ވެންޓިލޭޓަރުތައް ގެންނަން މަޝްވަރާ ކުރީ ރާއްޖޭގައި ހުންނަ ޑަބްލިއުއެޗްއޯގެ ވެރިޔާއާ: ހެލްތް މިނިސްޓްރީ
16 އޯގަސްޓު 2020 | އާދީއްތަ 17:05އެ ކުންފުންޏާ ވިޔަފާރީގެ އެއްވެސް މުއާމަލާތެއް ކޮށްފައިނުވާނެ: ޑަބްލިއުއެޗްއޯ
ރާއްޖޭގައި ހުންނަ ޑަބްލިއުއެޗްއޯގެ ވެރިޔާ ޑރ. އަރްވިންދް މާތުރް އާއި، ހެލްތް މިނިސްޓަރު އަމީން
ކޮވިޑުގެ ބަލި މީހުންނަށް ފަރުވާދޭން ރާއްޖެއަށް ބޭނުންވާ 75 ވެންޓިލޭޓަރު ދުބާއީގެ އެގްޒެކިއުޓާސް ޖެނެރަލް ޓްރޭޑިންގ ކުންފުންޏާ ހަވާލު ކުރި ދުނިޔޭގެ ސިއްހަތު ޖަމިއްޔާ، ޑަބްލިއުއެޗްއޯގެ މަޝްވަރާގެ މަތިން ކަމަށް ހެލްތް މިނިސްޓްރީން ބުނެފިއެވެ.
އާދިއްތަ ދުވަހު އޮޑިޓަރ ޖެނެރަލްގެ އޮފީހުން ނެރެފައިވާ އޮޑިޓް ރިޕޯޓުގައި ބުނީ، ވެންޓިލޭޓަރުތައް ގަންނަން ހަވާލު ކުރެވުނު ކުންފުންޏަކީ ޑަބްލިއުއެޗްއޯ ގެ ރިކޮމެންޑެޑް ސަޕްލަޔަރަކަށް ވާތީ މިނިސްޓްރީން ލިޔެކިޔުންތައް ތައްޔާރުކޮށްފައިވާ ކަމަށެވެ. އޭގެ ތެރޭގައި ހެލްތުގެ ފައިނޭންސް ކޮމިޓީން ބިޑް ކޮމިޓީ އަށް ފޮނުވާފައިވާ މެއިލްތަކެއް ވެސް ހިމެނޭ ކަމަށް އޮޑިޓް ރިޕޯޓުން ވަނީ ފާހަގަކޮށްފައެވެ.
އޮޑިޓް ރިޕޯޓުގައި ހުރި ކަންތައްތަކާއި ބެހޭ ގޮތުން ރާއްޖެއެމްވީއާ ވާހަކަ ދައްކަވަމުން ހެލްތް މިނިސްޓްރީގެ ފައިނޭންޝަލް އެކްޒެކްޓިވް އަހުމަދު އަސްލަމް ވިދާޅުވީ، ވެންޓިލޭޓަރުގެ ގެންނަންވެގެން މިނިސްޓްރީން ރާއްޖޭގައި ހުންނަ ޑަބްލިއުއެޗްއޯގެ ރިޕްރެޒެންޓޭޓިވް ޑރ. އަރްވިންދް މާތުރްއާ ވާހަކަ ދެއްކުމުން، ކޮންޓެކްޓެއް މައުލޫމާތު އެ މިނިސްޓްރީއަށް ދީފައިވާ ކަމަށެވެ.
އެ މައުލޫމާތު ފިނޭންސް ޑިޕާޓްމަންޓަށް ލިބުމުން، ސީދާ ޑަބްލިއުއެޗްއޯ މެދުވެރިކޮށް އެ ތަކެތި ލިބޭނެ ގޮތެއް އޮތްތޯ ބަލައި، އެކަން އެގޮތަށް ވާން އޮތް ކަމަށްވާނަމަ މިނިސްޓްރީ އަށް އަންގައި ދިނުމަށް މަޝްވަރާ ކުރެވުނު ކަމަށް އަސްލަމް ވިދާޅުވިއެވެ.
