ކޮވިޑް-19 އާއި ގުޅިގެން ހެލްތު މިނިސްޓްރީން ކުރި ޚަރަދުތަކާއި ގުޅިގެން އޮޑިޓަރ ޖެނެރަލްގެ އޮފީހުން އާންމު ކުރި، ހެލްތު މިނިސްޓްރީގެ އޮޑިޓް ރިޕޯޓުގައި ފާހަގަކޮށްފައިވާ މައްސަލަތައް ބަލާއި ދިރާސާކުރުމަށް ހެލްތު މިނިސްޓަރު އަބްދުﷲ އަމީނާއި، ހެލްތު މިނިސްޓްރީގެ ބިޑް ކޮމިޓީގެ މެމްބަރުން ރައްޔިތުންގެ މަޖިލީހުގެ މާލިއްޔަތު ކޮމިޓީއަށް ހާޒިރު ކުރަން ނިންމައިފިއެވެ.

މާލިއްޔަތު ކޮމިޓީގެ މުގައްރިރު މުހައްމަދު ނާޝިޒު "ރާއްޖެ އެމްވީ" އަށް މައުލޫމާތު ދެއްވަމުން ވިދާޅުވީ އޮޑިޓް ރިޕޯޓްގައި ފާހަގަކޮށްފައިވާ ކަންތައްތަކާއި ގުޅޭގޮތުން މަޝްވަރާކުރުމަށް ހެލްތު މިނިސްޓަރ އަބްދުﷲ އަމީން އާއި ބިޑް ކޮމިޓީގެ މެމްބަރުން ކޮމިޓީއަށް ހާޒިރުކުރުމަށް ނިންމާފައިވާ ކަމަށެވެ. މިކޮމިޓީގެ ބައްދަލުވުން އޮންނާނީ ހޯމަ ދުވަހުގެ ހެނދުނު 11:00 ގައެވެ.

ކޮމިޓީ ބައްދަލުވުމަށް ހާޒިރުވުމަށް ހެލްތު މިނިސްޓްރީއަށް މަޖިލީހުގެ އިދާރާއިން ދަންނަވާފައިވާ ދެންނެވުމަށް ހެލްތު މިނިސްޓްރީން މަޖިލީހުގެ އިދާރާއަށް ފޮނުއްވާފައިވާ ސިޓީގައި ކޮމިޓީ ބައްދަލުވުމަށް ހެލްތު މިނިސްޓަރ އަބްދުﷲ އަމީންގެ އިތުރުން މިނިސްޓްރީގެ 10 ބޭފުޅަކު ހާޒިރުވާނެކަމަށް ވަނީ ބުނެފައެވެ.

އޭގެތެރޭގައި ހިމެނެނީ ޑެޕިޔުޓީ މިނިސްޓަރ ކަމުގައި ތިއްބެވި އަބޫބަކުރު އަބްދުލްކަރީމް އާއި ނިޝާމާ މުހައްމަދު އެވެ. އަދި ޕާރމަނަންޓް ސެކެޓްރީ އައިޝަތު ސާމިޔާ، ޑެޕިޔުޓީ ޑިރެކްޓަރ ޖެނެރަލް އަހުމަދު ޤާސިމް އާއި ތަސްލީމާ އެވެ. އަދި ލީގަލް އޮފިސަރުންގެ މަގާމުގައި ތިއްބެވި އަލީ ޝިހާމް އާއި އަހުމަދު އަސްލަމް އާއި ފައިނޭންޝަލް އެގްޒެކެޓިވް ޑިރެކްޓަރ އަހުމަދު އަސްލަމްވެސް ކޮމިޓީއަށް ހާޒިރުވާނެކަމަށް ސިޓީގައި ބުނެފައިވެއެވެ. އަދި އެސިސްޓެންޓް ޑިރެކްޓަރ ފާތުމަތު ލިމްޔާ އާއި އެސިސްޓެންޓް ބަޔޯމެޑިކަލް އިންޖިނިއަރ ހާޝިމް އަބޫބަކުރުވެސް ކޮމިޓީއަށް ހާޒިރުވާ ބޭފުޅުންގެ ތެރޭގައި ހިމެނެއެވެ.

އޮޑިޓް ރިޕޯޓާއި ގުޅިގެން ހެލްތު މިނިސްޓްރީގެ ބިޑް ކޮމިޓީ އާއި އެ މިނިސްޓްރީގެ ފައިނޭންޝަލް އެގްޒެކެޓިވްސް އަދި ވެންޓިލޭޓަރުތައް ގެނައުމާ ގުޅޭ އެއްބަސްވުންތަކުގައި ސޮއިކުރެއްވި ވެރިން ވަނީ ސަސްޕެންޑްކޮށްފަ އެވެ. އަދި ހެލްތު މިނިސްޓަރ ވަނީ މިމައްސަލަ ބަލާ ނިމެންދެން އަމިއްލައަށް މަސައްކަތުން އެކަހެރިވެވަޑައިގަންފައެވެ.

ހެލްތު މިނިސްޓްރީގެ އޮޑިޓު ރިޕޯޓުން ކޮވިޑާ ގުޅިގެން ރާއްޖެ އަށް ބޭނުންވާ 75 ވެންޓިލޭޓަރެއް ގެންނަން ދުބާއީގެ އެގްޒެކިއުޓާސް ޖެނެރަލް ޓްރޭޑިންއާ ހަވާލުކުރުމުގައި ބޮޑެތި އޮޅުވައިލުންތަކާއި ޖަރީމާތަކެއް ހިންގާފައިވާ ކަމަށް ތުހުމަތު ކުރެވޭ މައްސަލަ ވަނީ ފެންމަތިވެފައެވެ. އެ ކުންފުންޏާ އެކަން ހަވާލުކުރީ ދުނިޔޭގެ ސިއްހަތު ޖަމިއްޔާ، ޑަބްލިއުއެޗްއޯ މެދުވެރިކޮށް ކަމަށް ހެލްތު މިނިސްޓްރީން އެންމެ ކުރިއްސުރެ ބުނަމުން އައި ވާހަކަތައް ވެސް އޮޑިޓަ ޖެނެރަލް ހަސަން ޒިޔަތު ނެރުއްވި ރިޕޯޓުގައި ވަނީ ދޮގުކޮށްފަ އެވެ.

ދުބާއީގެ އެގްޒެކިއުޓާސް ޖެނެރަލް ޓްރޭޑިންއަކީ، ވެންޓިލޭޓަރު ގެންނަން ހަވާލުކުރި ތިން ކުންފުނީގެ ތެރެއިން ސަރުކާރުން އެޑްވާންސްކޮށް ފައިސާ ދޫކުރި ހަމައެކަނި ކުންފުނި ވެސް މެ އެވެ. އެ މީހުން ވެންޓިލޭޓަރެއް ގެނެސްދެނީ 32،500 ޑޮލަރަށެވެ. އެ ކުންފުންޏާ މަސައްކަތް ހަވާލުކުރީ 34 މިލިއަން ރުފިޔާ އަށް ކަމަށް ވާއިރު އަގުގެ 90 ޕަސެންޓަށްވާ 30.9 މިލިއަން ރުފިޔާ ސަރުކާރުން ވަނީ ދައްކާފައެވެ.