އިންޑިއާއިން 3 މިލިއަން މީހުންނަށް ކޮވިޑް ޖެހިއްޖެ

އަވައްޓެރި އިންޑިއާއިން ކޮވިޑް-19 އަށް ޕޮޒިޓިވްވި މީހުންގެ އަދަދު 3 މިލިއަނަށް އަރައިފިއެވެ.

ޖޯންސް ހޮޕްކިންސް ޔުނިވަރސިޓީގެ އެންމެ ފަހުގެ އަދަދުތައް ދައްކާގޮތުން ފާއިތުވި 24 ގަޑިއިރު ތެރޭގައިވެސް އިންޑިއާއިން ވަނީ ރެކޯޑް އަދަދަކަށް މީހުން ޕޮޒިޓިވްވެފައެވެ. އެގޮތުން 69،800ށް ވުރެ ގިނަ މީހުން ޕޮޒިޓިވް ވެފައިވާއިރު، ހޮނިހިރު ދުވަހު ވަނީ އިންޑިއާއިން ޕޮޒިޓިވްވި މީހުންގެ ޖުމުލަ އަދަދު 3 މިލިއަނަށް އަރާފައެވެ.

ރިޕޯޓްތައް ބުނާގޮތުން އިންޑިއާގައި ޕޮޒިޓިވްވި މީހުންގެ އަދަދުތައް ކުއްލި ގޮތަކަށް މައްޗަށް ގޮސްފައިވަނީ އެ ޤައުމުގައި ކޮންމެ އަހަރަކުވެސް ފާހަގަކުރާ ދީނީ ހަރަކާތެއް ކަމަށްވާ "ގަނޭޝް ޗަތުރްތީ" ފާހަގަ ކުރުމަށް ގިނަ އަދަދެއްގެ ބަޔަކު އެއްތަނަކަށް އެއްވަމުންދާތީއެވެ.

އިންޑިއާގައި ކޮވިޑް ޖެހުނު މީހުންގެ އަދަދު ތިން މިލިއަނަށް އަރާފައިވާއިރު، އެގައުމަކީ ދުނިޔޭގައި ތިން ވަނައަށް އެންމެ ގިނަ ކޭސް ރިޕޯޓުކޮށްފައިވާ ގައުމެވެ. އެގޮތުން އެންމެ ގިނައިން ކޮވިޑް-19ގެ ކޭސްތައް ފެނިފައިވަނީ އެމެރިކާއިންނެވެ. އަދި ދެވަނަ އަށް އެންމެ ގިނައިން ކޮވިޑް-19 ގެ ކޭސްތައް ފެނިފައިވަނީ ބްރެޒިލް އިންނެވެ.

އޭގެ އިތުރުން، އިންޑިއާއިން މަރުވި މީހުންގެ އަދަދުވެސް ބައިލައްކައަށްވުރެ އިތުރުވެފައިވާއިރު، މަރުވި މީހުންގެ ޖުމުލަ އަދަދު އުޅެނީ 56،209 ގައެވެ. އިންޑިއާއިން ކޮވިޑް-19 ޖެހިގެން މަރުވި މީހުންގެ އަދަދު ބައިލައްކައަށް އަރާފައިވަނީވެސް މިހިނގާ އޯގަސްޓް މަހުގެ ތެރޭގައެވެ.

އިންޑިއާގައި ކޮވިޑް-19 ޖެހުނު މީހުންގެ ޖުމުލަ ނިސްބަތަށް ބަލާއިރު، އެހެން ޤައުމުތަކަށްވުރެ އިންޑިއާގައި މަރުވި މީހުންގެ ނިސްބަތް ދަށްކަމަށް ރިޕޯޓްތައް ބުނެއެވެ. އަދި އޭގެން ދޭހަވަނީ އިންޑިއާގައި ކޮވިޑް-19 ޖެހިގެން މަރުވާ މީހުންގެ އަދަދުތައް އެހެން ޤައުމުތަކާ އަޅާބަލާއިރު، ރަނގަޅަށް ކޮންޓްރޯލް ކުރެވޭކަން ކަމަށް ބޭރުގެ ނޫސްތަކުން ރިޕޯޓް ކޮށްފައިވެއެވެ.

އޭގެ އިތުރުން، އެހެން ޤައުމުތަކާ އަޅާބަލާއިރު، މަރުވި މީހުންގެ އަދަދު ބައިލައްކައަށް އަރަން ހޭދަވި މުއްދަތުވެސް އިންޑިއާގައި ގިނަ ކަމަށް ރިޕޯޓްތައް ބުނެއެވެ