އެކަމަކު ކޮވިޑުގެ ހާލަތާއި ގުޅިގެން ޑަބްލިއުއެޗްއޯ އަށް ވެންޓިލޭޓަރު ގެނެވޭނެ ގޮތެއް ހަމަޖެއްސޭނެ ގޮތެއް ނެތް ކަމަށް ރާއްޖޭގައި ހުންނަ އޮފީހުން މައުލޫމާތު ދިން ކަމަށް އޭނާ ވިދާޅުވިއެވެ. އަސްލަމް ވިދާޅުވީ، އޭގެ ފަހުން ރެފަރެންސް އަކަށް ވެންޓިލޭޓަރުގެ އަގުތަކާއި ދުބާއީ ކުންފުނިން ޑެލިވަރީކޮށްދޭ ވެންޓިލޭޓަރު މައުލޫމާތު ހިމެނޭ މައުލޫމާތުތައް ޑަބްލިއުއެޗްއޯ އިން ހެލްތް މިނިސްޓްރީއަށް ފޯރުކޮށްދީފައިވާ ކަމަށެވެ. އަދި އެއްވެސް އިރެއްގައި އެ ކުންފުންޏަކީ ޑަބްލިއުއެޗްއޯ އިން ލަފާނުދޭ ކުންފުންޏެއް ކަމަށް ބުނެފައިނުވާ ކަމަށެވެ.
އޮޑިޓް ރިޕޯޓުގައި ބުނީ، އެގްޒެކިއުޓާރސް ޖެނެރަލް ހެލްތް މިނިސްޓްރީއާ ދެމެދު ވެފައިވާ އެއްބަސްވުމުގެ ދަށުން، އެޑްވާންސް ޕޭމަންޓްގެ ގޮތުގައި ޕްރޮޖެކްޓުގެ އަގުގެ 75 އިންސައްތަ ދައްކާތާ 29 ދުވަސް ތެރޭގައި ވެންޓިލޭޓަރުތައް ސަޕްލައިކޮށް ނިންމަން ޖެހޭ ކަމަށެވެ. އެޑްވާންސް ޕޭމަންޓްގެ ގޮތުގައި އޭޕްރީލް މަހުގެ ދެވަނަ ދުވަހު 75 އިންސައްތަ އަދި 27 އޭޕްރީލް 2020 ގައި އިތުރު 15 އިންސައްތަ ދައްކާފައިވީ ނަމަވެސް، އޮޑިޓް ކުރެވުނު ތާރީޚު ކަމުގައިވާ އޮގަސްޓު މަހުގެ 6 ވަނަ ދުވަހާ ހަމައަށް ވެސް ވެންޓިލޭޓަރުތައް ހަމައަށް ފޯރުކޮށްދީފައި ނުވާކަން އޮޑިޓް ރިޕޯޓުގައި ވަނީ ފާހަގަކޮށްފައެވެ.
ހެލްތް މިނިސްޓްރީން ބުނީ، ވަރަށް އަވަސް މުސްތަގުބަލެއްގައި ވެންޓިލޭޓަރު ރާއްޖެ އަށް ލިބޭނެ ކަމަށެވެ. އަދި އެކަމުގައި ކޮރަޕްޝަންގެ އެއްވެސް އަމަލެއް ހިންގާފައިނުވާނެ ކަމަށެވެ.
އެއްބަސްވުމުގެ ޖުމްލަ އަގުގެ 90 އިންސައްތައަށް ވާ ފައިސާ ދައްކާފައިވާއިރު، ވެންޓިލޭޓަރު ލިބިފައި ނުވާތީ މިކަން ހިނގާފައިވާ ގޮތް ތަހުގީގު ކުރުމަށް އޮޑިޓް އޮފީހުން ވަނީ ކަމާއި ބެހޭ އިދާރާތަކަށް އަންގާފައެވެ.
