ޕްރައިމަރީ ކޮންޓެކްޓަކަށްވެ، މޯލްޑިވްސް މޮނިޓަރީ އޮތޯރިޓީ (އެމްއެމްއޭ)ގެ ގަވަރުނަރު އަލީ ހާޝިމް ހުންނެވީ ކަރަންޓީނުގައި ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދު މިހެން ވިދާޅުވީ އަންގާރަ ދުވަހު، ތިން މާލީ ވަޒީރަކާއި އޮޑިޓަރ ޖެނެރަލްގެ އިތުރުން ގަވަރުނަރު ހާޒިރުކުރުމަށް ހަމަޖެހިފައިވާ މުޅި މަޖިލީހުގެ ކޮމިޓީގެ ބައްދަލުވުމުގައި ވާހަކަ ދައްކަވަމުންނެވެ.
މުޅި މަޖިލީހުގެ ކޮމިޓީގެ ބައްދަލުވުމެއް ބާއްވާފައިވަނީ ކުރީގެ ރައީސް އަބްދުﷲ ޔާމީންގެ ވެރިކަމުގައި ދައުލަތުގެ ނަމުގައި ގެރެންޓީ ދީފައިވާ ލޯނުތަކާއި 2013 ވަނަ އަހަރުން ފެށިގެން 2018 ވަނަ އަހަރާ ހަމައަށް ރާއްޖޭގެ ދަރަނީގެ މިންވަރު ހުރި މިންވަރު ސާފު ނުވާތީ އެކަން ބެލުމަށެވެ. އަދި މިކަންކަމުގެ މައުލޫމާތު ގާނޫނާއި ގަވާއިދުތަކާއި އެއްގޮތަށް ފިނޭންސް މިނިސްޓްރީން މަޖިލީހަށް އަންގާފައި ނުވާތީ އާއި މެނޭޖް ކުރުމުގައި ދެ ސަރުކާރުގެ އިހުމާލު ވެސް ފާހަގަކުރެވިފައިވާ ކަމަށް މި މައްސަލައިގައި ވެއެވެ.
ކުރީގެ ރައީސް އަބްދުﷲ ޔާމީންގެ ސަރުކާރުގެ މާލީ ވަޒީރުކަން ކުރެއްވި އަހުމަދު މުނައްވަރުއާއި އަބްދުﷲ ޖިހާދުއާއި މި ސަރުކާރުގެ މާލީ ވަޒީރު އިބްރާހިމް އަމީރުގެ އިތުރުން އޮޑިޓަރ ޖެނެރަލް ހަސަން ޒިޔަތު ވެސް ވަނީ ކޮމިޓީއަށް ހާޒިރުވެވަޑައިގެންފައެވެ.
ގަވަރުނަރު ކޮމިޓީ ބައްދަލުވުމަށް، ތަޅުމަށް ވަޑައިގެންފައިނުވާކަން ފާހަގަކުރައްވާ ރައީސް ނަޝީދު ވިދާޅުވީ އެމަނިކުފާނު ހުންނެވީ ޕްރައިމަރީ ކޮންޓެކްޓަކަށްވުމުން ކަރަންޓީނުގައި ކަމަށެވެ. އެހެންކަމުން، އެމަނިކުފާނު ކޮމިޓީ ބައްދަލުވުމުގައި ބައިވެރިވެވަޑައިގެންނެވީ އޮންލައިންކޮށެވެ.
