ކ. މާލެ
|
1 ޖޫން 2020 | ހޯމަ 00:58
ބޯންމަތުގެ ގޯލްކީޕަރު އާރޮން ރާމްސްޑޭލް: ކޮވިޑް-19ން މިހާރު ވަނީ ރަނގަޅުވެފައި
ބޯންމަތުގެ ގޯލްކީޕަރު އާރޮން ރާމްސްޑޭލް: ކޮވިޑް-19ން މިހާރު ވަނީ ރަނގަޅުވެފައި
ގެޓީ އިމޭޖަސް
ރާމްސްޑޭލް ކޮވިޑް-19ން ރަނގަޅުވުން
ގޯލްކީޕަރު އާރޮން ރާމްސްޑޭލް ކޮރޯނާވައިރަހުން ރަނގަޅުވެއްޖެ
 
ޕްރިމިއާ ލީގުން ޖުމްލަ 12 މީހަކު ވަނީ ކޮވިޑް-19ށް ޕޮޒިޓިވް ވެފައި
 
ރާމްސްޑޭލް ވަނީ 14 ދުވަހަށް އައިސޮލޭޓް ކޮށްފައި

ކޮރޯނާވައިރަސް (ކޮވިޑް-19) ށް ޕޮޒިޓިވްވި ބޯންމަތުގެ ގޯލްކީޕަރު އާރޮން ރާމްސްޑޭލް ވައިރަހުން ރަނގަޅުވެއްޖެ އެވެ.

އިނގިރޭސި ޕްރިމިއާ ލީގު ޖޫން މަހުގެ 17 ވަނަ ދުވަހު އަލުން ފެށުމަށް ނިންމާފައިވާއިރު، ކްލަބުތަކުގެ ކުޅުންތެރިންނާއި އޮފިޝަލުން އަންނަނީ ކޮވިޑް-19ށް ޓެސްޓު ކުރަމުންނެވެ. އެގޮތުން ރާމްސްޑޭލް ކޮވިޑް-19ށް ޕޮޒިޓިވްވީ ދެވަނަ ބުރުގައި ކުރިއަށް ގެންދިޔަ ޓެސްޓުތަކުންނެވެ.

ދެވަނަ ބުރުގައި ދެ މީހަކު ކޮވިޑް-19ށް ޕޮޒިޓިވް ވިއިރު، ބޯންމަތުން ވަނީ ނަން ހާމަނުކޮށް އެ ކްލަބުގެ ކުޅުންތެރިއެއް ވައިރަހަށް ޕޮޒިޓިވްވިކަން ހާމަކޮށްފައެވެ. ބޯންމަތުން ނަން ހާމަނުކުރި ނަމަވެސް، ރާމްސްޑޭލް ވަނީ އޭނާ ވައިރަހަށް ޕޮޒިޓިވް ވިކަން ހާމަކޮށްފައެވެ.

އުމުރުން 22 އަހަރުގެ އިންގްލެންޑުގެ ގޯލްކީޕަރު ކޮވިޑް-19ށް ޕޮޒިޓިވްވުމުން ވަނީ 14 ދުވަހަށް އައިސޮލޭޓް ކޮށްފައެވެ. އަދި ހޮނިހިރު ދުވަހު ރާމްސްޑޭލް ވަނީ އޭނާ ވައިރަހުން ރަނގަޅުވިކަން ހާމަކޮށްފައެވެ.

މިހާތަނަށް ޕްރިމިއާ ލީގުގެ ކުޅުންތެރިންނާއި އޮފިޝަލުން ކޮވިޑް-19ށް ޓެސްޓު ކުރުމަށް ހަތަރު ބުރެއް ކުރިއަށް ގެންގޮސްފައިވާއިރު، ޖުމްލަ 3،882 މީހަކު ވަނީ ޓެސްޓު ކޮށްފައެވެ. އެއީ ފުރަތަމަ ބުރުގައި 748 މީހުންނާއި، ދެވަނަ ބުރުގައި 996 މީހުންނާއި، ތިންވަނަ ބުރުގައި 1،008 މީހުންގެ އިތުރުން ހަތަރުވަނަ ބުރުގައި 1،130 މީހުންނެވެ.

ހަތަރުވަނަ ބުރުގައި އެއްވެސް މީހަކު ކޮވިޑް-19ށް ޕޮޒިޓިވް ނުވި ނަމަވެސް، މީގެ ކުރިން ޖުމްލަ 12 މީހަކު ވަނީ ވައިރަހަށް ޕޮޒިޓިވް ވެފައެވެ.

ކޮވިޑް-19ން ރާމްސްޑޭލް ރަނގަޅުވިއިރު، މީގެ ކުރިން ފުރަތަމަ ބުރުން ވަޓްފޯޑުގެ ޑިފެންޑަރު އޭޑްރިއަން ޕަރިއަޕާ އާއި އެ ކްލަބުގެ ދެ އޮފިޝަލަކު ވަނީ ޕޮޒިޓިވް ވެފައެވެ. އަދި ބާންލީގެ އެސިސްޓަންޓް ކޯޗު އިއަން ވޯން ވެސް ވަނީ ކޮވިޑް-19ށް ޕޮޒިޓިވް ވެފައެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: އަބުދުﷲ ނަސީރު އިބްރާހިމް
0%
0%
0%
0%
0%
0%
ކޮމެންޓް