ކަނޑު ގަދަވެ ބޯކޮށް ވާރޭ ވެހޭނެކަމަށް ލަފާކޮށް ބ. އަތޮޅުން އދ. އަތޮޅަށް ޔެލޯ އެލރަޓް ނެރެފިއެވެ.

މޫސުމާބެހޭ ޤައުމީ އިދާރާއިން ބުނީ، ބ. އަތޮޅުން އދ. އަތޮޅަށް ބޯކޮށް ވާރޭ ވެހި ގުގުރާނެ ކަމަށް ލަފާ ކުރެވޭތީއާއި، ކަނޑުތައް އާދައިގެ ވަރަކަށް ގަދަވާނެ ކަމަށް ލަފާ ކުރެވޭ ކަމަށެވެ. އެއާއެކު އާދިއްތަ ދުވަހުގެ ހަވީރު 17:20ން ފެށިގެން ރޭގަނޑު 21:00ށް ޔެލޯ އެލަރޓް ނެރިފައިވާކަމަށް މޫސުމާބެހޭ ޤައުމީ އިދާރާއިން ވަނީ ބުނެފައެވެ.

އޭގެ އިތުރުން، ގަޑިއަކު 50 މޭލަށް ވައިގަދަވާނެ ކަމަށް ލަފާ ކުރެވޭ ކަމަށްވެސް މޫސުމާބެހޭ ޤައުމީ އިދާރާއިން ބުނެއެވެ.

މޫސުމާބެހޭ ޤައުމީ އިދާރާއިން ވަނީ ކަނޑުދަތުރުފަތުރު ކުރައްވާ ފަރާތްތަކުންވެސް މޫސުމަށް ސަމާލުވުމަށް އިލްތިމާސް ކޮށްފައެވެ.