ސިއްހީ މަސައްކަތްތެރިން ވަރުބަލިވެއްޖެ
24 އޯގަސްޓު 2020 | ހޯމަ 02:22ޚާއްސަކޮށް ނަރުހުން ވަރަށް ބޮޑަށް ވަރުބަލިވެފައިވާ ކަމަށް ވިދާޅުވި
ޑރ. ނަޒްލާ މުސްތަފާ
ސިއްހީ ދާއިރާގައި މަސައްކަތް ކުރާ މުވައްޒަފުން ވަރަށް ބޮޑަށް ވަރުބަލިވެފައިވާ ކަމަށް ހެލްތް އިމަޖެންސީ އޮޕަރޭޝަން ސެންޓަރ (އެޗްއީއޯސީ) އިން ބުނެފިއެވެ.
ކޮވިޑް-19 އާ ގުޅޭ އެންމެ ފަހުގެ މައުލޫމާތު ހިއްސާކުރުމަށް އާދިއްތަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ޑރ. ނަޒްލާ މުސްތަފާ ވިދާޅުވީ ކެޕޭސިޓީ ވަރަށް ބޮޑަށް ފުލްވަމުންދާ ކަމަށާއި، އެކަމާއި ގުޅިގެން ޚާއްސަކޮށް ނަރުހުން ވަރަށް ބޮޑަށް ވަރުބަލިވެފައިވާ ކަމަށެވެ.
އަދި ބައެއް ނަރުހުންގެ ބަރުދަން ފަސް ކިލޯ މިހާރު ލުއިވެފައިވާ ކަމަށް ޑރ. ނަޒްލާ ވިދާޅުވިއެވެ.
ޑރ ނަޒްލާ ވިދާޅުވީ ކޮމްޕްލިކޭޓް ވަނީ ހަމައެކަނި ދުވަސްވީ މީހުން ކަމަށް ވިސްނައިގެން ނުވާނެ ކަމަށާއި ސިސްޓަމް އޯވަރލޯޑް ވެގެންދާ ވަރަކަށް ކޮވިޑާއި އަދި އެހެނިހެން ބަލިތަކަށް ފަރުވާ ދިނުމަށްވެސް ތިބީ އެއްބައެއް ކަމަށެވެ.
ރާއްޖެ އަލުން ލޮކްޑައުން އަކަށް ދިއުމާއި ގުޅޭގޮތުން ޑރ. ނަޒްލާ ވިދާޅުވީ ލޮކްޑައުން އަކީ ބަލީގެ ކެޕޭސިޓީ އިތުރުވާން ފެށުމުން ވަގުތުން އަޅާ ފިޔަވަޅެއް ކަމަށާއި، ލޮކްޑައުން އުވާލުމުން ދެވަނަ ނުވަތަ ތިން ވަނަ ސާރޖެއް އަންނަތަން ފެންނަމުންދާ ކަމަށެވެ.
ކޮވިޑާއި އެކީ އުޅޭނަމަ ސަލާމަތީ ރައްކައުތެރިކަން ވަރުގަދަކޮށްގެން ކުރިއަށްދާން ޖެހޭކަން ޑރ ފާހަގަ ކުރެއްވިއެވެ.
އެގޮތުން މާސްކް އެޅުމާއި، އަތް ދޮވުން އަދި އިޖުތިމާއި ގައި ދުރުކަން ބެހެއްޓުމަށް ސަމާލުކަން ދިނުމަށް އިލްތިމާސް ކުރެއްވިއެވެ.
ޑރ. ނަޒްލާ ވިދާޅުވީ ލޮކްޑައުންގެ ސަބަބުން އެކަމުގެ އަސަރުކުރަނީ ހަމައެކަނި ރާއްޖޭގެ އިގްތިސާދަށް ނޫން ކަމަށާއި، ސިއްޚީ ފަރުވާ ހޯދަން ޖެހޭ ފަރާތްތަކަށް ވެސް އެކަމުގެ އަސަރު ވަރަށް ބޮޑަށް ކޮށްފައިވާކަމަށެވެ.
އެގޮތުން ކެންސަރުފަދަ ބަލިތަކަށް ފަރުވާ ހޯދަމުންދާ ފަރާތްތައް ޑޮކްޓަރަށް ނުދެއްކި ލަސް ވުމުގެ ސަބަބުން ނުރައްކައުތެރި ހާލަތްތައް ދިމާވެފައިވާކަން ފާހަގަ ކުރެއްވިއެވެ.
މީގެ އިތުރުންވެސް ލޮކްޑައުންގެ ސަބަބުން ނަފްސާނީ ދުޅަހެޔޮ ކަމަށްވެސް ވަރަށް ބޮޑެތި އަސަރުތަކެއް ކުރަމުންދާކަމަށް ޑރ ނަޒްލާ ފާހަގަ ކުރެއްވިއެވެ.
ކޮވިޑް-19 ޖެހޭ މީހުންގެ އަދަދު މަދު ކުރުމަށް އެންމެންގެ އެއްބާރުލުން ބޭނުންވާ ކަމަށް ޑރ. ނަޒްލާ ވިދާޅުވިއެވެ.
