ވައިރަސް ފެތުރުން އަދިވެސް ކޮންޓްރޯލެއް ނުވޭ
20 އޯގަސްޓު 2020 | ބުރާސްފަތި 02:09އޮގަސްޓު މަސް ފެށުނު ފަހުން ދުވާލެއްގެ މައްޗަށް 100ށް ވުރެ ގިނަ ކޭސް އަންނަނީ ރިޕޯޓްް ކުރަމުން
އެޗްއީއޯސީގެ ތަރުޖަމާނު ޑރ. ނަޒްލާ ރަފީގު؛ ބަލި ފެތުރުން އަދިވެސް ކޮންޓްރޯލް ނުވާތީ ސަމާލުވުމަށް ވަނީ އަންގާފައި
ލޮކްޑައުންއަށްފަހު ދިން ލުއިތަކާއެކު ކޮވިޑް-19 ގެ ކޭސްތައް އިތުރުވެފައިވާ އިރު އަދިވެސް ވައިރަސް ފެތުރުން ކޮންޓްރޯލް ނުވާ ކަމަށް ހެލްތް އެމަރޖެންސީ އޮޕަރޭޝަން ސެންޓަރ (އެޗްއީއޯސީ) އިން ބުނެފިއެވެ.
ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާނު ޑރ. ނަޒްލާ ރަފީގު ވިދާޅުވީ ވޭތުވެދިޔަ 2-3 ހަފްތާގައި ވެސް 100ށް ވުރެ މަތިން ކޮންމެ ދުވަހަކު ވެސް ކޭސްތައް ރިޕޯޓް ކުރަމުން އަންނަ ކަމަށެވެ. އެހެންކަމުން މިހާރު އަޅާފައިވާ ފިޔަވަޅުތަކާއެކީގައި ވެސް ވައިރަސް ކޮންޓްރޯލް ވެފައި ނުވާ ކަމަށް ޑރ. ނަޒްލާ ވިދާޅުވިއެވެ.
ޑރ. ނަޒްލާ ވިދާޅުވީ އަމިއްލަ ފަރާތްތަކުން ރައްކާތެރިކަމުގެ ގޮތުން މާސްކް އެޅުމާއި އަތްދޮވުމާއި ގައި ދުރުކަން ބެހެއްޓުން މި ތިން ކަންތައް ކުރުން މުހިންމު ކަމަށާއި، ގިނަ މީހުންނަށް މި ކަންތަކުގައި ހިފަހެއްޓިއްޖެނަމަ އެއީ ކޭސްތައް ދަށް ކުރުމަށް އެޅޭނެ ފިޔަވަޅުތައް ކަމަށެވެ.
ރާއްޖޭގައި ކޮވިޑް ފެތުރެން ފެށުމާއެކު ފިޔަވަޅުތައް އަޅަން ފެށިއެވެ. އަދި އޭގެ ފަހުން ވައިރަސް ފެތުރުން ކޮންޓްރޯލް ވުމާއެކު ކޮންމެވެސް ވަރެއްގެ ލުއިތަކެއް ދެވުނެވެ. އެ ލުއިތަކާއެކު ޖުލައި މަހުގެ ފަހުކޮޅުން ފެށިގެން ކޭސްތައް އިތުރުވަމުން އަންނަ އިރު އެއްދުވަހާ ދުއިސައްތައަށްވުރެ ގިނަ ކޭސްތައް ވަނީ ރިޕޯޓު ކޮށްފައެވެ. އޭގެ ފަހުން ކޮންމެ ދުވަހަކުވެސް 100 އާއި ގާތްކުރާ އަދަދަކަށް ކޭސްތައް އަންނަނީ ރިޕޯޓު ކުރަމުންނެވެ.
މިހާތަނަށް ރާއްޖޭގައި 6 ހާހަށްވުރެ ގިނަ މީހުން ވައިރަސްއަށް ޕޮޒިޓިވްވެފައިވާއިރު މިހާތަނަށް މި ވައިރަސް ޖެހިގެން ރާއްޖޭގައި 24 މީހަކު ވަނީ މަރުވެފައެވެ.
