ހިތަދޫން އިތުރު މީހަކު ކޮވިޑަށް ޕޮޒިޓިވް ވެއްޖެ
10 އޯގަސްޓު 2020 | ހޯމަ 02:32ޕޮޒިޓިވް ވެފައި ވަނީ 58 އަހަރުގެ ދިވެހި އަންހެނެއް
އައްޑޫ ސިޓީ
އައްޑޫ ސިޓީ ހިތަދޫން އިތުރު މީހަކު ކޮވިޑް-19 އަށް ޕޮޒިޓިވް ވެއްޖެއެވެ.
ހެލްތް އިމްޖެންސީ އޮޕަރޭޝަން ސެންޓަރ (އެޗްއީއޯސީ) އިން ބުނީ ޕޮޒިޓިވް ވެފައި ވަނީ 58 އަހަރުގެ ދިވެހި އަންހެނެއް ކަމަށެވެ. އޭނާ ޓެސްޓުކުރީ ހިތަދޫގައި ފުރަބަންދު ފުރިހަމަކުރުމުން ކަނޑައެޅިފައި އޮންނަ އުސޫލުގެ ތެރެއިންނެވެ.
އައްޑޫ ސިޓީން މީގެ ކުރިން ވަނީ ދެ މީހަކު ޕޮޒިޓިވްވެފައެވެ. އެއީ އައްޑޫ ސިޓީ ފޭދޫއަށް ޗުއްޓީއަށް ދިޔަ ފުލުހަކާއި، ހިތަދޫގައި މަސައްކަތްކުރާ ބަންގްލަދޭޝްގެ މީހެކެެވެ. މިއާއެކު އައްޑޫ ސިޓީއިން މިހާތަނަށް ފެނުނު ކޮވިޑް ބަލި މީހުންގެ އަދަދު ވަނީ ތިނަކަށް އަރާފައެވެ.
އައްޑޫ ސިޓީން ކޮވިޑްގެ ކޭސްތައް ފެނުމާއި ގުޅިގެން އެ ސިޓީ ވަނީ މޮނިޓަރިންގެ ހާލަތުގައެވެ. އެ ރަށް މޮނިޓަރިންގެ ހާލަތަށް ލެވުނީ އާދިއްތަ ދުވަހުގެ މެންދުރުގެ ވަގުތެއްގައެވެ.
