ކޮވިޑާ ގުޅޭ ކޮރަޕްޝަންތައް ބަލަން އޮޑިޓާރ ޖެނެރަލާއި ތިން މިނިސްޓްރީއެއް މާލިއްޔަތު ކޮމިޓީއަށް ހާޒިރުކުރަނީ
މާދަމާ 2ގައި އޮޑިޓަރ ޖެނެރަލް ހާޒިރު ކުރާާނެ
މާލިއްޔަތު ކޮމިޓީގެ ބައްދަލުވުމެއްގެ ތެރެއިން
ހެލްތާއި ޓުއަރިޒަމް މިނިސްޓްރީން ކޮވިޑް-19އާއި ގުޅިގެން ބޮޑެތި ކޮރަޕްޝަންތަކެއް ހިންގާފައިވާކަމަށް އޮޑިޓް ރިޕޯޓުން ފާހަގަވެފައިވާތީ އެ ދެ ވުޒާރާއި އާއި ފިނޭންސް އަދި އޮޑިޓަރ ޖެނެރަލް ރައްޔިތުންގެ މަޖިލީހުގެ މާލިއްޔަތު ކޮމިޓީއަށް ހާޒިރުކުރުމަށް ނިންމައިފިއެވެ.
ކޮމިޓީގެ ބައްދަލުވުމުގައި މެމްބަރުން ވަނީ ކޮރަޕްޝަންގެ ސީރިއަސް ތުހުމަތުތަކެއް އެ ދެ ވުޒާރާގެ ހާއްސަ އޮޑިޓުން ފާހަގަވެފައިވާތީ އެކަމާއި ކަންބޮޑުވުން ފާޅުކޮށްފައެވެ.
އެންމެ ފުރަތަމަ އޮޑިޓަރ ޖެނެރަލް ކޮމިޓިއަށް ހާޒިރުކޮށް ކަންބޮޑުވުންތައް އޮޅުން ފިލުވުމަށް ބައިވެރިވެވަޑިއިގެންނެވި ހުރިހާ މެމްބަރުން ވަނީ އިއްތިފާގުވެވަޑައިގެންފައެވެ. އެގޮތުން، އޮޑިޓަރ ޖެނެރަލް ހާޒިރުކުރަން ފާސްކުރީ އަންގާރަ ދުވަހުގެ މެންދުރު 2:00 ގައެވެ. އަންގާރަ ދުވަހު އޮޑިޓަރ ޖެނެރަލް ހާޒިރުކުރަނީ ދައުލަތަށް ގެއްލުންވާ ގޮތަށް ވެންޓިލޭޓަރ ގަތުމުގައި އަމަލުކޮށްފައިވާކަމަށް އޮޑިޓް ރިޕޯޓުން ފާހަގަވެފައިވާތީއެވެ.
ޓުއަރިޒަމް މިނިސްޓްރީގެ އޮޑިޓާއި ބެހޭ ގޮތުން ތަފާތު ބައްދަލުވުމެއް ބޭއްވުމަށް ވަނީ ހަމަޖެހިފައެވެ.
ފިނޭންސް މިނިސްޓްރީ ހާޒިރުކުރަނީ ދުބާއީގެ އެގްޒެމް ކުންފުންޏަށް 75 ވެންޓިލޭޓަރު ގެނައުމަށް ހަވާލުކުރި އެއްބަސްވުމުގެ އަގުގެ 90 ޕަސެންޓަށްވާ ފައިސާ ޕާފޯމަންސް ގެރެންޓީއަކާ ނުލައި ހަވާލުކުރި މައްސަލައިގައެވެ.
