ވެންޓިލޭޓަރު ގަތުގައި ހެލްތް މިނިސްޓްރީގެ ބިޑު ކޮމެޓީގެ އެންމެ އިސްފަރާތެއްގެ ހައިސިއްޔަތުން އަމަލުކޮށްފައިވާނީ ހެޔޮ ނިޔަތުގައި ކަމަށް ހެލްތް މިނިސްޓަރުގެ ނައިބު ނިޝާމާ މުހައްމަދު ވިދާޅުވެއްޖެ އެވެ.

ބުރާސްފަތި ދުވަހު ނިޝާމާ ނެރުއްވި ނޫސްބަޔާނެއްގައި ވިދާޅުވެފައިވަނީ، ކޮވިޑް-19 އާ ގުޅިގެން ދިވެހިރާއްޖެއަށް ބޭނުންވާ ވެންޓިލޭޓަރުތައް ގަތުމަށް ހެލްތް މިނިސްޓްރީގެ ފަރާތުން އަމަލު ކޮށްފައިވާ ގޮތާ ގުޅޭގޮތުން އޮޑިޓަރ ޖެނެރަލްގެ އޮފީހުން ނެރެފައިވާ އޮޑިޓް ރިޕޯޓާ ގުޅޭގޮތުން އެކިއެކި ފޯރަމްތަކުގައި ކަމުގެ ހަގީގަތް އޮޅޭގޮތަށް ވަކިބަޔަކު ބަދުނާމްވާ ގޮތަށް ވާހަކަތަކެއް ދެކެވެމުންދާ ކަމަށެވެ. އަދި ވެންޓިލޭޓަރުތައް ގަތުމުގައި އެއްވެސް ފަރާތަކަށް ނާޖާއިޒު މަންފާތަކެއް ހޯދައިދިނުމަށް މަގާމުގެ ހައިސިއްޔަތުން އެއްވެސް މަސައްކަތެއް ކުރައްވާފައި ނުވާނެ ކަމަށް ވެސް ނިޝާމާ ވިދާޅުވެފައިވެއެވެ.

ނިޝާމާ ވިދާޅުވީ، ވެންޓިލޭޓަރ ހޯދުމުގައި ދުނިޔޭގެ ބޮޑެތި ޤައުމު ތަކުގައި ވެސް ވެންޓިލޭޓަރގެ ޑިމާންޑް ބޮޑުވެ، ދަޢުލަތުގެ މާލިއްޔަތު ޤަވާއިދުގެ 10.25 ގެ (ރ) ގެ 2 އަދި 4 ނަންބަރުގައިވާ ގޮތުގެ މަތީން ސިންގަލް ސޯސް ޕްރޮކިއުމަންޓްގެ އުޞޫލުން 75 ވެންޓިލޭޓަރ އެގްޒިކިއުޓަރސް ޖެނެރަލް ޓްރޭޑިންގއާއި ޙަވާލުކުރުމަށް ބިޑްކޮމިޓީ އިން ނިންމާފައިވަނީ، މާލިއްޔަތު ޤަވާއިދާ އެއްގޮތަށް ބަޖެޓުގައި ފައިސާ ހުރިތޯ ބެލުމަށްފަހު މަސައްކަތް ހަވާލުކޮށްގެން ކުރިޔަށް ދިއުމަށް ކަމަށެވެ. ހަމައެއާއެކު، ހެލްތް މިނިސްޓަރު އަބްދުﷲ އަމީން އާއި ޑަބްލިއުއެޗްއޯގެ ކަންޓްރީ ރެޕްރެޒެންޓޭޓިވް ޑރ. ޑރ. އަރްވިންދު މާތުރު، މެދުވެރިކޮށް ހޯއްދަވާފައިވާ ފަރާތެއް ކަމަ ށްބުނެ ބިޑު ކޮމިޓީއަށް ހުށައަޅާފައިވާ ލިޔުންތަކުގައި ބަޔާންކޮށްފައިވުމާއި، މީގެ އިތުރުން މިނިސްޓްރީގެ ބިޑް ކޮމެޓީގެ ފަރާތުން ޑަބްލިއުއެޗްއޯ ކަންޓްރީ އޮފީހުން އިތުރަށް މަޢުލޫމާތު ސާފުކޮށް އަދި ފައިނޭންޝިއަލް އެގްޒެކްޓިވް ބިޑްކޮމިޓީ އަށް ހާޒިރުކޮށް ދެއްވި މަޢުލޫމާތުގެ މައްޗަށް ބުރަވެ ކަމަށް ވެސް ނިޝާމާ ވިދާޅުވެފައިވެއެވެ. އަދި ފިނޭންސް މިނިސްޓްރީގެ ސިޓީއަކުން އެޕްރޫވަލް ދެއްވައި ސިންގަލް ސޯސް ޕްރޮކިއުމަންޓްގެ އުޞޫލުން ކުރިޔަށް ގެންދިއުމަށް އަންގަވާފައިވުމާއެކު ކޮންމެހެން ހޯދަން ޖެހޭ ވެންޓިލޭޓަރ ތަކަކަށްވާތީ، ވަގުތާއި ޙާލަތަށް ބަލައި ވެންޓިލޭޓަރގެ މުހިންމުވެފައިވާލެއް ބޮޑުކަމުން ތަކެތި ނުލިބި ލަސްވެއްޖެނަމަ އެތައް ބައެއްގެ ފުރާނައަށް ނުރައްކާވެދާނެ ކަމަށް ބަޔާންކޮށް ހުށައަޅާފައިވާ ކަމަށް ވެސް ނިޝާމާގެ ބަޔާނުގައި ވެއެވެ.

