ހުކުރު ދުވަހު ޕޮޒިޓިވްވީ 89 މީހުން، 29 މީހަކު ބަލިން ރަނގަޅުވި
އޭގެ ތެރޭގައި 58 ދިވެހިންވެސް ހިމެނޭ
ކޮވިޑް-19 ގެ ރެންޑަމް ސާމްޕްލިންގ ގެ ތެރެއިން- ފާއިތުވި ދުވަސްތަކު ގިނަ ކޭސްތަކެއް ދަނީ ފެންނަމުން
ރާއްޖެއިން އިތުރު 89 މީހަކު ކޮވިޑް-19 އަށް ޕޮޒިޓިވްވެއްޖެއެވެ.
ހުކުރު ދުވަހު ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ކުރި ޓްވީޓެއްގައި ބުނީ، ހުކުރު ދުވަހު ރާއްޖެއިން އިތުރު 89 މީހަކު ކޮވިޑް-19 އަށް ޕޮޒިޓިވްވެފައިވާ ކަމަށާއި، އޭގެ ތެރޭގައި 58 ދިވެހިންވެސް ހިމެނޭ ކަމަށެވެ. އަދި ބަންގްލަދޭޝްއަށް ނިސްބަތްވާ 19 މީހަކާއި، އިންޑިއާއަށް ނިސްބަތްވާ 6 މީހަކާއި، ސްރިލަންކާއަށް ނިސްބަތްވާ 2 މީހެއްގެ އިތުރުން، އިނގިރޭސިވިލާތަށް ނިސްބަތްވާ 2 މީހެއްވެސް ހިމެނެއެވެ.
އޭގެ އިތުރުން، އެމެރިކާއަށް ނިސްބަތްވާ މީހަކާއި، މިސްރަށް ނިސްބަތްވާ މީހެއްވެސް ހުކުރު ދުވަހު ޕޮޒިޓިވްވި މީހުންގެ ތެރޭގައި ހިމެނެއެވެ. އެއާއެކު ރާއްޖެއިން ކޮވިޑް-19 އަށް ޕޮޒިޓިވްވި މީހުންގެ ޖުމުލަ އަދަދު ވަނީ 4769ށް އަރާފައެވެ.
އެޗްޕީއޭއިން ބުނީ، ހުކުރު ދުވަހު ޕޮޒިޓިވްވި މީހުންގެ ތެރެއިން 6 މީހުންނަކީ ރަށްރަށުން ޕޮޒިޓިވްވި ކޭސްތަކެއް ކަމަށެވެ. އަދި 83 ކޭސްއަކީ މާލެ ސަރަޙައްދުން ފެނިފައިވާ ކޭސްތަކެވެ.
އޭގެ އިތުރުން، ހުކުރު ދުވަހު އިތުރު 29 މީހަކު ބަލިން ރަނގަޅުވެފައިވާއިރު، ރާއްޖެއިން ކޮވިޑް-19 ޖެހިގެން ރަނގަޅުވި މީހުންގެ ޖުމުލަ އަދަދު ވަނީ 2754ށް އަރާފައެވެ. އަދި މިވަގުތު ހޮސްޕިޓަލުތަކުގައި ފަރުވާ ދެމުންދާ މީހުންގެ އަދަދަކީ 129 އެވެ.
