ބާ ކައުންސިލްގެ ލައިސަންސިންގ ތަމްރީނު ޕްރޮގްރާމުގައި ރަޖިސްޓަރީވުމުގެ ފުރުސަތު އިތުރުކޮށްފި

ދިވެހިރާއްޖޭގެ ބާ ކައުންސިލުން އިންތިޒާމްކުރާ ލައިސަންސިންގ ތަމްރީނު ޕްރޮގްރާމުގައި މިހާތަނަށް ރަޖިސްޓަރީވެފައިނުވާ ފަރާތްތަކުން ބާ ކައުންސިލުގައި ރަޖިސްޓަރީވުމަށް ހުޅުވާލައިފިއެވެ.

ބާ ކައުންސިލުން ބުނީ ލައިސަންސިންގ ތަމްރީނު ޕްރޮގްރާމުގައި ބައިވެރިވުމުގެ ފުރުސަތު އިތުރުކޮށް، ތަމްރީނު ޕްރޮގްރާމުގައި ބައިވެރިވާން އެދޭ އެންމެހާ ފަރާތްތަކުން ގޫގުލް ފޯމް މެދުވެރިކޮށް، 11 އޮގަސްޓް 2020 ގެ 14:00 ގެ ކުރިން ރަޖިސްޓަރީވުމަށް ފުރުސަތު ހުޅުވާލާ ކަމަށެވެ. އަދި ރަޖިސްޓްރީވާން ޖެހޭނީ ގޫގުލް ފޯމް މެދުވެރިކޮށް ކަމަށް ބާ ކައުންސިލުން ބުނެއެވެ.

ބާ ކައުންސިލުން ބުނީ މި ޕްރޮގްރާމުގައި ބައިވެރިވުމަށް އެދި ހުށަހަޅާ ފަރާތްތަކަކީ 5 އޮގަސްޓް 2020 ގެ ކުރިން މޯލްޑިވްސް ކޮލިފިކޭޝަން އޮތޯރިޓީން ގަބޫލުކުރާ މަތީ ތައުލީމުދޭ މަރުކަޒަކުން ގާނޫނީ ރޮނގުން ފުރަތަމަ ޑިގްރީ ހާސިލްކޮށްފައިވާ ފަރާތްތަކެއްކަން އަންގައިދިނުމަށްޓަކައި، ދަސްވެނިވެފައިވާ ދަރިވަރެއްނަމަ ގާނޫނީ ރޮގުން ފުރަތަމަ ޑިގްރީގެ ކޯސް ފުރިހަމަކުރިކަމުގެ ސެޓްފިކެޓް ނުވަތަ ދަސްވެނިވެފައިނުވާނަމަ، ގާނޫނީ ރޮގުން ފުރަތަމަ ޑިގްރީގެ ކޯސް އެ ދަރިވަރަކު ކޯސް ފުރިހަމަކުރިކަން އަންގައިދޭ ރަސްމީ ލިޔުން ނުވަތަ ކޯހުގެ ޓްރާންސްކްރިޕްޓް ގޫގަލް ފޯމްއާއެކު އަޕްލޯޑް ކުރަންޖެހޭ ކަމަށެވެ.

މީގެ އިތުރުން ބާ ކައުންސިލުން ބުނީ މި ތަމްރީނު ޕްރޮގްރާމުގައި ބައިވެރިވުމަށް ކުރިން ކުރެވުނު އިއުލާނުގެ ދަށުން އެޕްލިކޭޝަން ހުށަހަޅާފައިވާ ފަރާތްތަކުން އިތުރު އެޕްލިކޭޝަނެއް ހުށަހަޅަން ނުޖެހޭނެ ކަމަށެވެ.

ރަޖިސްޓަރީވުމާބެހޭ އިތުރު މައުލޫމާތު ސާފުކުރުމަށް ބޭނުންވާނަމަ ބާ ކައުންސިލުގެ 3333990 ނަންބަރު ފޯނަށް ގުޅުމަށް ނުވަތަ ބާ ކައުންސިލުގެ secretariat@maldivesbarcouncil.org އެޑްރެހަށް އީމެއިލް ކުރުމަށް ވަނީ އެދިފައެވެ.