މި މައްސަލައާ ގުޅިގެން އެންޓި-ކޮރަޕްޝަން ކޮމިޝަންގެ ފަރާތުން ތަހުޤީގެއް ކުރަމުންދަނިކޮށް މިކަމުގައި ކަން ހިނގާފައިވާ ގޮތުގެ އަސްލު އޮޅޭ ގޮތަށް ވަކިބަޔަކު ބަދުނާމު ވާގޮތަށް ވާހަކަ ދައްކަމުންދަނީ މިހާރު ކުރިޔަށްދާ ތަހުޤީޤަށް ނުރަނގަޅު ނުފޫޒުތަކެއް ފޯރުވުމަށް ކަމަށް ދެކޭ ކަމަށް ނިޝާމާ ވިދާޅުވެފައިވެއެވެ. އަދި މި މައްސަލާގައި މިނިސްޓްރީގެ ބިޑް ކޮމެޓީގެ މެމްބަރުން ބައިވެރިވުން އޮތް މިންވަރު އެކަނި ބެލުމުގެ ބަދަލުގައި ހުރިހާ މަރުހަލާތަކެއްގައި މިކަމުގައި ބައިވެރިވި އެންމެހައި ފަރާތްތައް ޝާމިލް ވާގޮތަށް މިކަން ހިންގާފައިވާ ގޮތުގެ ފުރިހަމަ ތަހުޤީގެއް ކަމާ ގުޅުން ހުރި އިދާރާތަކުން ކަންހިނގާފައިވާ ގޮތުގެ ތަފްޞީލް މަޢުލޫމާތު ރައްޔިތުންނަށް ހާމަކޮށްދިނުމަކީ މުހިންމު ކަމެއްކަމުގައި ދެކޭ ކަމަށް ވެސް ނިޝާމާގެ ބަޔާނުގައިވެއެވެ.

ބަޔާން ނިންމާލައްވަމުން ނިޝާމާ ވިދާޅުވީ، ހެލްތް މިނިސްޓްރީން ވެންޓިލޭޓަރ ގަތުމުގައި އެ މިނިސްޓްރީގެ ބިޑް ކޮމެޓީގެ އެންމެ އިސްފަރާތެއްގެ ހައިސިއްޔަތުން އޭނާ ޢަމަލު ކޮށްފައިވަނީ ތެދުވެރިކަމާ އަމާނާތްތެރިކަމާއެކު ހެޔޮ ނިޔަތުގައި ކަމަށެވެ. އަދި މިނިސްޓްރީގެ ބިޑް ކޮމެޓީގެ ނިންމުންތައް ނިންމާފައިވަނީ ބިޑް ކޮމެޓީއަށް ލިބިފައިވާ ލިޔެކިޔުންތަކާއި މަޢުލޫމާތުގެ މައްޗަށް ބިނާކޮށް ކަމަށް ކަމަށް ވެސް ނިޝާމާ ވިދާޅުވެފައިވެއެވެ.

