ފިނޭންސް މިނިސްޓްރީން މިހާރު ހާމަކުރާ މާލީ މައުލޫމާތުތަކަކީ މާލީ އިދާރާތަކުން ބަލައިގެންފައިވާ މައުލޫމާތުތަކެއް ކަމަށް އަމީރު ވިދާޅުވި
ފިނޭންސް މިނިސްޓަރ އިބްރާހީމް އަމީރު ކޮމިޓީގައި ވާހަކަދައްކަވަނީ
ފިނޭންސް މިނިސްޓްރީން ކުރަމުންދާ މަސައްކަތްތަކާއި ގުޅޭގޮތުން މަޖިލީހުން އުފައްދަމުންދާ ސުވާލުތަކާއިއެކު މީޑިޔާގައި އުޅޭ "ނެގެޓިވް ހެޑްލައިން"ގެ ސަބަބުން މާލީ އިދާރާތަކުގެ އިތުބާރު ގެއްލިގެން ހިނގައިދާނެކަމުގެ ކަންބޮޑުވުން ފިނޭންސް މިނިސްޓަރ އިބްރާހީމް އަމީރު ފާޅުކުރައްވައިފި އެވެ.
ދައުލަތުގެ ދަރަނި ހުރިވަރު ސާފުނުވާ ކަމަށް ބުނެ، މުޅި މަޖިލީހުގެ ކޮމީޓިން ބޭއްވި ބައްދަލުވުމުގައި ވާހަކަދައްކަވަމުން މިނިސްޓަރު އަމީރު ވިދާޅުވީ ފިނޭންސް މިނިސްޓްރީ އިން ރާއްޖޭގެ ދަރަނީގެ ކަންކަން ބަލަހައްޓަމުން ނުދާ ކަމަށް ވިދާޅުވެ، ފިނޭންސުގެ ތަފާސްހިސާބުތަކާ މެދު ސުވާލު އުފެދޭ ގޮތަށް މަޖިލީހުގެ މެންބަރުން ތުހުމަތުތައް ކުރައްވާ، ފާޅުކަން ބޮޑު ގޮތެއްގައި ވާހަކަ ދެއްކެވުމުން އޭގެ ސަބަބުން ދަތިތަކާ ކުރިމަތިވާނެ ކަމަށެވެ.
ހޯމަ ދުވަހުގެ ޖަލްސާގައި މިމައްސަލައާ ގުޅޭގޮތުން މެމްބަރުން ވަނީ ވާހަކަދައްކަވާފައެވެ. އެއާގުޅިގެން މީޑިޔާތަކުގައި "ނެގެޓިވް ހެޑްލައިން" ތައް އުޅޭކަން މިނިސްޓަރ ފާހަގަކުރެއްވި އެވެ. އެގޮތުން މިނިސްޓަރ ވަނީ އެފަދަ ހެޑްލައިނެއް ދައްކަވާ ކޮމިޓީގައި ވިދާޅުވެފައެވެ.
"ނެގެޓިވް ހެޑްލައިންސްތައް މިސާލަކަށް އިއްޔެ ހެޑްލައިނަކަށް މިއަރަނީ ފިނޭންސް މިނިސްޓަރ ނެގްލިޖެންސް އިން މެނޭޖިންގ ސްޓޭޓް ޑެޓް"މިނިސްޓަރ ވިދާޅުވި އެވެ.
އެމްޑީޕީގެ މެމްބަރެއްގެ ގޮތުގައި ފިނޭންސް މިނިސްޓަރކަމުގައި ހުންނެވި އަމީރު ވިދާޅުވީ ފިނޭންސް މިނިސްޓްރީގެ އިންޓަގްރިޓީ ހިފެހެއްޓުމަށް ބޭނުންފުޅުވާ ކަމަށެވެ.
މިނިސްޓަރ ވިދާޅުވީ ފިނޭންސް މިނިސްޓްރީން މިހާރު ހާމަކުރާ މާލީ މައުލޫމާތުތަކަކީ މާލީ އިދާރާތަކުން ބަލައިގެންފައިވާ މައުލޫމާތުތަކެއް ކަމަށެވެ.
