރާތަކާއި އެކު ކަމަށާއި އެއްބައެއްގެ އަތުން ތަޅުދަނޑިއެއް ފެނިފައިވާ ކަމަށް ފާހަގަކޮށްފައެވެ. އަދި މިކަމަށް ހައްލު ހޯދުމަށް ކެބިނެޓަށް ކަރުދާހެއް ހުށައަޅައި މަޝްވަރާ ކުރެވެމުންދާ ގޮތަށް ބަލާ އިރު، އާންމުކޮށް އިއުލާންކޮށްގެން ރަޖިސްޓަރ ކޮށްފައިވާ ޖަމިއްޔާ އަކަށް ނުވަތަ ކުލަބަކަށް އެތަންތަން ދޫކޮށްގެން އެތަންތަން ހިންގުމަށް ރޭވިފައިވާ ކަމަށް މިނިސްޓަރި ވިދާޅުވިއެވެ.
އެހެން ނަމަވެސް އެތަންތަން ދޫކުރާނީ ދައުލަތުން ކަނޑައަޅާ އުސޫލެއްގެ ދަށުން އެތަންތަން ހިންގަން އެއްބަސްވާ ބަޔަކަށް ކަމަށްވެސް މިނިސްޓަރު ފާހަގަކުރެއްވިއެވެ.
މަހްލޫފް ވަނީ ގާނޫނާއި ގަވައިދާ ހިލާފަށް ރާއްޖޭގައި އެއްވެސް ކުޅިވަރު ޖަމިއްޔާއެއް އޮތްކަމަށް ގަބޫލު ނުކުރައްވާ ކަމަށާއި އެފަދަ ކަމެއް އުޅޭކަމަށް ވާނަމަ ކޮމިޝަނަރު އޮފް ސްޕޯޓްސް ނުވަތަ ކުޅިވަރާބެހޭ މަޖިލީހުން އެކަންތައް ބަޔާންކޮށްދޭނެ ކަމަށްވެސް ވިދާޅުވެފައެވެ.
ކުޅިވަރުގެ ހުރިހާ އެސޯސިއޭޝަންތައް ވެސް ހިނގާނީ ޔޫތު މިނިސްޓްރީ އިން ހަމަޖައްސައިދޭ ފައިސާއިން ކަމަށާއި އެހެންނަމަވެސް މިނިސްޓްރީ އިން އެކަން ކުރާނީ އެކަމަށް ބޭނުންވާ ހުރިހާ ޑޮކިއުމަންޓްތައް ހޯދުމަށްފަހު ކަމަށް މިނިސްޓަރު ފާހަގަކުރެއްވި އެވެ.
