"ރެއާލް ދޫކޮށްލަން ބޭނުންވި، އެކަމަކު އެ ފުރުސަތަށް ކުލަބުން ހުރަސްއެޅި"

މި ސީޒަން ފެށުމުގެ ކުރިން ރެއާލް މެޑްރިޑް ދޫކޮށްލަން ބޭނުންވި ކަމަށާއި، އެކަމަކު އެކަމަށް ކުލަބުން ހުރަސްއެޅި ކަމަށް މިޑްފީލްޑަރު ހަމޭސް ރޮޑްރިގޭޒް ބުނެފިއެވެ.

މި ސީޒަނުގައި ރެއާލްގެ ފުރަތަމަ އެގާރައިން ހަމޭސްއަށް ފަހަކަށް އައިސް ޖާގަ ނުލިބުމާ ގުޅިގެން، އޭނާ ވަނީ އަމިއްލައަށް ސްކޮޑުގައި ނުހިމަނަން އެދިފައެވެ.

ދާދި ފަހުން ހަމޭސް ބުނީ މި ސީޒަން ފެށުމުގެ ކުރިން ރެއާލް ދޫކޮށްލަން ބޭނުންވާ ކަމަށް ކުލަބުގައި އެދުނު ކަމަށާއި، އެކަމަކު ކުލަބުން އެކަމަށް ހުރަސްއެޅި ކަމަށެވެ. އަދި ކުލަބުން އޭނާގެ ކުރިމަގާ މެދު ކަންތައް ކުރި ގޮތާ ދޭތެރޭ ހިތާމަކުރާ ކަމަށްވެސް ބުންޏެވެ.

އަދި ބުނީ ރެއާލްގައި އޭނާގެ ކުރިމަގާ މެދު ސުވާލު އުފެދިފައިވާއިރު، ރެއާލް ދޫކޮށް އެހެން ކުލަބަކަށް ބަދަލުވާން ބޭނުންވާ ކަމަށާއި، އެކަމަކު ކުލަބުން އެފުރުސަތު އޭނާއަށް ދޭނެ ކަމެއް ބުނަން ނޭނގޭ ކަމަށެވެ. އަދި އަންނަ ސީޒަނުގައި ކުލަބު ދޫކޮށް، އޭނާ ދާނެ ވަކި ކުލަބެއްވެސް ބުނަން ނޭނގޭ ކަމަށްވެސް ހަމޭސް ވަނީ ބުނެފައެވެ.

ހަމޭސް އިތުރަށް ބުނީ ކޮވިޑް-19 އާ ގުޅިގެން ކުލަބުތައް މާލީ ގޮތުން ވަރަށް ބޮޑަށް އަޑިއަޅާލާފައިވާ ކަމަށާއި، އެހެންކަމުން ބޮޑު އަގުގައި އެހެން ކުލަބަކަށް ބަދަލުނުވެވޭނެ ކަމަށެވެ. އެކަމަކު އޭނާ ކުޅެން ބޭނުންވާ ކުލަބަކަށް ދިޔުމަށް ރެއާލުން ފުރުސަތު ދޭނެ ކަމަށް އުންމީދުކުރާ ކަމަށްވެސް ވަނީ ބުނެފައެވެ.

ރެއާލްގެ ފުރަތަމަ އެގާރައިން ހަމޭސްއަށް ފަހަކަށް އައިސް ޖާގަ ލިބިފައި ނުވާއިރު، އޭނާ ބުނީ ފުރަތަމަ އެގާރައިން ޖާގަ ނުލިބުމުން އެކަމާއި ދެރަވި ކަމަށާއި، އެކަމަކު ކޯޗު ޒިނެދިން ޒިދާންގެ ނިންމުމަށް އޭނާ ފުރިހަމައަށް އިހުތިރާމް ކުރާ ކަމަށެވެ.

ރެއާލް ދޫކޮށްލަން ބޭނުންވާކަން ހަމޭސް ހާމަކުރި ނަމަވެސް، މީގެ ކުރިން މީޑިއާތަކުން ވަނީ އަންނަ ސީޒަނުގައި ރެއާލްގައި މަޑުކުރަން ހަމޭސް އެއްބަސްވެފައިވާ ކަމަށް ރިޕޯޓުކޮށްފައެވެ. އަދި ހަމޭސް މަޑުކުރުވަން ރެއާލުން ބޭނުންވީ މާލީ ގޮތުން ކުލަބު އަޑިއަޅާލާފައިވުމާއެކު، އިތުރު ކުޅުންތެރިޔަކު މި ޓްރާންސްފާ ބާޒާރުގައި ހޯދުމަށް އުނދަގޫވާނެތީ އާއި، ހަމޭސް ރެއާލްގެ ސްކޮޑުގައި މަޑުކުރުވަން ޒިދާން އެދިފައިވާތީ ކަމަށްވެސް ވަނީ ރިޕޯޓުކޮށްފައެވެ.

ހަމޭސްއަށް ޔޫރަޕްގެ ބޮޑެތި ކުލަބުތަކުން ފާރަލަމުން އަންނައިރު، އޭގެ ތެރޭގައި ޔުވެންޓަސް އާއި ނާޕޮލީގެ އިތުރުން މެންޗެސްޓާ ޔުނައިޓެޑް ހިމެނެއެވެ.

ރިޕޯޓުތައް ބުނާ ގޮތުން ހަމޭސް ހޯދުމަށް ޔުވެންޓަސްއިން އަންނަނީ ބިޑް ކުރަން ތައްޔާރުވަމުންނެވެ. އެގޮތުން ޔުވެންޓަސްގެ ކޯޗު އަންދްރޭ ޕިރްލޯ އަންނަ ސީޒަނަށް އެޓީމަށް ގެންދިޔުމަށް އެންމެ ބޭނުންވާ އެއް ކުޅުންތެރިޔަކީ ހަމޭސް ކަމަށް ރިޕޯޓުތައް ބުނެއެވެ.

މީގެ ކުރިން ޕޯޓޯ އަދި ބެންފީކާއަށްވެސް ކުޅެފައިވާ ހަމޭސް ވަނީ އޭނާ ރެއާލްގައި މިހާތަނަށް ހޭދަކުރި ތިން ސީޒަނުގައި ކުޅުނު 111 މެޗުގައި 36 ލަނޑު ކާމިޔާބުކޮށްފައެވެ. އަދި ވަނީ ރެއާލް އާއެކު ސްޕެނިޝް ލީގާއި، ޔުއެފާ ޗެމްޕިއަންސް ލީގާއި، ޔުއެފާ ސުޕާ ކަޕް އަދި ފީފާ ކްލަބު ވޯލްޑް ކަޕް، މި ކޮންމެ މުބާރާތެއް ދެ ފަހަރު ކާމިޔާބުކޮށްފައެވެ.