ސަންޖޭ ދަތު ހެއްދި ކޮވިޑް ޓެސްޓުގެ ނަތީޖާ ނެގެޓިވް
"އެންޓިޖެން" ޓެސްޓަކުން އޭނާ ކޮވިޑް-19 އަށް ޓެސްޓު ކުރިއިރު ނެގެޓިވް
ބޮލީވުޑުގެ މަޝްހޫރު އެކްޓަރ ސަންޖޭ ދަތު- ސަންޖޭއަށް މިއަހަރު ވަނީ 61 އަހަރު ފުރިފައި
ގިނަ ބައެއްގެ ލޯބި ހޯދާފައިވާ އަދި ބޮލީވުޑުގެ މަޝްހޫރު އެކްޓަރ ސަންޖޭ ދަތުގެ ކޮވިޑް-19 ޓެސްޓުގެ ނަތީޖާ ނެގެޓިވްވެއްޖެއެވެ.
ހޮނިހިރު ދުވަހު ސަންޖޭ ދަތު މުމްބާއީގެ ލީލާވަތީ ހޮސްޕިޓަލުގައި އެޑްމިޓް ކުރީ ނޭވާލާން އުނދަގޫވެ މެޔަށް ތަދެއް އެރުމުގެ ސަބަބުންނެވެ. އަދި ސަންޖޭއަށް އައިސީޔޫގައި މެޑިކަލް އޮބްޒަރވޭޝަންގައި ފަރުވާ ދެމުންދާއިރު، އޭނާގެ ޙާލު ސްޓޭބަލް ކަމަށް ޑޮކްޓަރުން ބުނެއެވެ.
ސަންޖޭ ދަތުގެ ޑޮކްޓަރުންގެ ޓީމާ ޙަވާލާދީ އިންޑިއާގެ ނޫސްތަކުން ރިޕޯޓް ކޮށްފައިވާ ގޮތުން، ސިއްޙީ އުސޫލުތަކުގެ ދަށުން "އެންޓިޖެން" ޓެސްޓަކުން އޭނާ ކޮވިޑަށް ޓެސްޓު ކުރިއިރު، ނަތީޖާ ވަނީ ނެގެޓިވްވެފައެވެ. އެހެންނަމަވެސް އިތުރަށް ޔަޤީން ކުރުމަށް އޭނާގެ ޕީސީއާރް ޓެސްޓް ހެދުމަށް މިހާރު ސާމްޕަލްތައް ވަނީ ނަގާފައެވެ.
ސަންޖޭ ދަތު އޭނާގެ ޓްވިޓަރ އެކައުންޓްގައި ހިއްސާ ކޮށްފައިވާ ޕޯސްޓެއްގައި ވެސް ވަނީ އެކްޓަރު ކޮވިޑަށް ނެގެޓިވްކަން އިއުލާނު ކޮށްފައެވެ. އަދި ލީލާވަތީ ހޮސްޕިޓަލުގެ ޑޮކްޓަރުންނާ ނަރުހުންނަށް ތައުރީފުކޮށް ސަންޖޭ ދަތު ބުނީ، 2 ދުވަހެއްގެ ތެރޭގައި ހޮސްޕިޓަލުން ދޫކޮށްލާނެ ކަމަށް ބެލެވޭ ކަމަށެވެ.
