ލުބުނާނަށް 300 މިލިއަން ޑޮލަރުގެ އެހީއެއް، އެހީ ސީދާ ރައްޔިތުންނަށް

ލުބުނާންގެ ވެރިރަށް ބެއިރޫތްގެ ބަނދަރު ސަރަހައްދުގައި ބާރުގަދަ ގޮވުމެއް ގޮވާ އެ ސިޓީއަށް ލިބުނު ބޮޑެތި ގެއްލުންތަކުން އަރައިގަތުމަށް އެހީތެރިވެދިނުމަށް ގައުމުތަކުން ކުރިޔަށް ގެންދިޔަ ކޮންފެރެންސްގައި 300 މިލިއަން ޑޮލަރު ލުބުނާނަށް ދިނުމަށް ގައުމުތަކުން އެއްބަސްވެއްޖެއެވެ.

ވީޑިއޯ ކޮންފެރެންސް މެދުވެރިކޮށް ކުރިޔަށް ގެންދިޔަ މިބައްދަލުވުމަށްފަހު ގައުމުތަކުން ގުޅިގެން ނެރެފައިވާ ބަޔާނުގައި ބުނެފައިވަނީ އެހީ ދާނީ ސީދާ ލުބުނާންގެ ރައްޔިތުންނަށް ކަމަށެވެ. އަދި މި ހާދިސާ ހިނގަން މެދުވެރިވި ސަބަބު ހޯދުމަށް މިނިވަން އަދި ހާމަކަން ބޮޑު ތަހުގީގެއް ކުރިޔަށް ގެންދިޔުމަށް ލުބުނާނަށް އެހީތެރިވުމަށްވެސް ގައުމުތަކުން ވަނީ އެއްބަސްވެފައެވެ.

މިދިޔަ ހަފްތާގައި ބެއިރޫތްގައި ގޮވި ބާރުގަދަ ގޮވުމަކީ މިފަހުގެ ތާރީޚުގައި ދުނިޔެ ދެކިފައިވާ އެންމެ ބޮޑު ގޮވުމަށްވާއިރު އެގޮވުމުގައި 150ށް ވުރެ ގިނަ މީހުން މަރުވެފައިވާއިރު 6000ށް ވުރެ ގިނަ މީހުން ވަނީ ޒަޚަމްވެފައެވެ.

އެކި ގައުމުތަކުން ބައިވެރިވި މިބައްދަލުވުން ކުރިޔަށް ގެންދަވާފައިވަނީ ފްރާންސްގެ ރައީސް އެމަނުއަލް މެކްރޮންއެވެ. މެކްރޮން ވިދާޅުވީ ބައްދަލުވުމުގެ ތެރެއިން ގައުމުތަކުން 298 މިލިއަން ޑޮލަރު ދިނުމަށް ވައުދު ވެފައިވާކަމަށެވެ. އަދި ބައްދަލުވުން ހުޅުއްވައިދެއްވަމުން ވާހަކަ ދައްކަވަމުން މެކްރޮން ވިދާޅުވީ ބައްދަލުވުމުގެ ތެރެއިން އެއްކުރެވޭ ފައިސާ ހޭދަކުރާނީ ސިއްހީ ނިޒާމާއި، ތައުލީމު އަދި ގެދޮރުގެ ކަންކަން ހައްލުކުރުމުގެ އިތުރުން ފުޑް ސެކިޔުރިޓީއަށް ކަމުގައެވެ.

ފާއިތުވި 20 އަހަރުތެރޭގައި ފްރާންސުން ވަނީ ލުބުނާނަށް އެހީތެރިވުމަށް މިފަދަ ހަތަރު ކޮންފެރެންސެއް ބާއްވާ 20 ބިލިއަނަށްވުރެ ޑޮލަރު ހޯދާފައިވެއެވެ. މިއިން ކޮންމެ އެހީތެރިކަމެއްވެސް ފޯރުކޮށްދީފައިވަނީ ގައުމުގައި ހުރި ކަންކަން އިސްލާހުކުރުމަށް ޝަރުތުކޮށެވެ.

ބެއިރޫތްގައި ބާރުގަދަ ގޮވުމެއް ގޮވާފައިވަނީ އެ ގައުމުގެ އިގްތިޞާދު ގޮތުން ބޮޑު އަޑިގަނޑެއްގެ ތެރޭގައި ވަނިކޮށެވެ. ބާރުގަދަ ގޮވުމުގެ ސަބަބުން ބޭރޫތުގެ ތިން ލައްކައެއްހާ މީހުންގެ ގެދޮރުވަނީ ގެއްލިގެން ގޮސްފައެވެ.

ބެއިރޫތްގެ މިގޮވުމުގެ ސަބަބުން ހޮސްޕިޓަލްތަކާއި ސްކޫލްތައް ވަނީ ހަލާކުވެގެން ގޮސްފައެވެ. އާދިއްތަ ދުވަހުގެ ވީޑިއޯ ކޮންފެރެންސްގައި 36 ގައުމަކުންނާއި ބައިނަލްއަގްވާމީ ޖަމިއްޔާތަކުން ވަނީ ބައިވެރިވެފައެވެ.

މި ބައްދަލުވުމުގައި އެމެރިކާގެ ރައީސް ޑޮނަލްޑް ޓްރަމްޕް، ގަތަރުގެ އަމީން ޝެއިޚް ތަމީމް ބިން ހަމަދް އަލް ޘާނީ، އުރުދުންގެ ރަސްގެފާނު ކިންގް އަބްދުﷲ ދެވަނަ އަދި މިސްރުގެ ރައީސް ފައްތާހު އަލް ސީސީ ވަނީ ބައިވެރިވަޑައިގެންފައެވެ.

ބައްދަލުވުމުގެ ތެރެއިން އެހީތެރިކަންދިނުމަށް އެއްބަސްވެ ފައިސާ ލުބުނާންގެ ރައްޔިތުންނަށް ޚަރަދުކުރާނީ އދ އާއި ބައިނަލްއަގްވާމީ ޖަމިއްޔާތަކާއި އެންޖީއޯތައް މެދުވެރިކޮށެވެ. އަދި މިއެހީތެރިކަން ހޭދަކުރާ ގޮތް ގާތުން އދ އިން ބަލަމުންދާނެ ކަމަށް ފްރާންސްގެ ރައީސް ވިދާޅުވިއެވެ.