ލަންކާއަށް ބޭރު ގައުމުތަކުގެ މަސް އެތެރެކުރުން ހުއްޓާލަނީ
21 އޯގަސްޓު 2020 | ހުކުރު 09:14މަސްވެރިކަމުގެ ދާއިރާއަށް ބޮޑު ކުރިއެރުމެއް ގެނައުމަށް މަސައްކަތް ކުރައްވާނެކަމަށް ރާޖަޕަކްސަ ވިދާޅުވި
ސްރީލަންކާގެ ރައީސް ގޮތަބާޔާ ރާޖަޕަކްސަ ޕާލަމަންޓްގައި ވާހަކަދައްކަވަނީ
ސްރީލަންކާގެ ވިޔަފާރިތައް ހިމާޔަތްކޮށް އިގްތިޞާދު ރަނގަޅުކުރުމަށް މިހާރުގެ ސަރުކާރުން އަޅަމުން ގެންދާ ފިޔަވަޅުތަކުގެ ތެރެއިން އެގައުމަށް އެހެން ގައުމުތަކުން މަސް އެތެރެކުރުން ހުއްޓާލަންޖެހޭ ކަމަށް އެގައުމުގެ ރައީސް ގޮތަބާޔާ ރާޖަޕަކްސަ ވިދާޅުވެއްޖެއެވެ.
މިހާރުވެސް އެގައުމުގައި ވަނީ ގައުމަށް އެތެރެކުރާ މުދާ ކޮންޓްރޯލްކޮށް، ދަނޑުވެރިންގެ ވިޔަފާރިތައް ހިމާޔަތްކުރުމަށް ފިޔަވަޅުތައް އަޅާފައެވެ. އަދި އެގައުމަށް އެތެރެކުރާ މުދާ ބޭރުކުރުންވެސް ވަނީ މަނާކޮށްފައެވެ.
ދާދިފަހުން އެގައުމުގައި ބޭއްވި އާންމު އިންތިޚާބު ކާމިޔާބުކުރެއްވުމަށްފަހު މަގާމާއި ހަވާލުވެވަޑައިގެންފަހުން ޕާލަމަންޓްގައި ބޭއްވި ފުރަތަމަ ބައްދަލުވުމުގައި ވާހަކަދައްކަވަމުން ރާޖަޕަކްސަ ވިދާޅުވީ މަގާމާ ހަވާލުވުމަށްފަހު ގައުމަށް އެތެރެކުރާ މުދަލުގައި ކޮންޓްރޯލްތަކެއް ގެންގުޅުމުގެ ސިޔާސަތުތަކެއް ތަންފީޒުކުރަން ފަށާފައިވަނީ އެގައުމުގެ ވިޔަފާރިތަކާއި ވިޔަފާރިވެރިން ހިމާޔަތްކުރުމަށް ކަމަށެވެ.
"އަހަރުމެން މިވަނީ ދަނޑުވެރިންގެ ވިޔަފާރިތައް ހިމާޔަތްކުރުމަށް ގައުމުގައި ހެއްދޭ ކާބޯތަކެތި އެތެރެކުރުން މަނާކޮށްފައި. އަދި ގައުމުން ބޭރުކުރެވޭ ގޮތަށް އުފެއްދުމަށް ގައުމަށް އެތެރެކުރާ މުދާ އެތެރެކުރުންވެސް މިވަނީ މަނާކޮށްފައި." ރާޖަޕަކްސަ ވިދާޅުވިއެވެ.
މީގެއިތުރުން ވިޔަފާރިވެރިންނަށް އިންޓްރެސްޓް ރޭޓް ކުޑަކޮށްދީ ޓެކްސްތައް ކަނޑާލާނެ ކަމަށާއި ދަނޑުހައްދާ މީހުންނަށް ދަނޑުހެއްދުމަށް ބޭނުންވާ ގަސްކާނާ ހިލޭދޭނެކަމަށްވެސް ރާޖަޕަކްސަ ވިދާޅުވިއެވެ. އަދި އެމީހުންގެ ވިޔަފާރިތަކަށް ފައިދާވާނެ ކަން ޔަގީންވާފަދަ ބަދަލުތަކެއް ގެންނަވާނެކަމަށް ރާޖަޕަކްސަ ވިދާޅުވިއެވެ.
