އެމެރިކާގައި ކޮވިޑް-19 ޖެހުނު މީހުންގެ އަދަދު 5 މިލިއަން އަށް އަރައިފިއެވެ.

ހޮނިހިރު ދުވަހުގެ ރިކޯޑުތައް ދައްކާ ގޮތުން އެމެރިކާގައި މިހާރު ވަނީ 5 މިލިއަންއަށްވުރެ ގިނަ މީހުންނަށް ބަލި ޖެހިފައިވާ ކަމަށް ރޮއެޓަރސްގެ ތަފާސްހިސާބުތައް ދައްކައެވެ.

ދުނިޔޭގައި ކޮވިޑް-19ގެ އެންމެ ގިނަ ކޭސް ފެނިފައިވާ އެމެރިކާއިން މިހާތަނަށް 160،000 ށްވުރެ ގިނަ މީހުން މަރުވެފައިވާ ކަމަށް ރިޕޯޓުތަކުން ބުނެއެވެ.

ކޮވިޑް-19ގެ ސަބަބުން އެމެރިކާގެ އިގްތިސާދު ވެސް ވަނީ ވަރަށް ބޮޑަށް އަޑިއަޅާލާފައެވެ. އަދި މިކަމުން އަރައިގަތުމަށް ސަރުކާރުން އެހީތެރިކަން ފޯރުކޮށްދިނުން ވަރަށް މުހިންމު ކަމަށް ޔޫއެސް ލެބަރ ޑިޕާޓްމެންޓް އިން ބުނެފައިވެއެވެ.

އެމެރިކާގެ ޑޮކްޓަރުންނާއި ހަވާލާދީ ރޮއިޓަރސްގައި ބުނެފައިވަނީ ވެކްސިން އެންމެ އަވަހަށް ލިބޭވަރު ވާނީ މިއަހަރުގެ ފަހުކޮޅު ކަމަށެވެ. ނަމަވެސް އެމެރިކާގެ ރައީސް ޑޮނާލްޑް ޓްރަމްޕް ވިދާޅުވެފައިވަނީ ނޮވެންބަރު މަހުގެ ތިނެއް ހިސާބުގައި ވެކްސިން ލިބޭ ވަރު ވާނެ ކަމަށެވެ.