ސަރަޙައްދީ ބަނދަރުތަކަށް އެތެރެކުރާ ތަކެތިން ޑިއުޓީ މާފުކުރުމުގައި ޢަމަލުކުރާނެ ގޮތުގެ ގަވާއިދު އެކުލަވާލައިފި
އިސްތިސްނާވާ މުދަލުގެ ތެރޭގައި ދުންފަތް ހިމެނޭ
މާލޭގެ ވިޔަފާރި ބަނދަރުގައި، މޯލްޑިވްސް ސްޓޭޓް ޝިޕިންގެ އެމްވީ އައިބީރިއަން މަގަތުފާލަމުގައި އަޅާފަ
މާލެ ސަރަޙައްދު ފިޔަވައި، ދިވެހިރާއްޖޭގެ ސަރަޙައްދީ ބަނދަރުތަކަށް އެތެރެކުރާ ތަކެތިން އިމްޕޯޓް ޑިއުޓީ މާފުކުރުމުގައި ޢަމަލުކުރާނެ ގޮތުގެ ގަވާއިދު ދިވެހި ސަރުކާރުގެ ގެޒެޓުގައިޝާއިއުކޮށްފިއެވެ.
މި ގަވާއިދުގައި ވާގޮތުން މާލެ ސަރަޙައްދު ފިޔަވައި، މޯލްޑިވްސް ކަސްޓަމްސް ސަރވިސްގެ އޮފީސް ޤާއިމުކުރެވި، މުދާ ބަލައި ފާސްކޮށް ކްލިއަރކުރުމުގެ އިންތިޒާމު ހަމަޖެހިފައިވަނީ ފަސް ބަނދަރެއްގައެވެ. އެއީ ހދ. ކުޅުދުއްފުށީ ސަރަޙައްދީ ބަނދަރާއި ސ. ހިތަދޫ ސަރަޙައްދީ ބަނދަރާއި ހދ. ހަނިމާދޫ އިންޓަރނޭޝަނަލް އެއަރޕޯޓުގެ އިތުރުން ސ. ގަން އިންޓަރނޭޝަނަލް އެއަރޕޯޓާއި މާފަރު އިންޓަރނޭޝަނަލް އެއަރޕޯޓުގައެވެ.
ކަސްޓަމްސް އިން ބުނީ މި ގަވާއިދުގެ ދަށުން އިމްޕޯޓް ޑިއުޓީ މާފުކުރެވޭނީ ސަރަހައްދީ ބަނދަރު ނިސްބަތްވާ ރަށެއްގައި (ނުވަތަ އެރަށަކާއި ގުޅިފައިވާ ރަށެއްގައި) ގުދަން ކުރެވޭ ނުވަތަ އެރަށުގެ ލޯކަލް ބަނދަރުން ބޭރުކުރެވޭ ތަކެތިން ކަމަށެވެ. އަދި އައުޓަރ އެންކަރޭޖްގައި ބާއްވައިގެން ބަނދަރުގެ ބައިއެރިވުމެއް ނެތި ބާލާ ތަކެއްޗަށް އިމްޕޯޓް ޑިއުޓީ މަޢާފުކުރެވޭނީ، އެތަކެތި އެ ސަރަހައްދީ ބަނދަރަކަށް ބާލާ ކްލިއަރކުރާނަމަ ކަމަށް ވެސް މި ގަވާއިދުގައި ވެއެވެ.
މީގެ އިތުރުން މުދަލުގެ ފައިނަލް ޑެސްޓިނޭޝަން ބަނދަރަކީ މި ގަވާޢިދުގައި ބަޔާންކޮށްފައިވާ ބަނދަރެއްކަމުގައި ކާގޯ މެނިފެސްޓުގައި ބަޔާންކުރެވިފައި އޮތުމާއި ސަރަހައްދީ ބަނދަރުތަކުން އެތެރެކުރާ މުދާކަމުގައި ބަލާނީ އެ ބަނދަރަށް ކަސްޓަމްސްއިން ކަނޑައަޅާފައިވާ އޮފީސް ކޯޑަށް ޑިކްލަރޭޝަން ނިންމާ، އެބަނދަރުތަކުގައި ހުންނަ ކަސްޓަމްސް އޮފީހުން ބަލައިފާސްކޮށް ކްލިއަރކުރާ މުދަލުންވެސް ޑިއުޓީ މާފްކުރެވޭނެ ކަމަށެވެ.
އިސްތިސްނާވާ މުދަލުގެ ތެރޭގައި ދުންފަތާއި، ދުންފަތުން ތައްޔާރުކޮށްފައި ހުންނަ ބާވަތްތަކާއި، ދުންފަތުގެ ބަދަލުގައި ބޭނުންކުރާ ބާވަތްތަކުގެ އިތުރުން އިލެކްޓްރޯނިކް ސިނގިރޭޓް އަދި މިފަދަ ވޭޕްކުރުމަށް ބޭނުންކުރާ އާލާތްތަކާއި އޭގެ ބައިބައެވެ. އަދި ބަނގުރަލާއި ބަނގުރާ އެކުލެވޭ ބާވަތްތަކާއި އޫރުމަހާއި، އޫރުމަސް އެކުލެވޭ ބާވަތްތައްވެސް ހިމެނެއެވެ.
