ކޮވިޑް-19ން މަރިއާނޯ ރަނގަޅުވެއްޖެ

ރެއާލް މެޑްރިޑްގެ ފޯވާޑް މަރިއާނޯ ޑިއާޒް ކޮވިޑް-19ން ރަނގަޅުވެއްޖެއެވެ.

މަރިއާނޯ ކޮވިޑް-19ށް ޕޮޒިޓިވްވިކަން އނގުނީ ޔުއެފާ ޗެމްޕިއަންސް ލީގުގެ ކުއާޓާ ފައިނަލުގެ މެޗުގެ ކުރިން ފަރިތަކުރުންތައް ފެށުމުގެ ގޮތުން ރެއާލުގެ ހުރިހާ ކުޅުންތެރިންނާއި އޮފިޝަލުން މިދިޔަ ޖުލައި މަހުގެ ފަހުކޮޅު ޓެސްޓު ކުރުމާއި ގުޅިގެންނެވެ. އެއާއެކު މަރިއާނޯ ވަނީ އައިސޮލޭޝަނަށް ބަދަލުކޮށް ފަރުވާދީފައެވެ. އެފަހަރު ރެއާލުން ބުނީ މަރިއާނޯ ކޮވިޑް-19ށް ޕޮޒިޓިވްވި ނަމަވެސް، އޭނާގެ ގައިން އެއްވެސް އަލާމާތެއް ފެނިފައިނުވާ ކަމަށެވެ.

ހުކުރު ދުވަހު ރެއާލުން ނެރުނު ބަޔާނެއްގައި ބުނެފައިވަނީ އެޓީމުގެ ފޯވާޑް މަރިއާނޯ މިހާރު ކޮވިޑް-19ން ރަނގަޅުވެފައިވާ ކަމަށާއި، އަދި މިހާރު ކުޅުންތެރިޔާއަށް ބޭރަށް ނުކުތުމުގެ ހުއްދަ ދީފައިވާ ކަމަށެވެ.

ރެއާލުން އިތުރަށް ބުނީ މަރިއާނޯގެ އިތުރުން ރެއާލްގެ ހުރިހާ ކުޅުންތެރިންނާއި އޮފިޝަލުން ބުދަ ދުވަހު ކޮވިޑް-19ށް ޓެސްޓު ކުރި ކަމަށާއި، ހުރިހާ ކުޅުންތެރިންނާއި އޮފިޝަލުންގެ ނަތީޖާތައްވެސް ނެގެޓިވް ކަމަށެވެ.

ކޮވިޑް-19ށް މަރިއާނޯ ޕޮޒިޓިވްވުމާ ގުޅިގެން ހުކުރު ދުވަހުގެރޭ ޔުއެފާ ޗެމްޕިއަންސް ލީގުގެ ދެވަނަ ބުރުގެ ދެވަނަ ލެގުގައި ރަށުން ބޭރުގައި ސިޓީއާ ދެކޮޅަށް ކުޅޭ މެޗުގައި އޭނާއަށް ނުކުޅެވޭނެއެވެ.