އޭއެފްސީ ކަޕަށް ޓީސީގެ ސްކޮޑް ވަރުގަދަ ކުރަނީ

އޭއެފްސީ ކަޕަށް ޓީސީ ސްޕޯޓްސް ކްލަބު އަލުން ނުކުންނައިރު، ސްކޮޑް ވަރުގަދަ ކުރުމުގެ މަސައްކަތް ކުރަމުން އަންނަ ކަމަށް އެ ޓީމުގެ ކޯޗު މުޙައްމަދު ޝާޒްލީ (ޝާޒް) ބުނެފިއެވެ.

ރާއްޖެޓީވީގެ "ކުޅިވަރު ފައިލް" ޕްރޮގުރާމުގައި ވާހަކަދައްކަމުން ޝާޒްލީ ބުނީ ޓީސީ އަކީ ވަރުގަދަ ކްލަބެއް ކަމަށާއި، ޓީސީން އޭއެފްސީ ކަޕަށް ނުކުންނާނީ ވަރަށް ރަނގަޅަށް ތައްޔާރުވެގެން ކަމަށެވެ. އެކަމަކު މިހާރުގެ ސްކޮޑަށް ވަރަށް ބޮޑު ބަދަލުތަކެއް އަންނާނެ ކަމަށްވެސް ޝާޒްލީ ބުންޏެވެ.

ޝާޒްލީ އިތުރަށް ބުނީ ރާއްޖޭގައި މިހާތަނަށް އުފެދުނު އެންމެ މޮޅު ކުޅުންތެރިޔާ އަލީ އަޝްފާގު (ދަގަނޑޭ) ޓީސީގައި މަޑުކުރާނެ ކަމަށާއި، އޭއެފްސީ ކަޕް ކަހަލަ މުބާރާތެއްގައި ދަގަނޑޭ ކްލަބުގައި ހުރުމަކީ ލިބޭނެ އިތުބާރެއް ކަމަށެވެ. އަދި ދަގަނޑޭ އަކީ ޓީސީއަށް މުހިންމު ކުޅުންތެރިއެއް ކަމަށްވެސް ބުންޏެވެ.

ޝާޒްލީ ބުނީ މިވަގުތު ފެނިގެންދަނީ ޓީމުތަކުން އަންނަ ސީޒަނަށް ކުޅުންތެރިން ހޯދުމަށް މަސައްކަތް ކުރަމުން އަންނަތަން ކަމަށާއި، އެކަމުގެ ސަބަބުން ޓީސީއަށް ގޮންޖެހުންތަކެއް އަންނަ ކަމަށެވެ. އެކަމަކު ޓީސީން ބޭރު ކުޅުންތެރިންގެ އިތުރުން ރާއްޖޭގައި ތިބި ހުނަރުވެރި ކުޅުންތެރިންނާ ވާހަކަ ދައްކަމުން އަންނަ ކަމަށާއި އޭއެފްސީ ކަޕާ ކުރިމަތިލާއިރު ބަދަލުތަކެއް ފެންނާނެ ކަމަށްވެސް ޝާޒްލީ ބުންޏެވެ.

މިފަހަރުގެ އޭއެފްސީ ކަޕުގައި މުޅިން އަލަށް ޓީސީ ވާދަކުރަމުން އަންނައިރު، ގްރޫޕް ސްޓޭޖުގެ ފުރަތަމަ މެޗުގައި ބަންގްލަދޭޝްގައި އެގައުމުގެ ބަޝުންދަރާ ކިންގްސް އަތުން ޓީސީ ވަނީ 5-1 ގެ ނަތީޖާއަކުން ބަލިވެފައެވެ.

އޭއެފްސީ ކަޕްގެ ދެކުނު އޭޝިއާގެ ޓީމުތަކުގެ ގްރޫޕްގެ މެޗުތައް މިހާރު ވަނީ އޮކްޓޯބަރު މަހު 23ން ނޮވެމްބަރު ހަތަރަކާ ދެމެދު ރާއްޖޭގައި ކުޅޭ ގޮތަށް ނިންމާފައެވެ.