އެސްއެމްއީ ބޭންކު މެދުވެރިކޮށް މިހާތަނަށް 14 މިލިއަން ރުފިޔާ ދޫކޮށްފި

އެސްއެމްއީ ބޭންކު މެދިވެރިކޮށް މިހާތަނަށް އައިއިރު 14 މިލިއަން ރުފިޔާގެ ލޯން ދޫކޮށްފައިވާ ކަމަށް އެބޭންކުން ބުނެފިއެވެ.

އެ ބޭންކުން ބުނީ 14،158،393 (ސާދަ މިލިއަން އެއްލައްކަ ފަންސާސްއަށްހާސް ތިން ސަތޭކަ ނުވަދިހަ ތިން) ރުފިޔާގެ ލޯން މިހާތަނަށް އައިއިރު ދޫކޮށްފައިވާ ކަމަށެވެ. އެސްއެމްއީ ބޭންކު މެދުވެރިކޮށް 51 މިލިއަނަށްވުރެ ގިނަ ރުފިޔާގެ ލޯނު ދިނުމަށް އެބޭންކުން ވަނީ ނިންމާފައެވެ.

އެގޮތުން 49 އަންހެނުންނަށް އެމީހުންގެ އެކި ވިޔަފާރިތަކަށް އެހީތެރިވުމުގެ ގޮތުން 51،383،453 (ފަންސާން އެއް މިލިއަން ތިން ލައްކަ އަށްޑިހަ ތިން ހާސް ހަތަރު ސަތޭކަ ފަންސާސް ތިން) މިލިއަން ރުފިޔާގެ ލޯނު ދިނުމަށް ވަނީ ނިންމާފައެވެ. މީގެތެރެއިން މިހާތަނަށް ލޯނު ދޫކޮށްފައިވަނީ 25 މީހަކަށެވެ.

އެސްއެމްއީ ބޭންކު މެދުވެރިކޮށް އެންމެ ގިނަ އަންހެނުންނަށް ލޯނު ދޫކޮށްފައިވަނީ ކޮމާސްގެ ދާއިރާއިންނެވެ. މި ދާއިރާއިން 24 މީހަކަށް ލޯނު ދޫކުރުމަށް ހަމަޖެހިފައިވާއިރު މިހާތަނަށް އައިއިރު ލޯނު ދޫކޮށްފައިވަނީ 15 މީހަކަށެވެ. ދެން އެންމެ ގިނަ މީހުންނަށް ލޯނު ދޫކޮށްފައިވަނީ ފަތުރުވެރިކަމުގެ ދާއިރާއިންނެވެ. އެއީ 5 މީހުންނަށެވެ. އެދާއިރާއިން 9 މީހަކަށް ލޯނު ދޫކުރުމަށް ވަނީ ހަމަޖެހިފައެވެ.

މީގެއިތުރުން މެނިފެކްޗަރިންގގެ ދާއިރާ، މަސްވެރިކަމުގެ ދާއިރާ، ދަނޑުވެރިކަމުގެ ދާއިރާގެ އިތުރުން ދަތުރުފަތުރުކުރުމުގެ ދާއިރާއިންވެސް އަންހެން ވިޔަފާރިވެރިންނަށް ވަނީ އެސްއެމްއީ ބޭންކުން ލޯނު ދޫކޮށްފައެވެ.

ކުދި ވިޔަފާރިއާއި މެދު ފަންތީގެ ވިޔަފާރިތަކަށް ޚާއްސަކޮށްގެން އުފެއްދި އެސްއެމްއީ ބޭންކުގެ ޚިދުމަތް ފަށާފައި ވަނީ މިދިޔަ އަހަރުގެ މާރޗް މަހުގެ ތެރޭގައެވެ. އެސްއެމްއީ ބޭންކުން ދޫކުރާ ލޯނުގެ 25 އިންސައްތަ ޙާއްސަކޮށްފައިވަނީ އަންހެން ވިޔަފާރިވެރިންނަށެވެ.

އެސްއެމްއީ ބޭންކް މެދުވެރިކޮށް އަންހެނުންނަށް ޙާއްސަ އިސްކަމެއްދީގެން ލޯނު ދޫކުރާއިރު ޒުވާނުންނާއި، އިތުރުން ނުކުޅެދުންތެރިކަން ހުންނަ މީހުންނަށްވެސް ޙާއްސަ އިސްކަމެއްދީގެން އަންނަނީ ލޯނު ދޫކުރަމުންނެވެ.