ޓެރިފް ފޮތުގައި ހުރި ޗާޖުތައް ނޫން އެހެން ޗާޖުތަކެއް ނުނަގާނެ: ޝާހިދު އަލީ
އެމްޕީއެލް އިން ނަގާ ޗާޖުތައް ޓެރިފް ފޮތެއްގައި އާންމުކޮށް ޕަބްލިޝް ކޮށްފައިވާނެ
އެމްޕީއެލްގެ މެނޭޖިންގް ޑިރެކްޓަރ ޝާހިދު އަލީ
ޓެރިފް ފޮތުގައި ހުރި ޗާޖުތައް ނޫން އެހެން ޗާޖުތައް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ނުނަގާނެ ކަމަށް އެ ކުންފުނީގެ މެނޭޖިން ޑިރެކްޓަރު، ޝާހިދު އަލީ ވިދާޅުވެއްޖެއެވެ.
ރާއްޖެޓީވީގެ ފަށާއިރު ޕްރޮގްރާމް ގައި ވާހަކަ ދައްކަވަމުން ޝާހިދު ވިދާޅުވީ، އެމްޕީއެލް އިން ނަގާ ޗާޖުތައް ޓެރިފް ފޮތެއްގައި އާންމުކޮށް ޕަބްލިޝް ކޮށްފައިވާނެ ކަމަށާއި އެ ފޮތުގައި ނަގާނެ ކަމަށް ބަޔާން ކޮށްފައިވާ ޗާޖުތައް ފިޔަވައި އިތުރު އެއްވެސް ޗާޖެއް އެމްޕީއެލް އިން ނުނަގާނެ ކަމަށެވެ. އަދި ޗާޖެއް ނަގާނަމަ، ވަރަށް ސާފުކޮށް އެ ޗާޖު ނަގަނީ ކޮންބައެއްގެ އަތުން ކަމާއި، ކޮންކަމާ ގުޅިގެންކަން ވެސް އެ ފޮތުން އެނގެން އޮންނާނެ ކަމަށް ޝާހިދު ވިދާޅުވި އެވެ.
ޝާހިދު ވަނީ އެ ފޮތް އެމްޕީއެލްގެ ވެބްސައިޓުން ވެސް ފެންނާނެ ކަމަށާއި އެ ފޮތުގައި އެމްޕީއެލް އިން ނަގާނެ ޗާޖުތައް ވަރަށް ސާފުކޮށް އިނގެން ހުންނާނެ ކަމަށް ފާހަގަ ކުރައްވާފައެވެ.
ޝާހިދު ވަނީ އެޑިޝަނަލް ޕޯޓްސް ރިކަވަރީ، އިކުއިޕްމަންޓް އިމްބެލެންސް ރިކަވަރީ އަދި އޮޕަރޭޝަން ޕޯސްޓް ރިކަވަރީ ފަދަ ޓެރިފް ތަކަކީ ޕޯޓުގެ ތެރެއިން ހިނގާ ހަރަދުތަކަށް ނަގާ ފީތަކެއް ނަމަވެސް އެއީ އެމްޕީއެލް އިން އެކުންފުންޏަށް ނަގާ ފީތަކެއް ނޫން ކަމަށް ވެސް ވިދާޅުވެފައެވެ.
ޝާހިދު މިހެން ވިދާޅުވެފައި މިވަނީ މިފަދަ ނަން ނަމުގައި ބޮޑެތި ފީތައް ނަގަމުން އަންނަ ކަމުގެ ޝަކުވާ ވިޔަފާރިވެރިން ކުރަމުންދާ ދަނޑިވަޅެއްގައެވެ.
