ޔުވެންޓަސްގެ މަޓުއިޑީ އާއި ރުގާނީ ކޮރޯނާވައިރަހުން ރަނގަޅުވެއްޖެ

މިހާރު ދުނިޔޭގައި ހަލުވިކަމާއެކު ފެތުރެމުންދާ ކޮރޯނާވައިރަސް (ކޮވިޑް-19) އަށް ޕޮޒިޓިވްވި ޔުވެންޓަސްގެ މިޑްފީލްޑަރު ބްލައިސް މަޓުއިޑީ އާއި ޑިފެންޑަރު ޑެނިއަލީ ރުގާނީ ރަނގަޅުވެއްޖެ އެވެ.

މި ދެ ކުޅުންތެރިން އެއްކޮށް ރަނގަޅުވެފައިވާ ކަން ޔުވެންޓަސްއިން ވަނީ ހާމަކޮށްދީފައެވެ. މީގެ ތެރެއިން ރުގާނީ އަކީ އިޓަލީން ކޮވިޑް-19 އަށް ޕޮޒިޓިވްވި އެންމެ ފުރަތަމަ ފުޓްބޯޅަ ކުޅުންތެރިޔާއެވެ. އެގޮތުން މިދިޔަ މާޗު މަހުގެ 12 ވަނަ ދުވަހު ރުގާނީ ކޮވިޑް-19 އަށް ޕޮޒިޓިވްވިއިރު، މަޓުއިޑީ ވައިރަހަށް ޕޮޒިޓިވްވީ މާޗު މަހުގެ 18 ވަނަ ދުވަހު އެވެ.

ދެން ޔުވަންޓަސްއިން ކޮވިޑް-19 އަށް ޕޮޒިޓިވްވެފައިވަނީ ފޯވާޑް ޕައުލޯ ޑިބާލާއެވެ. ޑިބާލާ އާއި އޭނާގެ ލޯބިވެރިޔާ މި ވައިރަހަށް ޕޮޒިޓިވްވެފައިވަނީ މާޗު މަހުގެ 21 ވަނަ ދުވަހުއެވެ. މި ވައިރަހުން ޑިބާލާ އަދި މުޅިން ރަނގަޅު ނުވި ނަމަވެސް، އޭނާގެ ހާލު ރަނގަޅު ކަމަށް މީގެ ކުރިން ޑިބާލާ ވަނީ ބުނެފައެވެ.

ކޮވިޑް-19 އާ ގުޅިގެން ދުނިޔޭގެ ފުޓްބޯޅައިގެ ހަރަކާތްތައް ހުއްޓުމަކަށް އައިސްފައިވާއިރު، އިޓާލިއަން ލީގުވެސް ވަނީ މުއްދަތެއް ނެތް ގޮތަށް ފަސްކޮށްފައެވެ. އަދި މެދުކަނޑާލައިފައިވާ އިޓާލިއަން ލީގުގެ ކުޅުން ފެށުމުގެ ކުރިން, މެއި މަހު ހުރިހާ ކުޅުންތެރިން ކޮވިޑް-19 އަށް ޓެސްޓު ކުރުމަށް މަސައްކަތްކުރާނެ ކަމަށް އިޓާލިއަން ފުޓްބޯލް ފެޑަރޭޝަނުގެ ރައީސް ގެބްރިއަލީ ގްރަވީނާ ދާދި ފަހުން ވަނީ ވިދާޅުވެފައެވެ.

ކޮވިޑް-19 ސަބަބުން އެކި ކްލަބުތަކަށް މާލީ ގޮތުން ވަނީ ގޮންޖެހުންތަކަކާ ކުރިމަތިލާން ޖެހިފައިވާއިރު، ޔުވެންޓަސްގެ ކުޅުންތެރިން ވަނީ ކުރިއަށް އޮތް ހަތަރު މަހުގެ މުސާރަ ނުނަގަން ނިންމާފައެވެ.