ކޮރޯނާވައިރަހަށް ޕޮޒިޓިވްވި ޖޮކޮވިޗް ރަނގަޅުވެއްޖެ

މަޝްހޫރު ޓެނިސް ކުޅުންތެރިޔާ ނޮވަކް ޖޮކޮވިޗާއި އޭނާގެ އަންހެނުން ކޮރޯނާވައިރަސް (ކޮވިޑް-19) ން ރަނގަޅުވެއްޖެއެވެ.

ޖޮކޮވިޗް އާއި އޭނާގެ އަންހެނުން ކޮވިޑް-19ށް ޕޮޒިޓިވްވީ ޖޫން މަހުގެ ފަހުކޮޅެވެ.

ޖޮކޮވިޗް ކޮވިޑް-19ށް ޕޮޒިޓިވްވީ ޔޫރަޕްގެ ބާލްކަން ސަރަހައްދުގެ ގައުމުތަކުގެ މެދުގައި ގުޅުން ބަދަހިކުރުމުގެ ގޮތުން ރޭވި މުބާރާތެއްގައި ޖޫން މަހުގެ 19 ވަނަ ދުވަހު ޖޮކޮވިޗް ބައިވެރިވި ފަހުންނެވެ. މި އިވެންޓުގައި ބައިވެރިވި ހަތަރު ކުޅުންތެރިއަކު ކޮވިޑް-19ށް ޕޮޒިޓިވް ވުމާއެކު، އިވެންޓުގެ ބާކީ އޮތް ދެ ގައުމުގެ ޓުއާތައް ވަނީ ކެންސަލްކޮށްފައެވެ.

ޖޮކޮވިޗާއި އޭނާގެ އަންހެނުން ޕޮޒިޓިވިކަން އެނގުނީ ކްރޮއޭޝިއާގެ އިވެންޓު ނިންމާފައި، އުފަން ގައުމު ސާބިއާއަށް ދިއުމުން ކޮވިޑް-19ށް ޓެސްޓު ކުރުމުންނެވެ.

މިދިޔަ ހަފުތާގައި ޖޮކޮވިޗް އާއި އޭނާގެ އަންހެނުން ކޮވިޑް-19ށް އަލުން ޓެސްޓު ކުރިއިރު، ދެ މީހުންވެސް ވަނީ ނެގެޓިވް ވެފައެވެ. ޖޮކޮވިޗް ބުނީ ކޮވިޑް-19ން ރަނގަޅުވިއިރު، ވައިރަހުގެ އެއްވެސް އަލާމާތެއްގެ ދެމީހުންގެ ހަށިގަޑުންވެސް ފެނިފައިނުވާ ކަމަށެވެ.

ޖޮކޮވިޗާއި އޭނާގެ އަންހެނުން ކޮވިޑް-19ން ރަނގަޅުވިއިރު، މީގެ ކުރިން ޖޮކޮވިވްގެ ކޯޗުވެސް ވަނީ ވައިރަހަށް ޕޮޒިޓިވް ވެފައެވެ.

އެންޑްރިއާ އިވެންޓް ކުރިއަށް ގެންދިޔައީ ޔޫރަޕްގެ އެކި ގައުމުތަކުން ކޮވިޑް-19ގެ ހާލަތާ ގުޅިގެން އެޅި ހަރުކަށި ފިޔަވަޅުތަކަށް ލުއިދޭން ފެށުމުންނެވެ. ޖޮކޮވިޗް ވަނީ މުބާރާތް ކުރިއަށްގެންދެވުނީ ވަރަށް އަވަސް އަރުވާލައިގެންކަން ގަބޫލުކުރާ ކަމަށް ބުނެ މާފަށް އެދިފައެވެ.

މި އިވެންޓާ ގުޅިގެން އުމުރުން 33 އަހަރުގެ ޖޮކޮވިޗްގެ އިތުރުން ދެން ކޮވިޑް-19ށް ޕޮޒިޓިވްވި ޓެނިސް ކުޅުންތެރިންނަކީ ގްރިގޯ ޑިމިޓްރޯފް އާއި، ބޯނާ ކޯރިޗް އަދި ވިކްޓަ ޓްރޮއީކީއެވެ.

އެޑްރިއާ ޓުއާއަކީ ރަސްމީ އިދާރާތަކާ ގުޅިގެން ކުރިއަށްދިޔަ ޓެނިސް އިވެންޓެއް ނޫނެވެ. ރަސްމީކޮށް ޓެނިސް ހަރަކާތްތައް ފެބްރުއަރީ މަހު މެދުކަނޑާލިއިރު، އަލުން ފަށަން ނިންމާފައިވަނީ އަންނަ އޮގަސްޓް މަހު 14 ވަނަ ދުވަހެވެ.