އާޖެންޓީނާގެ ހޮސްޕިޓަލްތަކަށް މެސީ 50 ވެންޓިލޭޓަރު ހަދިޔާކުރަނީ

ކޮވިޑް-19 އާ ދެކޮޅަށް ހަނގުރުމާކުރުމަށް އެހީތެރިވުމުގެ ގޮތުން ބާސެލޯނާގެ ތަރި ލިއޮނެލް މެސީ، އޭނާގެ އުފަން ގައުމު ކަމަށްވާ އާޖެންޓީނާގެ ހޮސްޕިޓަލްތަކަށް 50 ވެންޓިލޭޓަރު ހަދިޔާކުރަން ނިންމާފައިވާ ކަމަށް ރިޕޯޓުތައް ބުނެފިއެވެ.

އީއެސްޕީއެންއިން ރިޕޯޓުކޮށްފައިވާ ގޮތުގައި މެސީ ވަނީ އޭނާ އުފަންވި ސިޓީ ކަމަށްވާ ރޮސާރިއޯގެ އިތުރުން ދެން ބޭނުންޖެހިފައިވާ އާޖެންޓީނާގެ އެހެން ސަރަހައްދުތަކުގެ ހޮސްޕިޓަލްތަކަށް 50 ވެންޓިލޭޓަރު ހަދިޔާކުރުމަށް ނިންމާފައެވެ. އެގޮތުން މިހާތަނަށް 38 ވެންޓިލޭޓަރު އޭނާ އާޖެންޓީނާއަށް ފޮނުވާފައިވާ ކަމަށް ވަނީ ރިޕޯޓުކޮށްފައެވެ. އަދި ކުރިއަށް ހަފުތާއެއްހާ ދުވަސްތެރޭގައި ބާކީ ހުރި ވެންޓިލޭޓަރުތައްވެސް ފޮނުވާނެ ކަމަށް ރިޕޯޓުތައް ބުނެއެވެ.

ކޮވިޑް-19 އާ ދެކޮޅަށް ހަނގުރުމާކުރުމަށް އެހީތެރިވުމުގެ އާޖެންޓީނާއަށް މެސީ 50 ވެންޓިލޭޓަރު ހަދިޔާ ކުރާއިރު، މީގެ ކުރިންވެސް މެސީ ވަނީ އާޖެންޓިނާގެ ގިނަ ހޮސްޕިޓަލްތަކަށް މާލީ އެހީތެރިކަން ފޯރުކޮށްދީފައެވެ. އެގޮތުން މެއި މަހުގެ ތެރޭގައި އާޖެންޓީނާގެ ހަ ހޮސްޕިޓަލަށް ފަސް ލައްކަ ޔޫރޯ ހަދިޔާ ކުރިއިރު، މި ފައިސާ ބޭނުން ކޮށްފައިވަނީ އެ ހޮސްޕިޓަލްތަކަށް ބޭނުންވާ ސާމާނުތައް ގަތުމަށެވެ.

އަދި މާޗު މަހުގެ ތެރޭގައި މެސީ ވަނީ ދެ ހޮސްޕިޓަލަކަށް އެހީގެ ގޮތުގައި އެއް މިލިއަން ޔޫރޯ ހަދިޔާ ކޮށްފައެވެ. އެފަހަރު މާލީ އެހީތެރިކަން ފޯރުކޮށްދިން އެއް ހޮސްޕިޓަލަކީ ބާސެލޯނާގެ ކްލިނިކް ޑި ބާސެލޯނާއެވެ. ދެން އެހީތެރިކަން ފޯރުކޮށްދިނީ އާޖެންޓީނާގެ ހޮސްޕިޓަލަކަށެވެ.

މުޅި ދުނިޔެއަށް ފެތުރިފައިވާ މި ބަލިމަޑުކަމާ ގުޅިގެން ގިނަ ފުޓްބޯޅަ ތަރިން މާލީ އެހީތެރިކަން ފޯރުކޮށްދެމުން އަންނައިރު، މީގެ ކުރިން ވޯލްޑް ހެލްތު އޯގަނައިޒޭޝަން (ޑަބްލިއުއެޗްއޯ) އިން ވަނީ ފުޓްބޯޅަ ތަރިން ދެމުންދާ އެހީތެރިކަމަށް ޝުކުރު އަދާކޮށް، އެ ކުޅުންތެރިންނަށް ތައުރީފުކޮށްފައެވެ.