ކޭސްތައް އިތުރުވާތީ އެޗްއީއޯސީގެ މަސައްކަތްތައް އިތުރަށް ފުޅާކުރަނީ!
13 އޯގަސްޓު 2020 | ބުރާސްފަތި 03:01ފުލް ލޮކްޑައުންގައި އޮތްއިރު ބަލި ކޮންޓްރޯލް ކުރެވުނު
އެޗްއީއޯސީގެ މަސައްކަތްތައް ހަރުދަނާ ކުރުމަށް ގިނަ މަސައްކަތްތަކެއް ކުރާ ކަމަށް އެސެންޓަރުގެ ތަރުޖަމާނު ޑރ.ނަޒްލާ ރަފީގު ވިދާޅުވެފައިވޭ
ކޮވިޑް-19އާ ކޭސްތައް އިތުރުވަމުންދާތީ ހެލްތު އިމަރޖެންސީ އޮޕަރޭޝަން ސެންޓަރު (އެޗްއީއޯސީ)ގެ މަސައްކަތްތައް އިތުރަށް ފުޅާކުރުމުގެ މަސައްކަތް ކުރަމުންދާ ކަމަށް އެސެންޓަރުގެ ތަރުޖަމާނު ޑރ. ނަޒްލާ ރަފީގު ވިދާޅުވެއްޖެއެވެ.
ބުދަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ޑރ.ނަޒްލާ ވިދާޅުވީ، މި ދުވަސްވަރު ކޭސްތައް އިތުރުވަމުންދާތީވެ އެޗްއީއޯސީގެ މަސައްކަތްތައް އިތުރަށް ފުޅާކޮށް ރަނގަޅު ކުރުމުގެ މަސައްކަތްތައް ކުރަމުންދާ ކަމަށެވެ.
ފުލް ލޮކްޑައުންގައި އޮތްއިރު ބަލި ކޮންޓްރޯލް ކުރެވުނުކަން ފާހަގަކުރައްވައި ޑރ. ނަޒްލާ ވިދާޅުވީ އެ ދުވަސްވަރު ލޮކްޑައުން ކުރުމާ ގުޅިގެން ވަރަށް ބޮޑަށް ކޮންޓްރޯލް ކުރެވިގެން ދިޔަ ކަމަށެވެ.
ޑރ. ނަޒްލާ ވިދާޅުވީ ލޮކްޑައުންއަށް ލުއި ދިންއިރު ވެސް ބަލި އެއްކޮށް ނެތިގެން ނުދާ ކަމަށާއި، ލުއިދިނީ ވެސް ވަރަށް ގިނަ ގައިޑްލައިންތަކާ ރައްކާތެރިވުމުގެ ގޮތުން އަޅަންޖެހޭ ފިޔަވަޅުތަކާއެކު ކަމަށެވެ. އަދި ވިދާޅުވީ މިހާރު ވެސް ބަލި ފެތުރުމުގެ ފުރުސަތު އެބައޮތް ކަމަށާއި، ރައްކާތެރިވުމުގެ ގޮތުން އަޅަންޖެހޭ ފިޔަވަޅުތައް އަޅަން ޖެހޭ ކަމަށެވެ.
ކޮވިޑް-19 އާ ގުޅިގެން ނުރަނގަޅު މައުލޫމާތު ފަތުރަމުންދާތީ ޑރ. ނަޒްލާ ވަނީ ކޮވިޑް-19 އާ ގުޅުންހުރި ހަގީގަތާ ހިލާފު ނުވަތަ ރަނގަޅު މައުލޫމާތުކަން ކަށަވަރުނުކޮށް އާންމު ފަރާތްތަކާ އެ މައުލޫމާތު ހިއްސާ ނުކުރުމަށް އިލްތިމާސް ކުރައްވާފައެވެ.
ޑރ. ނަޒްލާ ވިދާޅުވީ ހަގީގަތާ ހިލާފު މައުލޫމާތު ފެތުރެމުން އެކަމުގެ ނޭދެވޭ އަސަރު ވަރަށް ބޮޑަށް ކުރާ ކަމަށެވެ.
