ކަރަންޓީން ރިލީޒް ސާމްޕަލްތަކުން ޕޮޒިޓިވްވި މީހުންގެ ތެރޭގައި 5 ކުޑަކުދިން
ތ. އޮމަދޫ އިން އުމުރުން ދެ އަހަރުގެ ކުއްޖަކު ވެސް ވައިރަސަށް ޕޮޒިޓިވްވެފައިވޭ
ތ. އޮމަދޫ
ކަރަންޓީން ރިލީޒް ސާމްޕަލްތަކުން ޕޮޒިޓިވްވި މީހުންގެ ތެރޭގައި ފަސް ކުޑަކުދިން ޕޮޒިޓިވްވެފައިވާ ކަމަށް ހެލްތު އިމަރޖެންސީ އޮޕަރޭޝަން ސެންޓަރު (އެޗްއީއޯސީ) އިން ހާމަކޮށްފިއެވެ.
އެޗްއީއޯސީ އިން ހާމަކޮށްފައިވާ މައުލޫމާތުތަކުން ދައްކާ ގޮތުން ޕޮޒިޓިވްވި ހުރިހާ ކުދިންނަކީ ވެސް އުމުރުން 11 އަހަރުން ދަށުގެ ކުދިންނެވެ. އެގޮތުން ރ. ދުވާފަރުން އުމުރުން ތިން އަހަރުގެ ކުއްޖަކު ކޮވިޑް-19 އަށް ޕޮޒިޓިވްވެފައިވާ އިރު، ތ. އޮމަދޫ އިން އުމުރުން ދެ އަހަރުގެ ކުއްޖަކާއި، ހަތަރު އަހަރުގެ ކުއްޖެއްގެ އިތުރުން 11 އަހަރުގެ ކުއްޖަކު ކޮވިޑް-19 އަށް ޕޮޒިޓިވްވެފައެވެ. ލ. ގަމުން 8 އަހަރުގެ ކުއްޖަކު ވެސް ޕޮޒިޓިވްވެފައިވާ ކަމަށް އެޗްއީއޯސީ އިން ބުނެއެވެ.
މި ހުރިހާ ކުދިންނަކީ ވެސް ދިވެހި ކުދިން ކަމަށާއި، މިކުދިންގެ ތެރޭގައި ހިމެނެނީ ހަތަރު ފިރިހެން ކުދިންނާއި އެއް އަންހެން ކުއްޖަކު ކަމަށް އެޗްއީއޯސީ އިން ބުނެއެވެ.
މީގެއިތުރުން، ދުވާފަރުން އުމުރުން 55 އަހަރުގެ ދިވެހި އަންހެނަކު ޕޮޒިޓިވްވެފައިވާ އިރު، ރ. ކިނޮޅަހުން 53 އަހަރުގެ ފިރިހެނަކު ވަނީ ޕޮޒިޓިވްވެފައެވެ. ކ. ހިންމަފުށީ ރިހެބިލިޓޭޝަން ސެންޓަރުން 33 އަހަރުގެ ފިރިހެނަކާއި 34 އަހަރުގެ ފިރިހެނެއް ވެސް ކޮވިޑް-19 އަށް ޕޮޒިޓިވްވެފައިވެފައިވެއެވެ. ސ. ހިތަދޫ ކަރަންޓީން ފެސިލިޓީ އިން 24 އަހަރުގެ ދިވެހި ފިރިހެނަކުވެސް ވަނީ ކޮވިޑް-19 އަށް ޕޮޒިޓިވްވެފައެވެ.
ކަރަންޓީން ރިލީޒް ސާމްޕަލް ނަގަނީ އަތޮޅު ތެރޭގެ ރަށަކަށް ގޮސް 14 ދުވަހުގެ ކަރަންޓީންގެ މުއްދަތު ފުރިހަމަ ކުރުމަށްފަހުއެވެ.
އާދިއްތަ ދުވަހު އެކަނިވެސް ރާއްޖެ އިން 119 މީހުން ކޮވިޑް-19 އަށް ޕޮޒިޓިވްވެފައިވާއިރު ޕޮޒިޓިވްވި މީހުންގެ ތެރެއިން 100 މީހުންނަކީ ދިވެހިންނެވެ. މާލެ ސަރަހައްދުން ޕޮޒިޓިވްވެފައި ވަނީ 110 މީހުންނެވެ.
ރާއްޖެއިން ކޮވިޑް-19 އަށް ޕޮޒިޓިވްވި މީހުންގެ ޖުމްލަ އަދަދު ވަނީ މިހާރު 6779ށް އަރާފައެވެ.
