ކޮވިޑަށް އިތުރު 86 މީހަކު ޕޮޒިޓިވްވެއްޖެ
56 ދިވެހިން ޕޮޒިޓިވްވެފައިވޭ
މި ފަހަކަށް އައިސް ގިނައިން ޕޮޒިޓިވްވަނީ ދިވެހިން
ރާއްޖެއިން ކޮވިޑް-19 އަށް އިތުރު 86 މީހަކު ޕޮޒިޓިވްވެއްޖެއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނީ، ޕޮޒިޓިވްވި މީހުންގެ ތެރޭގައި ހިމެނެނީ 56 ދިވެހިންނާއި، ބަންގަލްދޭޝްގެ 27 މީހުން ކަމަށެވެ. އަދި އިންޑިއާގެ އެކަކު، ފިލިޕިންސް އެކަކު، ސްރީލަންކާއަށް ނިސްބަވްވާ ރައްޔިތަކު ވެސް ޕޮޒިޓިވްވެފައިވާ ކަމަށް އެޗްޕީއޭއިން ބުނެއެވެ.
މިއާއެކު ޕޮޒިޓިވް ކޭސްތަކުގެ އަދަދު ވަނީ 4680ށް އަރާފައެވެ. ބަލިން ފަސޭހަވި މީހުންގެ އަދަދު އުޅެނީ 2725 ގައެވެ.
އެކްޓިވް ކޭސްތަކުގެ އަދަދު އުޅެނީ 1936 ގައެވެ. މިފަހަކަށް އައިސް ޕޮޒިޓިވް ކޭސްތައް އިތުރުވެފައިވާއިރު މީގެ ތެރެއިން ގިނަ މީހުންނަކީ ދިވެހިންނެވެ.
ކޮވިޑް ފެތުރޭ މިންވަރު ރާއްޖޭގައި އިތުރުވެފައިވާއިރު މާލެ ސަރަހައްދުގައި (މާލެ، ހުޅުމާލެ، ވިލިމާލެ) ގައި ރޭގަނޑު 10:00ން ފަތިހު 5:00ށް މަގުމައްޗަށް ނުކުތުމާއި އެއްގަމު އުޅަނަދު ދުއްވުން އެޗްޕީއޭ އިން ވަނީ މަނާކޮށްފައެވެ.
އެ ގަޑިތަކުގައި ބޭރުގައި މީހުން އުޅޭ ކަމަށްވާނަމަ ފުލުހުން ފިޔަވަޅު އަޅަމުންދާނެ ކަމަށެވެ. އަދި އެ ވަގުތުތަކުގައި ބޭރަށް ނުކުމެވޭނީ ޒަރޫރީ ބޭނުމަކަށް ކޮންމެހެން ނުކުންނަން ޖެހިގެން ފުލުހުންގެ ހުއްދައާ އެކުކަމަށް ވެސް އެ ސެންޓަރުން ބުންޏެވެ.
މީގެ އިތުރުން ރޭގަނޑު 10 އަކުން ފަތިހު 05:00 އަކަށް އެއްގަމު އުޅަނދު ދުއްވުމާއި ޓޭކްއަވޭ އާއި ޑެލިވަރީގެ ހިދުމަތް ދިނުން ވެސް ހުއްޓާލުމަށް ވަނީ އަންގާފައެވެ.
