ކުރިއަށްވުރެ ހެލްތުގެ ދާއިރާ ދަނީ ދަށަށް، ހެލްތް މިނިސްޓްރީއަށް ބޮޑެތި ފާޑު ކިޔުންތަކެއް!

ރާއްޖޭގެ ސިއްހީ ނިޒާމު ވަރަށް ބޮޑަށް ދަށަށް ދާކަމަށް ވިދާޅުވެ، ސިއްހީ ދާއިރާގެ ބޭފުޅުންތަކެއް ރައްޔިތުންގެ މަޖިލީހުގެ އިޖުތިމާއީ ކޮމެޓީގައި ހެލްތު މިނިސްޓްރީއަށް ވަރަށް ބޮޑަށް ފާޑުވިދާޅުވެއްޖެ އެވެ.

ރާއްޖޭގެ ސިއްހީ ދާއިރާގެ ކަންކަން ގޯހުން ގޯހަށްދާކަމަށް ވިދާޅުވެ، އިޖުތިމާއީ ކޮމެޓީއަށް ވަޑައިގެން މައުލޫމާތު ދެއްވާފައިވަނީ، ޑރ. ހުސައިން މާހިރު، ޑރ. އިސްހާޤު ޝަފީޤު، ޑރ. މުހައްމަދު ޝާފީ މުނީރު، ހަފީޒާ އަލީ އަދި ހަދީޖާ އަބްދުޞަމަދު އަބްދުﷲ އެވެ.

ރާއްޖޭގެ ސިއްހީ ދާއިރާގައި ހުރި މައްސަލަތައް ފާހަގަކުރައްވަމުން ވޭތުވެދި 45 ވަރަކަށް އަހަރު ރާއްޖޭގެ ޕަބްލިކް ހެލްތުގެ ދާއިރާގައި މަސައްކަތް ކުރެއްވި ހަފީޒާ އަލީ ވިދާޅުވީ، ހެލްތުގެ ދާއިރާ ހިންގުމަށް ޕޮލިސީތަކެއް އަދި ގައިޑްލައިންތަކެއް ހަދާފައި ހުންނަކަމަށާއި ނަމަވެސް އެއީ އަމަލު ނުކުރާތަނުގައި އެޕޮލިސީތަކާއި ގައިޑްލައިންތައް އެނގޭ މީހަކު ވެސް ހެލްތް މިނިސްޓްރީގައި ނެތް ކަމަށެވެ. ހަފީޒާ ވިދާޅުވީ އެގްޒެކެޓިވް ލެވެލްގެ ބައްދަލުވުންތަކާއި މަޝްވަރާ ބައްދަލުވުންތައް މިނިސްޓްރީގައި ބާއްވަމުން ނުދާކަން ފާހަގަކުރެވޭ ކަމަށެވެ.

ހަފީޒާ ވިދާޅުވީ، ހެލްތް މިނިސްޓްރީގެ ބައެއް ޑިޕާޓްމަންޓްތަކުގެ މުވައްޒަފުންނަށް މަސައްކަތް ކުރާނެ ގޮނޑި، މޭޒު ފަދަ ތަކެތި ނެތި، ރަނގަޅު މާހައުލެއް ނެތްއިރު، ހެލްތް މިނިސްޓްރީގެ ތެރޭގައި، މިނިސްޓަރގެ ބޭނުންމަށް އަގުބޮޑު ގަނޑުވަރުތަކުގެ ފެންވަރުގެ ކޮޓަރިކޮޅުތައް ހަދަމުންދާ ކަމަށެވެެ. އަދި މީހުން ބިނާކުރުމާއި، ތަމްރީމް ޕްރޮގްރާމްތައް ހިންގަމުން ނުދާކަމަށާއި ބޭރުން އަންނަ ޑޮކްޓަރުންނާއި ޓެކްނިކަލް ބޭފުޅުންނަށް އޮރިއެންޓޭޝަން، އިންޑަކްޝަން ޕްރޮގްރާމްތައް ނުހިންގާއިރު، މިނިސްޓްރީގައި ތިބި ދިވެހި މުވައްޒަފުންނަށް އިތުރަށް ކުރިއަށް ދެވޭނެ ޕްރޮގްރާމްތައްވެސް ހިންގަމުން ނުދާކަމަށް ވެސް ހަފީޒާ ވިދާޅުވި އެވެ. ނަމަވެސް މީގެކުރިން މިފަދަ ޕްރޮގްރާމްތަށް ހިންގަމުންދިޔަ ކަމަށާއި މިހާރު އޮތީ ވަރަށް ބޮޑަށް ހުއްޓިފަ ކަމަށް ހަފީޒާ ވިދާޅުވި އެވެ.

