ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހުގެ އެދިވަޑައިގަތުމުގެ މަތިން އިންޑިއާ ސަރުކާރުން ދެއްވާފައިވާ ހާއްސަ ހުއްދައާއިއެކު އާސަންދައިގެ ހަރަދުގައި އިންޑިއާއިން ފަރުވާ ހޯދުމަށް ދާ ހަތަރުވަނަ ބެޗު ހުކުރު ދުވަހު އިންޑިއާއަށް ފުރައިފިއެވެ.

ހުކުރު ދުވަހު އިރުއޮއްސި 18:30 ހުގައި ބަލިމީހުންނާއި އެހީތެރިންނާއިއެކު މުޅި ޖުމްލަ 50 މީހުން ވަނީ އިންޑިއާއަށް ފުރާފައެވެ.

މި ބެޗްގަ ވެސް ދިޔަ ހުރިހާ މީހުންނަކީވެސް އިންޑިއާގެ ވިސާ ހަމަޖައްސާ އެ ގައުމުގެ ޕަބްލިކް ހެލްތް ގައިޑްލައިނާ އެއްގޮތަށް ކޮވިޑަށް ޓެސްޓްކޮށް ނެގެޓިވް ނަތީޖާއާއެކުދިޔަ 50 މީހުނެވެ. އިންޑިއާއިންވެސް މި މީހުން ކޮވިޑަށް ޓެސްޓު ކުރާނެއެވެ. އަދި އެ ގައުމުގައި 14 ދުވަހުގެ ކަރަންޓީން ފުރިހަމަކުރަންޖެހޭނެއެވެ. 14 ދުވަސް ފަހުން އަނެއްކާވެސް ކޮވިޑް-19 އަށް ޓެސްޓު ކުރާނެއެވެ.

ހުކުރު ދުވަހު ފުރި މީހުންގެ ތެރެގައި ހިމެނެނީ 21 ބަލި މީހުންނެވެ. މީގެ ތެރެއިން 9 ބަލިމީހުން ފަރުވާ ހަމަޖެހިފައިވަނީ އެއިމްސް ހޮސްޕިޓަލުގައެވެ. ބާކީ 12 ބަލިމީހުންގެ ފަރުވާ ހަމަޖެހިފައިވަނީ ކިމްސް ހޮސްޕިޓަލުގައެވެ. ބަލިމީހުންނާއި އެހީތެރިންވެސް ކަރަންޓީނުގައި ތިބޭނީ ފަރުވާ ހަމަޖެހިފައިވާ ހޮސްޕިޓަލުގައެވެ. އަދި ކަރަންޓީނުގެ މުއްދަތުގައިވެސް އެމީހުންގެ ފަރުވާކުރިއަށް ގެންދެވޭނެއެވެ.