މީގެއިތުރުން މަސްވެރިކަމުގެ ދާއިރާއަށްވެސް ބޮޑު ކުރިއެރުމެއް ގެނައުމަށް މަސައްކަތް ކުރައްވާނެކަމަށް ރާޖަޕަކްސަ ވިދާޅުވިއެވެ.
" ސްރީލަންކާ އަށް މަސް އެތެރެކުރުން ހުއްޓާލަންޖެހޭ. އަހަރުމެންގެ ގައުމަކީ ވަށައިގެން ކަނޑު އޮތް ގައުމެއް. މީގެއިތުރުން ގަވާއިދާ ޚިލާފަށް އަހަރުމެންގެ ކަނޑުގެ ސަރަހައްދަށް ވަންނަ މަސް ބޯޓުތައް އެތެރެވޭ އެތެރުވުން ބާރުގެ ބޭނުންކޮށްގެން ހުއްޓުވާނަން " ރާޖަޕަކްސަ ވިދާޅުވިއެވެ.
ރާޖަޕަކްސަ ވިދާޅުވީ ދަނޑުވެރިންނާއި މަސްވެރިންނަށް ޓެކްނޮލޮޖީގެ އައު ކަންތައްތައް ތަޢާރަފްކުރައްވާނެ ކަމަށާއި މަސްވެރިކަމުގެ ބަނދަރުތައް ހައްދަވާނެކަމަށެވެ.
ސްރީލަންކާގެ ގިނަ އިންޑަސްޓްރީތަކަށް ވަނީ މިއިން ދުވަހަކު ކުރިމަތިނުވާ ވަރުގެ ގެއްލުންތައް ކުރިމަތިވެފައެވެ. އެއާއެކު އެގައުމުގެ އުފެއްދުންތެރިކަން އިތުރުކުރުމަށް ލަންކާ ސަރުކާރުން އަންނަނީ މަސައްކަތްކުރަމުންނެވެ.
ލަންކާއަށް އެތެރެކުރާ މުދާ ކޮންޓްރޯލްކުރުމަށް މިގެނައި ހަރުކަށި ބަދަލުތަކަކީ 1971 ވަނަ އަހަރު އެގައުމަށް ކުރިމަތިވި އިގްތިޞާދީ އަޑިގަނޑަށްފަހު އެންމެ ބޮޑަށް އެގައުމަށް އެތެރެކުރާ މުދާ ކޮންޓްރޯލްކުރުމަށް އަޅަމުންދާ ފިޔަވަޅުތަކެވެ.
ސްރީލަންކާއަށް އެތެރެކުރާ މުދާ މަސްވެސް ހިމެނޭގޮތަށް ކޮންޓްރޯލްކުރައްވާނެ ކަމަށް އެގައުމުގެ ރައީސް ވިދާޅުވެފައި މިވަނީ ރާއްޖޭގެ މަސްވެރިން ބާނަ މަސް ސީދާ ލަންކާގެ ބާޒާރަށް ވިއްކޭނެ ގޮތް ހަމަޖެހިގެން ދިޔުމަކީ ދިވެހި ސަރުކާރުގެ އުއްމީދެއް ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވިތާ އެއްދުވަސް ފަހުންނެވެ.
ސްރީލަންކާ - މޯލްޑިވްސް ބިޒްނަސް ކައުންސިލްގެ 12 ވަނަ އަހަރީ ބައްދަލުވުމުގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ، ރާއްޖޭ މަސްވެެރިން ބާނާ މަސް ސީދާ ލަންކާގެ ބާޒާރަށް ވިއްކޭނެ ގޮތް ހަމަޖެހުމަކީ އެމްޑީޕީ އަދި މި ސަރުކާރުގެ ވިސްނުމެއް ކަމަށެެވެ. އަދި ހަމަ އެފަދައިން ލަންކާގެ މަސްވެރިން ބާނަ މަސް ރާއްޖެއަށް ވިއްކޭ ގޮތަށް އިންތިޒާމް ހަމަޖެހިގެން ދިޔުން މުހިއްމު ކަމަށް ވިދާޅުވެފައި ވެއެވެ.
