ކަރެކްޝަންގެ ސިވިލް މުވައްޒަފުންނަށްވެސް ކުލަޔާއި މެޑަލް ދޭގޮތަށް ހަދަނީ
ތައުލީމް ހާސިލްކުރަން ބޭނުންވާ ފަރާތްތަކަށް ފުރުސަތު ފަހިކޮށްދިނުމުގެ މަސައްކަތް ކުރެވޭ
ކަރެކްޝަންސްގެ ސިވިލް އޮފިސަރަކަށް ހަނދާނީ ލިޔުން ހަވާލުކުރުމުގެ ތެރެއިން
މޯލްޑިވްސް ކަރެކްޝަނަލް ސަރވިސްގައި މަސައްކަތްކުރާ ސިވިލް މުވައްޒަފުންނަށްވެސް ވަޒީފާގެ ކުރިއެރުމެއްގެ ގޮތުން ކުލަޔާއި މެޑަލް ދޭ ގޮތަށް ގަވާއިދަށް ބަދަލު ގެންނާނެ ކަމުގެ އިޝާރާތެއް ކޮމިޝަނަރ އޮފް ޕްރިޒަންސް އަހުމަދު މުހައްމަދުފުޅު ދެއްވައިފި އެވެ.
މިހާރު ކުލަޔާއި މެޑަލް ދެމުންދަނީ ހަމައެކަނި ޖަލުތަކުގެ އޮފިސަރުންނަށެވެ.
ކަރެކްޝަނަލް ސާވީސް އަށް 49 އަހަރު ފުރުމުގެ މުނާސަބަތުގައި ހުޅުމާލެ ޖަލުގައި ބޭއްވި ރަސްމިއްޔާތުގައި ވާހަކަ ދައްކަވަމުން އަހުމަދު މުހައްމަދުފުޅު ވިދާޅުވީ، މުވައްޒަފުންކުރާ މަސައްކަތްތަކުގެ އަގު ވަޒަން ކުރުމަށް ކުރެވެން ހުރިހާ މަސައްކަތެއް ކުރައްވަމުން ގެންދަވާނެ ކަމަށެވެ. އެގޮތުން ކުލަޔާއި ޝަރަފު ދޭ ބޯޑުން މުހިއްމު ނިންމުންތަކެއް ނިންމާފައިވާ ކަމަށް އޭނާ ވިދާޅުވި އެވެ.
ކޮމިޝަނަރ އޮފް ޕްރިޒަންސް ވިދާޅުވީ، ދިިގު މުއްދަތުގެ އެވޯޑާއި ޝަރަފުގެ އެވޯޑަށް ބަލާއިރު ފާހަގަކުރެވުނު އެއްކަމަކީ މުއައްސަސާގެ ތެރޭގައި ކިޔެވުމުގެ ރޫހު ހުރިކަން ކަމަށެވެ. ކަރެކްޝަންސްގެ ތެރޭގައި ގިނަ ދާއިރާތަކަކުން ތައުލީމް ހާސިލްކޮށް އަދި ތައުލީމް ހާސިލްކުރުމުގެ ފުރުސަތު ފަހިވެފައިވާ ގޮތަށް މަސައްކަތްތައް ބައްޓަން ކުރެވިގެން ދިޔުމަށް އުއްމީދު ކުރައްވާ ކަމަށް ވިދާޅުވި އެވެ.
އޭގެ ތެރޭގައި ހިމެނެނީ މުއައްސަސާ އަށް ބޭނުންވާ ތައުލީމާއި ތަމްރީން ހޯދިދާނެ ދާއިރާތައް ކަނޑައަޅާ، އެ ދާއިރާތަކުން ތައުލީމް ހާސިލްކުރަން ބޭނުންވާ ފަރާތްތަކަށް ލުއިފަސޭހަކަމާއި އެކު ތައުލީމް ހާސިލުކުރެވޭނެ ގޮތްތައް ފަހިކޮށް ދިނުމެވެ.
މަދު އޮފިސަރުންތަކާއި އެކު ކުރިޔަށް ގެންދިޔަ ރަސްމިއްޔާތުގައި ވޭތުވެދިޔަ ފަސް އަހަރު ހާޒިރުނުވާ ދުވަހެއް، ގަޑި ޖެހުން ދުވަހެއް ނެތް އޮފިސަރުންނާއި މުވައްޒަފުންނަށާއި، އޮފިސަރުންނަށް ކުލަޔާއި، އޮފިސަރުންނާއި މުވައްޒަފުންނަށް ކާމިޔާބުގެ ލިޔުމުގެ އިތުރުން މެޑަލް ލިބުނު އޮފިސަރުންނަށް ސެޓްފިކެޓް ވަނީ ހަވާލުކޮށްފައެވެ.
