ލޯންތަކަށް ގެރެންޓީދީފައި ހުރީ ޤާނޫނުތަކުގެ ތެރެއިން: އޮޑިޓަރ ޖެނެރަލް
ފިނޭންސުން ގެރެންޓީ އާއި ދަރަނީގެ ރިޕޯޓް ހުށަހަޅަމުންދޭ
އޮޑިޓަރ ޖެނެރަލް ހަސަން ޒިޔަތު ކޮމިޓީގައި ވާހަކަދައްކަވަނީ
ދައުލަތުން ސޮވެރިން ގެރެންޓީ ދޫކުރުމުގައި ފިނޭންސް މިނިސްޓްރީން ކަންކަންކޮށްފައި ހުރީ ޤާނޫނުތަކުގެ ތެރެއިންކަމަށާއި އެކަމުގައި ގޯސްތަކެއް ހަދާފައިހުރި ކަމަށް އޮޑިޓްތަކުން މިހާތަނަށް އައިއިރު ފާހަގަވެފައިނުވާ ކަމަށް އޮޑިޓަރ ޖެނެރަލް ހަސަން ޒިޔަތު ވިދާޅުވެއްޖެ އެވެ.
ދައުލަތުގެ ދަރަނި ސާފުނުވާތީ އެކަމާއި ގުޅިގެން އަންގާރަ ދުވަހު ބޭއްވި މުޅި މަޖިލީހުގެ ކޮމިޓީގައި އެކިއެކި ފަރާތްތަކަށް ދޫކޮށްފައިވާ ސޮވަރިން ގެރަންޓީތައް އޮޑިޓް ކުރަންތޯ މެންބަރުން ސުވާލު ކުރެއްވުމުން އޮޑިޓަރ ޖެނެރަލް ވިދާޅުވީ ޤާނޫނުން ފިނޭންސް މިނިސްޓްރީއަށް ޑޭޓާއި ގެރެންޓީގެ ހިސާބު އޮޑިޓަރ ޖެނެރަލް އޮފީހަށް ހުށަހެޅުމަށް ލާޒިމްކުރާ ކަމަށެވެ. އެގޮތުން ފިނޭންސުން ގެރެންޓީ އާއި ދަރަނީގެ ރިޕޯޓް ހުށަހަޅަމުންދާ ކަމަށް ޒިޔަތު ވިދާޅުވި އެވެ.
ޒިޔަތު ވިދާޅުވީ 2016 އިން ފެށިގެން 2018 ވަނަ އަހަރާ ހަމައަށް މިގޮތަށް ދީފައިވާ ގެރެންޓީތަކުގެ ކަންކަން ކޮށްފައިހުރި ގޮތުގެ އޮޑިޓެއް ހަދާފައިވާ ކަަމަށެވެ. އަދި ރިޕޯޓް ފައިނަލްކުރެވިފައިވާ ކަމަށް ޒިޔަތު ވިދާޅުވި އެވެ. އަދި އަންނަ ހަފްތާގައި މިރިޕޯޓް ޕަބްލިޝް ކުރާނެކަމަށް ޒިޔަތު ވިދާޅުވި އެވެ.
ޒިޔަތު ވިދާޅުވީ ސޮވަރިން ގެރަންޓީ ދޭ ލޯނުތައް ބޭނުންކޮށްގެން ހިންގާ މަޝްރޫއުތަކާ އެކަން ކުރިއަށް ދާ ގޮތްވެސް އޮޑިޓް ކުރަން ޖެހޭ ކަމަށް ގަބޫލު ކުރައްވާ ކަމަށެވެ. އަދި މިފަހަރު ބަޖެޓް ކޮމިޓީގައި ވެސް އެ ވާހަކަ ދަންނަވާފައި ވާނެ ކަމަށް ޒިޔަތު ވިދާޅުވި އެވެ. އަދި އެފަދަ އޮޑިޓްތައް ކުރާއިރު ހަމައެކަނި ބަލަންވީ ގާނޫނީ ގޮތުން އިޖުރާއަތްތައް ފުރިހަމަ ވެފައި ހުރިތޯ ނޫން ކަމަށް ވެސް ޒިޔަތު ވިދާޅުވި އެވެ.
ޒިޔަތު ވިދާޅުވީ ދައްކަން ޖެހޭނެ ދަރަނިތައް ދެއްކޭނޭ ގޮތްތައް މިހާރުއްސުރެ ކުރިއާލާ ދުރާލާ ރާވަން ޖެހޭ ކަމަށެވެ.
ކޮމިޓީ ބައްދަލުވުމުގައި އެންމެ ބޮޑަށް ފާހަގަކުރި އެ ގެރެންޓީއަކީ "ސަން ސިޔާމް ހޯލްޑިންގްސް"އަށް ދައުލަތުން ދީފައިވާ ގެރެންޓީއާ ގުޅޭ މައްސަލައެވެ. އެކަމާއި ގުޅޭގޮތުން ޒިޔަތު ވިދާޅުވީ އެކަންކޮށްފައިވަނީ މާލިއްޔަތު ޤާނޫނާއި އެއްގޮތަށް ކަމަށެވެ.