ހަފީޒާ ވިދާޅުވީ، ބަލިތަކަށް ފަރުވާ ކުރުމުގައި ޕްރެކްޓިސް ކުރާނެ ނޭޝަނަލް ގައިޑްލައިނަށް އެއްވެސް ވަރަކަށް މިހާރު އަމަލު ކުރަމުން ނުދާކަމަށާއި، އެފަދަ ގައިޑްލައިނެއް ތަންކޮޅެއް ކުރިން އޮތް ކަމަށެވެ. އެކަމަކު މިހާރު އެ ގައިޑްލައިން ފެންނަން ނެތްއިރު، އެއަށް އަމަލު ކުރަމުންވެސް ނުދާކަމަށެވެ. އެހެންކަމުން ހޮސްޕިޓަލުތަކުން އެކިފަހަރު އެކި ގޮތަށް ކަންކަން ކުރަމުންދާތަން ފެންނަ ކަމަށް އޭނާ ވިދާޅުވި އެވެ.

ހަފީޒާ ވިދާޅުވީ ދިވެހި ޑޮކްޓަރުން ނުވަތަ އިއުލާން ކުރާ މަގާމަަށް ޝަރުތު ހަމަވާ ދިވެއްސަކު ހުއްޓާ، ބިދޭސީންނަށް ވަޒީފާ ދެމުންދާތަން ވެސް ފެންނަމުންދާ ކަމަށެވެ.

ހަފީޒާ ވިދާޅުވީ ނޭޝަނަލް މާސްޓަރ ޕްލޭނެއް އޮންނާނެ ކަމަށާއި އެއަށް އަމަލު ކުރަމުންވެސް ނުދާ ކަމަށެވެ. އެގޮތުން މުޅި ސިއްހީ ނިޒާމު މިދަނީ ފެއިލްވަމުން ކަމަށް ވެސް ހަފީޒާ ވިދާޅުވި އެވެ.

މީގެއިތުރުން، ކޮމެޓީއަށް މައުލޫމާތު ދެއްވި ސިއްހީ ދާއިރާގެ ބޭފުޅުން ވިދާޅުވީ، ސިއްހީ ދާއިރާގައި ހިނގާ ކަންކަމުގެ ޒިންމާ ހެލްތް މިނިސްޓްރީން ބަލައި ފިޔަވަޅު ނޭޅޭނެ އެއްވެސް މައްސަލައެއް އޮވެގެން ނުވާނެ ކަމަށާއި، ހެލްތް މިނިސްޓްރީ ވާންޖެހޭނީ، ރާއްޖޭގެ ސިއްހީ ނިޒާމުގެ އެންމެއިސް އިދާރާއަށް ކަމަށެވެ.

އިޖުތިމާއީ ކޮމެޓީއަށް މައުލޫމާތު ދެއްވަމުން ވަޑައިގެންނެވި ސިއްހީ ދާއިރާގައި މަސައްކަތް ކުރައްވާ މި ބޭފުޅުން ވަނީ ދާއިރާގައި ހުރި ކަންބޮޑުވާ ގިނަ ކަންތައްތަކެއް ފާހަގަ ކުރައްވާފަ އެވެ.

ޑރ. އިސްހާޤު ވިދާޅުވީ، އެބޭފުޅުންގެ މައިގަނޑު މަގްސަދަކީ އެބޭފުޅުންނަށް ކުރެވެންހުރި ހުރިހާ ކަމެއް ކޮންގެންވެސް ރައްޔިތުންނަށް މިހާރަށް ވުރެ ރަނގަޅު ސިއްހީ ހިދްމަތް ފޯރުކޮށްދެވޭނެ ގޮތެއް ހޯދުން ކަމަށެވެ.