ޔާމީން ވަގުތުން ވަގުތަށް މިނިވަންކޮށްދީ، ނޫންނަމަ އިމްރާނުުގެ އިތުބާރު ނެތް ކަމުގެ މައްސަލަ ވައްދާނަން
ޔާމީންގެ އާއިލާއިންވެސް ވަނީ މީގެ ކުރިން ބަޔާނެއް ނެރެފައި
ޑީއާރްޕީގެ ލީޑަރު އަދި ކާށިދޫ ދާއިރާގެ މެމްބަރު އަބްދުﷲ ޖާބިރު
މަނީ ލޯންޑަރިންގެ ކުށް ސާބިތުވެ ފަސް އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީން، މިހާރުން މިހާރަށް މިނިވަން ކުރަން ދިވެހި ރައްޔިތުންގެ ޕާޓީ (ޑީއާރްޕީ) އިން ގޮވާލައިފިއެވެ.
ޑީއާރްޕީގެ ޓްވިޓާ އެކައުންޓަކުން ކޮށްފައިވާ ޓްވީޓެއްގައި ބުނީ، ޖަލުގައި ތިބި ގައިދީންނަށް އެއް ހަމަޔަކުން އަމަލު ކުރަން ޖެހޭއިރު ޔާމީނަށް ގާނޫނީ ވަކީލުންނާއި ބައްދަލުކުރުމުގެ ފުރުސަތު ނުދެއްވާ ބެހެއްޓުމުން ހޯމް މިނިސްޓަރު އިމްރާން އަބްދުﷲ ގެ އިތުބާރު ގެއްލިފައިވާ ކަމަށެވެ.
ޑީއާރްޕީން ވަނީ، ސުޕްރީމް ކޯޓުން ގޮތެއް ނިންމަންދެން ރައީސް ޔާމީން ވަގުތުން ވަގުތަށް މިނިވަން ކުރަން ގޮވާލާފައެވެ. އެހެން ނޫނީ ހޯމަ ދުވަހު އޮންނަ ރައްޔިތުންގެ މަޖިލީހުގެ ޖަލްސާއަށް މިނިސްޓަރު އިމްރާންގެ އިތުބާރު ނެތް ކަމުގެ މައްސަލަ މަޖިލީހަށް ވައްދާނެ ކަމަށް ކާށީދޫ ދާއިރާގެ މެމްބަރު އަބްދުﷲ ޖާބިރު ލީޑަރުކަން ކުރައްވާ ޑީއާރްޕީން ބުނެއެވެ.
ޔާމީން މިނިވަން ކުރަން ޑީއާރްޕީން ގޮވާލާފައިމިވަނީ، އެ ޕާޓީއާ އިދިކޮޅު ޕީޕީއެމް/ޕީއެންސީއާއެކު ގުޅިގެން މަސައްކަތް ކުރަން ނިންމި ނިންމުމާއި އެކުއެވެ. ޔާމީންއާ މެދު މި ސަރުކާރުން އަމަލުކުރަމުންދާ ގޮތާއި މެދު ކަންބޮޑުވާ ކަމަށް އެމަނިކުފާނުގެ އާއިލާއިން ވެސް ވަނީ ބުނެފައެވެ.
އެގޮތުން ވަކީލުންނަށް ބައްދަލުކުރެވޭނީ އެޗްޕީއޭގެ އަދި ކަރެކްޝަންސްގެ ހުއްދަ ނަގައިގެން ކަމަށް ބުނާ ބުނުމަކީ އެމަނިކުފާނާ މެދު އަނިޔާވެރިވުން ކަމަށް އާއިލާއިން ނެރުނު ބަޔާނުގައި ބުންޏެވެ. ރައީސް ޔާމީންގެ އާއިލާއިން ނެރުނު ބަޔާނުގައި ހޯމް މިނިސްޓަރު އިމްރާން އަށް ވަނީ ރައްދު ދެއްވާފައެވެ. ވަކީލުންގެ ހައްގާއި ބޭސްފަރުވާ ހޯދުމުގެ ހައްގު ފަދަ ގާނޫނު އަސާސީން ކަށަވަރުކޮށްދީފައިވާ އަސާސީ ހައްގުތަކަކީ ކުޅޭކުޅޭ ކުޅިވަރެއްގެ ގޮތުގައި ސިފަވާ ގޮތަށް ހޯމް މިނިސްޓަރ އިމްރާން އަބްދުﷲ އެކިފަހަރުމަތިން ވާހަކަދެއްކުމަކީ އާއިލާއިން ކުށްވެރިކުރާ ދަށު ދަރަޖައިގެ އަމަލެއް ކަމަށް އާއިލާގެ ބަޔާނުގައި ބުންޏެވެ.
ރާއްޖެ ޓީވީގައި ވާހަކަ ދައްކަވަމުން އިމްރާނު ވިދާޅުވެފައިވަނީ މި ސަރުކާރުން ޔާމީންއާ ދޭތެރޭ ކަންތައް ކުރަނީ އެމަނިކުފާނުގެ ސަރުކާރުން ޖަލަށްލާފައި ތިބި ސިޔާސީ ކުށްވެރިންނާ މެދު ކަންތައް ކުރިގޮތަށްވުރެ ރަނގަޅަށް ކަމަށެވެ.
