އޯލެވެލް ނިންމާ ގިނަ ދަރިވަރުން ބޭނުންވަނީ އޭލެވެލް ހެދުމަށް

ގްރޭޑް 10 ނިންމާ ދަރިވަރުންގެ ތެރެއިން ގިނަ ދަރިވަރުން ބޭނުން ވަނީ އޭލެވެލް އަށް ކިޔަވަން ކަމަށް ގްރޭޑް 10 ނިންމާ ދަރިވަރުން ކުރިޔަށްދާން ބޭނުންވާ ދާއިރާ އިޚުތިޔާރު ކުރުމުގައި ބަލާ ކަންތައްތައް ދެނެގަތުމަށް މިނިސްޓްރީ އޮފް ހަޔަރ އެޑިޔުކޭޝަނުން ކުރި ދިރާސާ އަކުން ދައްކައިފިއެވެ.

ހަޔަރ އެޑިޔުކޭޝަން މިނިސްޓްރީން ބުނީ ރާއްޖޭގެ ހުރިހާ އަތޮޅެއް ތަމްސީލު ވާނެހެން ގްރޭޑް 10 ގައި ކިޔަވާ ދަރިވަރުންގެ މެދުގައި ކުރެވުނު ދިރާސާ އިން އޯލެވެލް ނިންމާ ދަރިވަރުންގެ ތެރެއިން 31.5 އިންސައްތަ ދަރިވަރުން އޭލެވެލްއަށް ކިޔަވާން ބޭނުންވެއެވެ. އަދި 23.6 އިންސައްތަ ދަރިވަރުން މަތީ ތައުލީމާއި ތަމްރީން ޕްރޮގްރާމެއްގައި ބައިވެރިވުމަށް ގަސްތު ކުރެއެވެ.

Advertisement

ސްކޫލް ނިންމުމަށްފަހު ދަރިވަރުން ކުރިޔަށް ދިޔުމަށް ގަސްތު ކުރާ ދާއިރާތައް ވެސް މި ދިރާސާ އިން ވަނީ ދެނެގަނެވިފައެވެ. އެގޮތުން އެންމެ ގިނަ ދަރިވަރުން ކުރިޔަށް ދާން ބޭނުންވަނީ ފަތުރުވެރިކަމާއި، ފަތުރުވެރިކަމާއި ގުޅުންހުރި ދާއިރާތަކުންނެވެ. އެއީ 21 އިންސައްތައެވެ. މީގެއިތުރުން ސިއްހީ ދައިރާ، އެކައުންޓިންގ އަދި ފައިނޭންސް، ބިޒްނަސް އަދި މާރކެޓިން، އިންޖިނިއަރިންގް، ތައުލީމީ އަދި ސްޕޯޓްސްގެ ދާއިރާތަކުން ކުރިޔަށް ދިޔުމަށް ދަރިވަރުން ވަނީ ޝައުގުވެރިކަން ފާޅުކޮށްފައެވެ.

އެންމެ މަދުން ދަރިވަރުން ޝައުގުވެރިކަން ފާޅުކޮށްފައިވަނީ މަސްވެރިކަމާއި ދަނޑުވެރިކަން، ހިއުމަން ރިސޯސް އަދި ޕަބްލިކް އެޑްމިނިސްޓްރޭޝަން އަދި ސޯޝަލް ވާރކް ދާއިރާއަށެވެ.

ކިޔެވުމަށް ގަސްތު ކުރާ ދާއިރާ ނިންމުމުގައި މާލީ އެހީތެރިކަން ލިބޭ ދާއިރާތައް، މަތީ ތައުލީމުގެ ފުރުސަތު ހުރި ދާއިރާތައް، ވަޒީފާގެ ފުރުސަތ ހުރި ދާއިރާތައް، ޝައުގުވެރިވާ ދާއިރާ އަދި އާއިލާ އާއި ރަހުމަތްތެރިންގެ ޕްރެޝަރވެސް ހިމެނޭ ކަމަށް ދަރިވަރުން ވަނީ ފާހަގަކޮށްފައެވެ.

މި ދިރާސާއިން ދައްކާ ގޮތުގައި 77 އިންސައްތަ ދަރިވަރުން މަތީ ތައުލީމާއި ތަމްރީންގެ ފުރުސަތުތަކަށް ކޮންމެވެސް ވަރަކަށް އަހުލުވެރިއެވެ. 18 އިންސައްތަ ދަރިވަރުން އެއްގޮތަކަށް ވެސް އަހުލުވެރި ނޫންކަމަށް މި ދިރާސާއިން ދައްކައެވެ.

މިނިސްޓްރީން ބުނީ މި ދިރާސާގެ އަލީގައި ކުރިޔަށް ހުރި ޕްރޮގްރާމްތައް ރޭވުމުގައި ދިރާސާ އިން ހޯދުނު ހޯދުންތަކުގެ މައްޗަށް ރިޢާޔަތް ކުރާނެ ކަމަށެވެ.