ޔުއެފާ ޗެމްޕިއަންސް ލީގުގެ ކުއާޓާފައިނަލްގައި ވަރުގަދަ އެތުލެޓިކޯ މެޑްރިޑް ބަލިކޮށް، ފުރަތަމަ ފަހަރަށް މުބާރާތުގެ ސެމީފައިނަލަށް އާރްބީ ލެއިޕްޒީގް ދަތުރުކޮށްފިއެވެ.

މި ސީޒަންގެ ޗެމްޕިއަންސް ލީގުގެ ސެމީއަށް ލެއިޕްޒީގް ދަތުރުކުރިއިރު، މިއީ 2009 ވަނަ އަހަރު އުފެދުނު ލެއިޕްޒީގް މި މުބާރާތުގެ ސެމީގައި ވާދަކުރާނެ ފުރަތަމަ ފަހަރެވެ. ޗެމްޕިއަންސް ލީގުގައި އެޓީމު އެންމެ ފުރަތަމަ ވާދަކުރީ 2017-2018 ވަނަ އަހަރުގެ ސީޒަނުގައެވެ. އެކަމަކު އެފަހަރު ގްރޫޕް ސްޓޭޖުން ވަނީ ކަޓާފައެވެ.

ކުއާޓާއިން ފެށިގެން މި ސީޒަނުގެ ޗެމްޕިއަންސް ލީގުގެ މެޗުތައް ޕޯޗުގަލްގެ ވެރިރަށް ލިޒްބަންގައި ކުރިއަށްދާއިރު، ބުރާސްފަތި ދުވަހުގެރޭ ކުޅުނު ކުއާޓާގެ ދެވަނަ މެޗުން އެތުލެޓިކޯގެ މައްޗަށް ލެއިޕްޒީގް ކުރިހޯދީ 2-1 ގެ ނަތީޖާއަކުންނެވެ.

މި މެޗު ފަށައިގެން ދެޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މެޗުގެ ފުރަތަމަ ހާފުގައި ދެ ޓީމަށްވެސް ނުރައްކާތެރި ހަމަލާތަކެއް އުފެއްދިފައެއް ނުވެއެވެ. އެކަމަކު ދެވަނަ ހާފު ފަށައިގެން ފަސްވަނަ މިނެޓުގައި ލެއިޕްޒީގުން ވަނީ ލަނޑު ޖަހާ ލީޑު ނަގާފައެވެ. މާސެލް ސަބިޓްޒާގެ އެހީތެރިކަމާއެކު މި ލަނޑު އެޓީމަށް ކާމިޔާބުކޮށްދިނީ ޑެނިއަލް އޮލްމޯއެވެ.

މި ލަނޑާއެކު އެތުލެޓިކޯއިން އެޓީމުގެ ކުޅުން ރަނގަޅު ކުރިއިރު، މެޗުގެ 71 ވަނަ މިނެޓުގައި އެޓީމުން ވަނީ ލިބުނު ޕެނަލްޓީއަކުން ނަތީޖާ އެއްވަރު ކޮށްފައެވެ. މި ޕެނަލްޓީ އެޓީމަށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި ޒުވާން ފޯވާޑް ޔާއޯ ފެލިކްސްއެވެ.

އެކަމަކު މެޗުގެ ފުރިހަމަ ވަގުތު ނިމެން ދެ މިނެޓަށް ވެފައިވަނިކޮށް ލެއިޕްޒީގުން ވަނީ އިތުރު ލަނޑެއް ކާމިޔާބުކޮށް، ސެމީގެ ޖާގައެއް ފުރަތަމަ ފަހަރަށް ކަށަވަރު ކޮށްފައެވެ. އެންޖޮލީނޯ ހުރަސްކޮށްދިން ޕާހަކުން މި ލަނޑު އެޓީމަށް ކާމިޔާބުކޮށްދިނީ އެމެރިކާގެ ޒުވާން މިޑްފީލްޑަރު ޓައިލާ އެޑަމްސްއެވެ.

މި މެޗުން ބަލިވެ އެތުލެޓިކޯ މުބާރާތުން ކެޓިއިރު، ސެމީގައި ލެއިޕްޒީގް ވާދަކުރަން ޖެހޭނީ އެޓަލާންޓާ ބަލިކޮށް ސެމީއަށް ދަތުރުކުރި ޕީއެސްޖީއާއެވެ.