މަނާ ގަޑީގައި ބޭރުގައި އުޅުނު 387 މީހަކު މިދިޔަ ހަފްތާގައި ޖޫރިމަނާކޮށްފައިވޭ، އެއީ 387،000 ރުފިޔާ!
22 އޯގަސްޓު 2020 | ހޮނިހިރު 16:10ރޭގަނޑު 10ން ފެށިގެން ފަތިހު 5 ޖެހުމާ ހަމައަށް ބޭރުގައި އުޅުން ވަނީ މަނާކޮށްފައި
ފުލުހުން މަގުމަތި ބަލަހައްޓަނީ
ކާފިއު އިއުލާންކޮށްފައިވާ ވަގުތުގައި ބޭރުގައި އުޅުނު 387 މީހަކު މިދިޔަ ހަފްތާގައި ޖޫރިމަނާކޮށްފައިވާކަމަށް މޯލްޑިވްސް ޕޮލިސް ސާވިސްއިން ބުނެފިއެވެ.
ކޮވިޑް-19 ފެތުރުން ކޮންޓްރޯލްކުރުމަށް އަޅާ ފިޔަވަޅުތަކުގެ ތެރެެއިން ކޮންމެ ރެޔެއްގެ 10:00 އިން، ފަތިހު 5:00 އަށް ބޭރުގައި އުޅުމަކި މަނާ ކަމެކެވެ. އަދި އެވަގުތުގައި ބޭރުގައި އުޅޭ ފަރާތްތައް 1000 ރުފިޔާއިން ޖޫރިމަނާ ކުރުމަށް ނިންމާފައިވެއެވެ.
ފުލުހުން ހޮނިހިރު ދުވަހު ކުރި ޓްވީޓެއްގައި ބުނީ މި މަހުގެ 15 ވަނަ ދުވަހުން ފެށިގެން 21 ވަނަ ދުވަހުގެ ނިޔަލަށް މަނާ ގަޑީގައި ބޭރުގައި އުޅުނު 899 މީހަކަށް ނަސޭހަތްދީ 387 މީހަކު ޖޫރިމަނާ ކޮށްފައިވާ ކަމަށެވެ. އަދި ކޮވިޑާއި އެކު އެޅިފިޔަވަޅުތަކަށް ހުރިހާ އެންމެން ވެސް ބޯލެނބުމަށް ފުލުހުން ވަނީ ގޮވާލާފައެވެ.
ކާފިއު އިއުލާންކުރުމުގެ އިތުރުން ކޮވިޑް-19 އާއި ގުޅިގެން މާސްކުއެޅުން މަޖުބޫރު ކޮށްފައިވާއިރު އެކަމުން އިސްތިސްނާ ވަނީ ދެ އަހަރުން ދަށުގެ ކުޑަކުދިންނާއި، ކަސްރަތުކުރަން ނުކުންނަ މީހުން ކަސްރަތުކުރާ ވަގުތުގައެވެ. މީގެ އިތުރުން އެހެން މީހެއްގެ އެހީގައި މާސްކު އަޅާ މީހުންނާއި ރެސްޓޯރެންޓްތަކުން ޚިދުމަތް ހޯދަން މީހުން މާސްކު އެޅުމުން އިސްތިސްނާވެއެވެ. އެ ނޫން ފަރާތްތައް މާސްކް ނާޅާ މަގުމަތީގައި އުޅޭނަމަ، ކޮންމެ މީހަކު 1000 ރުފިޔާއިން ޖޫރިމަނާކުރުމަށް ނިންމާފައިވެއެވެ.
