ތަހުގީގު ކުރާ އިދާރާތަކުން ޖޮއިންޓް ތަހުގީގެއް ކުރިއަށް ގެންދާނަމަ ޕީޖީ އޮފީހުގެ ސަމާލު ކަމަށް ގެނައުމަށް އެދެފި
19 އޯގަސްޓު 2020 | ބުދަ 14:40ޕީޖީ އޮފީހުން ބުނީ ތަހުގީގު ކުރުމުގެ އިހުތިޞާޞް ލިބިގެން ނުވާ ބައެއްވާނަމަ ވީހާވެސް އަވަހަކަށް އިހުތިޞާސް ލިބިގެންވާ އިދާރާއަށް ފޮނުވުމަށް ދަންނަވާ ކަމަށް
ޕްރޮސެކިއުޓާ ޖެނެރަލް ހުސައިން ޝަމީމު: ޕީޖީ އޮފީހަކީ ޖިނާއީ އަދުލްގެ ނިޒާމުގެ އެންމެ މުހިއްމު އެއް މުއައްސަސާ، ޖިނާއީ މައްސަލަތަކުގައި ދައުލަތުން ކޯޓުތަކަށް ދައުވާކުރާ ފަރާތަކީ ޕީޖީ އޮފީސް
ތަހުގީގު އިދާރާތަކުން ޖޮއިންޓް ތަހުގީގެއް ކުރިއަށް ގެންދާނަމަ، އެކަން ޕްރޮސެކިއުޓަރ ޖެނެރަލް (ޕީޖީ) އޮފީހުގެ ސަމާލު ކަމަށް ގެނައުމަށް އެދިއްޖެއެވެ.
ޕީޖީ އޮފީހުން ބުނީ، ޖިނާއީ އިޖުރާއަތުގެ ޤާނޫނުގެ 76 ވަނަ މާއްދާގެ ދަށުން، ތަޙުޤީޤީ އިދާރާތަކުން ޖޮއިންޓް އިންވެސްޓިގޭޝަންއެއް ކުރިއަށް ގެންދަން ނިންމާނަމަ އެކަން ޕްރޮސިކިއުޓަރ ޖެނެރަލްގެ އޮފީހުގެ ސަމާލު ކަމަށް ގެނައުމަށް އެދޭ ކަމަށެވެ.
މީގެއިތުރުން ވެސް އިތުރު ދެކަމެއް ޕީޖީ އޮފީހުން ފާހަގަކޮށްފައިވެއެވެ. އެގޮތުން، ތަޙުޤީޤު ކުރަމުންދާ މައްސަލަ އަކީ އެ އިދާރާއަކަށް ތަޙުޤީޤު ކުރުމުގެ އިޙްތިޞާޞް ނުލިބޭ މައްސަލައެއްކަން އެނގިއްޖެނަމަ، އެ މައްސަލައެއް ތަޙުޤީޤު ކުރުމުގެ އިޙްތިޞާޞް ލިބޭ އިދާރާއަކަށް ވީ އެންމެ އަވަހަކަށް ހުށަހެޅުމަށް ވެސް ޕީޖީ އޮފީހުން އެދިފައިވެއެވެ.
އަދި ތަޙުޤީޤު ކުރަމުންދާ މައްސަލައެއްގައި ތަޙްޤީޤީ އެހެން އިދާރާއަކަށް ތަޙްޤީޤްކުރުމުގެ އިޙްތިޞާޞް ލިބޭ ކުށެއް އެކުލެވިގެންވާކަން އެނގިއްޖެނަމަ، ތަޙްޤީޤް ނިމެންދެން މަޑުނުކޮށް، އެ ކުށުގެ ބައި އިޙްތިޞާޞްލިބޭ އިދާރާއަކަށް ވީ އެންމެ އަވަހަކަށް ހުށަހެޅުމަށް ވެސް ޕީޖީ އޮފީހުން އެދިފައި ވެއެވެ.
ޕީޖީ އޮފީހުން ބުނީ، ޖިނާއީ މައްސަލަތައް ތަޙްޤީޤްކުރުމުގެެ ބާރު ލިބިފައިވާ ދައުލަތުގެ އެންމެހައި މުއައްސަސާތަކުން އެ ފަދަ ޙާލަތްތަކުގައި ޕީޖީ އޮފީހުން ދަންވާފައިވާ ގޮތަށް ޢަމަލު ކުރުމަށް ޕްރޮސިކިއުޓަރ ޖެނެރަލް އިރުޝާދު ދެއްވާ ކަމަށެވެ. އަދި ޖިނާއީ މައްސަލަތައް ތަޙުޤީޤީ ކުރާ ދައުލަތުގެ އެންމެހައި މުއައްސަސާތަކުން ޢަމަލު ކުރުމަށް ޕްރޮސިކިއުޓަރ ޖެނެރަލް މި އިރުޝާދު ނެރުއްވާފައިވަނީ ޤާނޫނު އަސާސީގެ 223 ވަނަ މާއްދާގެ (ރ) އާއި ޕްރޮސިކިއުޓަރ ޖެނެރަލްގެ ޤާނޫނުގެ 15 ވަނަ މާއްދާގެ (ރ) އިން ޕްރޮސިކިއުޓަރ ޖެނެރަލަށް ލިބިދޭ ބާރުގެ ދަށުން ކަމަށް ވެސް ޕީޖީ އޮފީހުން ބުނެއެވެ.