ފިނޭންސް މިނިސްޓަރުކަން ރައީސް ޔާމީންގެ ސަރުކާރުގައި ކުރެއްވި ދެ ވަޒީރުންކަމަށްވާ އަބްދުﷲ ޖިހާދު އާއި އަހުމަދު މުނައްވަރު އަދި މިހާރުގެ ފިނޭންސް މިނިސްޓަ އަމީރު ދައުލަތުން ދަރަނީގެ ކަންކަން ބެލެހެއްޓުމުގައި މައްސަލައެއް އުޅޭގޮތަށް ކަންކަން ނުކުރާކަމަށް ވިދާޅުވެ ވާހަކަދެއްކެވެމުން ކޮމިޓީ ނިންމަވައިލައްވަމުން މަޖިލީހުގެ ރައީސް ނަޝީދު ވިދާޅުވީ، ތިން ފިނޭންސް މިނިސްޓަރުން ވެސް ދަރަނި ރަނގަޅަށް މެނޭޖު ކުރައްވަމުންދާ ކަމަށް ވިދާޅުވި ނަމަވެސް މިއަދު ވެސް އިތުރަށް ސާފުވީ، ދަރަނި މެނޭޖު ކުރުމުގެ ކަންކަން ރަނގަޅަށް ނުދާ ކަން ކަމަށެވެ. ސަބަބެއްގެ ގޮތުގައި އެ މަނިކުފާނު ވިދާޅުވީ، ސަރުކާރުން ގެރެންޓީ ދިން ލޯނެއް ނުދެއްކިގެން އެ ދެއްކުމަށް ދައުލަތަށް ލޯނު ދިން ބޭންކުން އެންގުންކަމަށެވެ. މިއީ މީގެ ކުރިން ދުވަހަކު ވެސް ހިނގާފައި ނުވާ ކަމެއް ކަމަށް ނަޝީދު ވިދާޅުވި އެވެ.
"މިއީކީ އެކެއް އަނެކެއްގެ މޫނަށް ބަލައިގެން ހެޔޮވާން ވެގެން ރުއްސަން ވެގެން ގޮސް ނުކޮށް ތިބޭވަރު ކަމެއް ނޫން، އަޅުގަނޑުގެ ވަރަށް ގާތް ރަހުމަތްތެރިއެއް މާލީ ވަޒީރަކީ. އެވިދާޅުވީ އަޅުގަނޑުގެ ޕާޓީގެ މެމްބަރެކޭ އަދި އަޅުގަނޑުގެ އަމިއްލަ ޝެޑޯ ކެބިނެޓްގެވެސް މެމްބަރެއް އެއީ. އަޅުގަނޑު އެބޭފުޅާއަށް އިތުބާރު ކުރަމޭ."ނަޝީދު ވިދާޅުވި އެވެ.
ނަޝީދު ވިދާޅުވީ ދިމާވެގެން އުޅެނީ އެހެން މައްސަލައެއް ކަމަށެވެ.
ކޮމިޓީ ބައްދަލުވުމުގައި ތަކުރާރުކޮށް ތިން ވަޒީރުން ވިދާޅުވަމުން ގެންދެވީ ދަރަނި މެނޭޖްކުރުމުގެ ކަންކަން ފިނޭންސް މިނިސްޓްރީ ތެރޭގައި ހިނގަނީ ޕްރޮފެޝަނަލްކޮށް ކަމަށެވެ. އަދި މިހާރުގެ ފިނޭންސް މިނިސްޓަރ އަމީރު ތަކުރާރުކޮށް ވިދާޅުވަމުން ގެންދެވީ ދަރަނީގެ ކަންތަކުގައި ބޭނުންވާ މައުލޫމާތުތައް މަޖިލީހަށް ގަވާއިދުން ފޮނުއްވަމުން ގެންދަވާކަމަށާއި މިކަމުގައި އޮޅުން އަރާކަމެއް ނޫޅޭނެކަމަށެވެ.
ކޮމިޓީ ބައްދަލުވުމުގައި އިންނެވި އޮޑިޓަރ ޖެނެރަލް ހަސަން ޒިޔަތު ވިދާޅުވީ ދައުލަތުން ސޮވަރިން ގެރެންޓީތައް ދޫކުރުމުގައި ފިނޭންސުން ގޯސްކޮށް ކަންތައްތަކެއް ހިންގާފައި އޮތް ކަމަށް މިހާތަނަށް ކުރެވިފައި ހުރި އޮޑިޓްތަކުން ފެންނަން ނެތް ކަމަށެވެ.