ނިޝާމާ ވިދާޅުވީ، މިކަމާ ގުޅޭގޮތުން ކަން ހިނގާ ދިޔަގޮތުގެ ތަފްޞީލް މަޢުލޫމާތު ތަހުޤީޤު އިދާރާތަކާ ޙިއްސާ ކުރައްވާނެ ކަމަށާއި އަދި ތަޙުޤީޤުތަކަށް ފުރިހަމަ އެހީތެރިކަމާ އެއްބާރުލުން ދެއްވާނެ ކަމަށެވެ.

ހެލްތް މިނިސްޓްރީއަށް 75 ވެންޓިލޭޓަރުތައް ގަތުމަށް ދުބާއީގެ އެގްޒެކިއުޓާރސް ޖެރެނަލް ޓްރޭޑިންގ ކުންފުންޏާ ހަވާލު ކުރީ މާލިއްޔަތު ގަވާއިދާ ހިލާފަށް ކަމަށާއި، މިކަމުގައި ބޮޑެތި އޮޅުވާލުންތަކެއް ހުރި ކަމަށް އޮޑިޓް ރިޕޯޓްގައި ފާގަހަ ކޮށްފައިވާއިރު، ރައްޔިތުންގެ މަޖިލީހުގެ މާލިއްޔަތު ކޮމެޓީގައި އޮޑިޓަރ ޖެނެރަލް ހަސަން ޒިޔަތު ވެސް ވަނީ ވިދާޅުވެފައިއެވެ. އަދި ހެލްތް މިނިސްޓްރީގެ، ކޮވިޑް-19 އާ ގުޅޭ ޚަރަދުތަކުގެ ކޮމްޕްލަޔަންސް އޮޑިޓް ރިޕޯޓުގައި އެ މިނިސްޓްރީގެ ބިޑް ކޮމެޓީން ބޮޑެތި އޮޅުވާލުންތައް ހިންގާފައިވާކަން ފާހަގަކޮށްފައިވާއިރު، މާލީ ޒިންމާދާރު ވެރިޔާގެ އިހުމާލު އެބައޮތް ކަމަށް އޮޑިޓް އޮފީހުން ބުނެއެވެ.

ހެލްތް މިނިސްޓްރީން ވެންޓިލޭޓަރުތައް ގަތުމުގައި ޑަބްލިޔުއެޗްއޯއާއެކު ރަސްމީ އެއްވެސް މުއާމަލާތެެއް ހިންގާފައިނުވާ ކަމަށް ވެސް އޮޑިޓް ރިޕޯޓްގައި ފާހަގަކޮށްފައިވެއެވެ.

އެގްޒެކިއުޓާރސް ޖެނެރަލް ޓްރޭޑިންއަކީ، ވެންޓިލޭޓަރު ގެންނަން ހަވާލު ކުރި ތިން ކުންފުނީގެ ތެރެއިން ސަރުކާރުން އެޑްވާންސްކޮށް ފައިސާ ދޫކުރި ހަމައެކަނި ކުންފުންޏެވެ. އެމީހުން ރާއްޖެއަށް ވެންޓިލޭޓަރެއް ފޯރުކޮށްދޭނެ އަގެއް ކަމަށް ބުނެފައިވަނީ، 32،500 ޑޮލަރަށެވެ. އެއީ އެހެން ކުންފުނިތަކުން ހުށަހެޅި އަގަށްވުރެ މާބޮޑުތަނުން ވެސް ބޮޑު އަގެއް ކަމަށް ވެއެވެ. އެ ކުންފުންޏާ މަސައްކަތް ހަވާލުކުރީ 34 މިލިއަން ރުފިޔާ އަށް ކަމަށްވާއިރު، މިދިޔަ އޭޕްރީލް މަހުގެ ދެވަނަ ދުވަހު، ވެންޓިލޭޓަރުތައް ގެނައުމުގެ އެގްރީމަންޓްގައި ސޮއިކޮށްފައިވެއެވެ.

އަދި އޭޕްރީލް މަހުގެ ތެރޭގައި ދެ ފަހަރެއްގެ މަތިން އެޑްވާންސަށް 30.9 މިލިއަން ރުފިޔާވެސް ވަނީ ދައްކާފައެވެ. އެގްރީމަންޓްގައި 14 ދުވަހުގެ ތެރޭގައި ވެންޓިލޭޓަރުތައް ރާއްޖެ ގެނެވޭނެ ކަމަށް ބުނެފައިވާއިރު، މިހާތަނަށް އެ ވެންޓިލޭޓަރުތައް ލިބިފައެއް ނުވެއެވެ.